VOV4.Êđê- Aguah hruê 30/8, Êpul group Phương Trang đru leh kơ ƀuôn prŏng Hồ Chí Minh êbeh 2 êbâo kdrăp mnơ̆ng yua hlăm bruă mdrao mgŭn ênuk mrâo kñăm gang mkhư̆ klei ruă Covid 19. Klă klơ̆ng, kdrăp mnơ̆ng anei mâo 2 kdrăp masin bi êwa ênuk mrâo, 115 kdrăp masin đru bi êwa HFNC mtlaih mbĭt hŏng Oxy khí nén điện tử lehanăn êbeh 2 êbâo kdrăp masin mjing Oxy hnơ̆ng lu. Dŭm kdrăp masin ênuk mrâo anei dưi ba nao kơ Sang êa drao 30/4 – Phŭn bruă kahan ksiêm (Krĭng dŏng mdrao Covid 19 Nhà Bè mrâo mkŏ mjing).

Dŭm kdrăp masin đru bi êwa, masin mjing Oxy hnơ̆ng lu dưi ba nao kơ dŭm anôk bruă mdrao mgŭn, sang êa drao jing jai... ti alŭ wăl ƀuôn prŏng Hồ Chí Minh mkăp kơ hdră dŏng mdrao mnuih ruă Covid 19. Êlâo anăn, Êpul group Phương Trang blei leh 99 boh êdeh Toyota 16 mdhô̆ dôk ênuk 2021 êdeh mrâo 100% čiăng mkra jing êdeh kăp mdiăng mnuih ruă mjêč kñăm pral đru kơ mnuih ruă Covid 19 ti ƀuôn prŏng Hồ Chí Minh lehanăn dŭm čar, ƀuôn prŏng..., mđĭ ênoh êdeh anei truh 325 boh mâo 16 mdhô̆ dưi mkra jing êdeh kăp mdiăng mnuih ruă mjêč. Mơ̆ng krah mlan 6 thŭn 2021 truh kơ ară anei mâo leh êbeh 500 boh êdeh mơ̆ng êpul group dưi ba nao mbĭt hŏng êbeh 1 êbâo čô mgăt êdeh nao hgŭm hlăm hdră gang mkhư̆ klei ruă Covid 19./.

Pô mblang: H’Nêč Êñuôl