VOV4.Êđê - Knơ̆ng bruă mdrao mgŭn ƀuôn prŏng Hồ Chí Minh brei thâo, aguah mbruê (9/8) ƀuôn prŏng Hồ Chí Minh mâo leh phŭn bruă mdrao mgŭn lŏ mbŏ thiăm 600 êbâo hnơ̆ng vaccine AstraZeneca. Leh mâo tŭ mă ênoh vaccine anei, ƀuôn prŏng srăng mkăp mtam kơ dŭm boh kdriêk, kdriêk čar, ƀuôn prŏng Thủ Đức čiăng lŏ dơ̆ng hlăm bruă tlŏ mgang. Yap mơ̆ng hrue 22/7 truh jih hrue 8/8, ƀuôn prŏng Hồ Chí Minh mâo tlŏ leh kơ giăm 2 êklăk 300 êbâo aruăt. Hlăm mlan 8 anei, tơdah mâo djăp êa drao vaccine, ƀuôn prŏng Hồ Chí Minh srăng dưi tlŏ jih hlăm yang ƀuôn, hŏng hnơ̆ng ênoh jing mơ̆ng 70 – 80% ênoh mnuih mơ̆ng 18 thŭn kơ dlông. Djŏ tuôm hŏng bruă tlŏ mgang, knơ̆ng bruă mdrao mgŭn ƀuôn prŏng Hồ Chí Minh brei thâo, ăt mrâo mâo leh klei mtă kơ dŭm boh sang êa drao, anôk bruă mdrao mgŭn, lehanăn dŭm anôk pŏk klei tlŏ mgang mjing djăp klei găl kơ phung ƀuôn sang mâo tlŏ mgang, mkă dlăng klei suaih pral tal êlâo čiăng thâo klă mngač êpul srăng dưi tlŏ, ka dưi tlŏ, mblang hĕ bi nik ya ngă amâo mâo dưi tlŏ hŏng mnuih hlăk dôk yua êa drao, mnuih hlăk mâo mta klei ruă ktrŏ./.

Y Ƀel pô mblang