VOV4.Êđê - Ơ ƀĭng dôk hmư̆! Tui si klei čih yap mơ̆ng Knơ̆ng bruă dhar kreh, mjuăt asei mlei leh anăn hiu čhưn ênguê čar Đồng Tháp, êngao kơ dŭm alŭ wăl dôk mâo klei đĭ kyar jăk lu jơr hlăm bruă hiu čhưn ênguê, dôk mâo lu alŭ wăl, hlăm anăn dŭm anôk krĭng knông lăn ka dưi yua jih ôh klei găl pô hlăm bruă anei, kñăm mtrŭt mđĭ, mkŏ mjing klei găl čiăng bruă hiu čhưn ênguê dưi pŏk phai hlăm hruê mmông kơ anăp, Knơ̆ng bruă dhar kreh, mjuăt asei mlei čar Đồng Tháp bi mguôp leh hŏng kdriêk Hồng Ngự nao ngă leh bruă ksiêm dlăng, mbĭt anăn mkŏ mjing hdră mtrŭn mơ̆ng êpul gơ̆ng bruă mnuih ƀuôn sang čar, klei bi klă kơ hdră êlan mtrŭt mđĭ bruă hiu čhưn ênguê ti alŭ wăl čar Đồng Tháp truh kơ grăp čô, anôk bruă dôk mkŏ mjing dŭm klei bi hmô klei hiu čhưn ênguê.

 Famstay “Ao Nhà” mơ̆ng amai Tô Kim Thi ti kdriêk Tân Hồng giăm anei mâo lu phung tuê hiu čhưn ênguê hmư̆ hing jing anôk hiu čhưn ênguê mrâo, lu klei jăk yâo ti krĭng knông lăn čar Đồng Tháp.

Ară anei famstay anei mâo 2 adŭ dưi mkra mjing hluê si klei jăk hŏng wăl hdĭp mda, lu hĭn jing yua kyâo, hlăm lam adŭ mâo ênŭm kdrăp yua jing sa adŭ dôk jưh êjai. Boh nik, klei jăk hĭn jing, êjai phung tuê hriê kơ nei mâo tač prŏng hŏng đang djam, ênao êa rông kan leh anăn dŭm anôk dlăng siam amâo tuôm mâo: “Mta kñăm ti nei jing sang dlông kĭ, anei jing klei bi mâo mơ̆ng đưm mơ̆ng sa čô mnuih ƀuôn sang krĭng êa, êlâo dih gŏ sang tuôm rŭ mdơ̆ng leh anăn hdĭp dlông êa krông hlăm sang dlông kĭ msĕ sơnei, kyuanăn kâo čiăng êjai phung tuê hriê tinei dưi thâo klă si ngă klei hdĭp sa hruê hlăm sang dlông hô̆ kĭ, jih jang mnơ̆ng yua kâo mprăp leh hlăm anăn.”

Kyua ênhă ênao êa prŏng, hrô kơ dôk hlăm sang dlông kĭ ti êlah ênao êa krông, ară anei, phung tuê dưi thâo klă klei hdĭp ti krĭng êa krông Đồng Tháp ti ênao êa anei mtam. Êngao kơ ênao êa rông kan lŏ mâo ênao êa pla mnga krih leh anăn amai Tô Kim Chi lŏ brei thâo, amai dôk lŏ pla thiăm đang ana ƀơ̆ng boh, mkra bi leh anôk dôk, anôk čhưn ênguê, huă mnăm kơ phung tuê leh hruê klă klơ̆ng pŏk ƀăng. Tơdah čiăng jing mah jiăng hriê ti nei srăng brei anak aneh dưi pla djam mtam, pla đang djam doh, leh anăn čih hĕ hruê mmông čiăng mâo klei mtrŭt pô lŏ hriê čuă dlăng, leh anăn dưi pĕ mnga krih djiêu anăn, đĭ mran, pĕ mnga, wah kan. Mâo leh 10 thŭn hŏng anei, kan ti ênao êa anei jing lu êdi.

