VOV4.Êđê- Hruê anei, 28/7, mơ̆ng 8 mmông mmăt truh kơ 5 mmông aguah hruê êdei, mnuih ƀuôn sang ti čar Bình Dương amâo dưi kbiă hlăm pưk sang čiăng ngă bruă gang mkhư̆ klei ruă tưp Covid-19, êngao kơ dŭm bruă đru dŏng bruă mdrao mgŭn, ngă bruă knŭk kna amâo dah nao ngă bruă gang mkhư̆ klei ruă tưp Covid-19. Anăn jing klei gĭt gai mơ̆ng khua êmua čar Bình Dương hlăm wưng klei ruă tưp Covid-19 dleh dưi ktuê dlăng ară anei. Ară anei, čar Bình Dương jing sa hlăm dŭm čar mâo ênoh mnuih mâo klei ruă tưp Covid-19 đĭ hmar truh kơ êbeh 8.900 čô, hlăm anăn mâo lu jing dŭm čô mâo klei tưp lar hlăm yang ƀuôn. Alŭ wăl ngă leh klei bi kbưi yang ƀuôn tui si hdră mtrŭn mrô 16 mơ̆ng khua knŭk kna. Khădah, hlăm dŭm klei čih yap mơ̆ng gưl dlông lehanăn phŭn bruă mdrao mgŭn, mnuih ƀuôn sang ti čar Bình Dương dôk ngă klei ngơi mang, amâo mâo klei răng hlăm bruă gang mkhư̆ klei ruă tưp lehanăn ênoh mnuih kbiă hiu hlăm êlan klông ăt dôk lu êdi, boh nik hlăm dŭm wăl krah, ƀuôn prŏng. Čiăng bi hrŏ klei tưp lar mơ̆ng klei ruă, dŭm alŭ wăl mkŏ mjing leh lu anôk ksiêm dlăng mnuih lehanăn êdeh êdâo, mbĭt anăn ngă klei ƀuah mkra lu mnuih ngă soh hŏng hdră mtrŭn mrô 16 mơ̆ng khua knŭk kna.

Pô mblang: Y-Ƀel Êban