VOV4.Êđê- Ƀuôn prŏng Hồ Chí Minh mâo tui ngă kjăp leh dŭm hdră êlan gang mkhư̆ klei ruă tưp, êngao kơ anăn ƀuôn prŏng Hồ Chí Minh ăt čiăng lŏ mâo klei hâo hưn, mtrŭt mjhar kơ mnuih ƀuôn sang mâo klei bi đru lehanăn mđĭ ai hdơ̆ng pô hlăm bruă gang mkhư̆ klei ruă tưp. Anei jing klei mtă mơ̆ng k’iăng khua knŭk kna Vũ Đức Đam, khua êpul gĭt gai ala čar bruă gang mkhư̆ klei ruă tưp hlăm klei kƀĭn online hŏng dŭm čô khua khua kiă kriê ƀuôn prŏng Hồ Chí Minh tlam mbruê (14/7) ti sang bruă knŭk kna. truh kơ ară anei, ƀuôn prŏng Hồ Chí Minh dưi đru leh kơ êbeh 130 êbâo čô mnuih mă bruă êngiê, mâo hlăm brô 9 êbâo čô mnuih nao čhĭ hră mrô, mâo leh 57% mkă hŏng hdră kčah, mâo dŭm kdriêk, kdriêk čar dưi mâo truh kơ 90% klei đru kơ dŭm čô mnuih mâo klei dleh dlan, dŭm čô čhĭ mnia hlăm alŭ wăl.

K’iăng khua knŭk kna lŏ mtă kơ ƀuôn prŏng Hồ Chí Minh lŏ uêñ mĭn hĭn kơ dŭm čô mnuih dôk hlăm klei dleh dlan, boh nĭk jing dŭm alŭ wăl mâo lu mnuih ƀun ƀin leh dŭm hruê mmông bi ktlah yang ƀuôn, đru hlăm mnơ̆ng dhơ̆ng yua, mnơ̆ng ƀơ̆ng huă, mđĭ ai mnuih ƀuôn sang hlăm hruê mmông ngă klei bi kbưi yang ƀuôn./.

Pô mblang: Y-Ƀel Êban