Famstay Ao Nhà jing knŏng sa hlăm lu anôk hiu čhưn ênguê ti krĭng knông lăn Đồng Tháp. Giăm kdriêk Tân Hồng dôk mâo 6 anôk hiu čhưn ênguê dưi tă hdră bi mguôp mđĭ kyar klei hiu čhưn ênguê, mâo ƀuôn hô̆ kĭ, anôk pla mjing djam doh ti să Long Thuận, dŭm boh sang mâo leh êtuh thŭn, Đình Long Khánh dưi yap jing wăl knhuah gru gưl ala čar, ƀuôn êwei mñam knhuah gru leh anăn tač mnei ti să Long Khánh A.

Khădah ka klă klơ̆ng mâo klei tŭ yap jing anôk hiu čhưn ênguê hlăm čar, ƀiădah hlăm hruê mmông êgao, lu phung tuê hiu čhưn ênguê hlăm ala čar leh anăn tač êngao čuăn ruah leh dŭm anôk anei jing anôk nao čhưn ênguê kơ pô. Kyuanăn, bruă sang čư êa alŭ wăl ăt mtrŭt mđĭ bruă ksiêm dlăng hlăm dŭm anôk anăn, ƀrư̆ ƀrư̆ mkŏ mjing rup hiu čhưn ênguê hlăm kdriêk. Nguyễn Đức Trí, khua adŭ bruă dhar kreh leh anăn hâo hưn kdriêk Hồng Ngự, čar Đồng Tháp brei thâo: Bruă sang čư êa kdriêk mâo leh klei gĭt gai dŭm gưl bruă, knơ̆ng bruă, hlăm anăn mâo knơ̆ng bruă dhar kreh bi mguôp hŏng bruă sang čư êa să Long Khánh A ngă jăk bruă tal 1 jing rơ̆ng kơ klei êđăp ênang, tal 2 jing bruă bi doh wăl hdĭp mda. Tal 3 kơ bruă bi klă ênoh čhĭ mnơ̆ng dhơ̆ng hlăm dŭm anôk čhưn ênguê.

Êngao kơ bruă mtô leh anăn đru kčĕ thiăm dŭm klei čoh čuăn hlăm bruă ksiêm dlăng klei ngă bruă kơ alŭ wăl, knơ̆ng bruă dhar kreh, mjuăt asei mlei leh anăn hiu čhưn ênguê ăt ngă leh dŭm hdră êlan đru kơ bruă hiu čhưn ênguê hlăm alŭ wăl. Hluê si hdră mtrŭn mrô 210 mơ̆ng êpul gơ̆ng bruă mnuih ƀuôn sang čar. Klă klơ̆ng, srăng đru duh bi liê rŭ mdơ̆ng sang jưh, đru klei lĭng čan mnga hdjul mđĭ kyar bruă hiu čhưn ênguê yang ƀuôn hŏng dŭm êpul êya, grăp čô hluê si klei bi klă hlăm hdră mtrŭn anei. Hluê si Ngô Quang Tuyên, k’iăng khua kiă kriê knơ̆ng bruă dhar kreh, mjuăt asei mlei leh anăn hiu čhưn ênguê čar Đồng Tháp: Leh klei ksiêm dlăng anei, drei srăng hrăm mbĭt dôk mbĭt čiăng bi trông bi djŏ hŏng klei găl. Tal 2 jing drei srăng mkŏ mjing mnơ̆ng dhơ̆ng, anăn jing đru kơ dŭm gŏ sang leh anăn alŭ wăl čiăng mkra mjing mnơ̆ng dhơ̆ng kơ bruă hiu čhưn ênguê, mơ̆ng klei găl hlăm alŭ wăl, drei srăng pŏk adŭ mtô mjuăt bi hriăm čiăng dưi mđĭ kyar bruă hiu čhưn ênguê čiăng kčưm klei ngă bruă, mjing anôk anei jing anôk čhưn ênguê, si ngă srăng ngă čiăng mâo boh tŭ dưn.”

Mbĭt hŏng dŭm klei găl mâo mơ̆ng êlâo, thiăm hlăm anăn jing klei đru klă klơ̆ng, srăng jing klei jăk găl čiăng kơ mnuih ƀuôn sang leh anăn phung duh bi liê pŏk phai, mđĭ hnơ̆ng tŭ jăk dŭm bruă ngă, đru kơ bruă čhưn ênguê ti kdriêk Hồng Ngự leh anăn dŭm alŭ wăl krĭng knông lăn Đồng Tháp dưi pŏk hlăm hruê mmông kơ anăp.

Y-Ƀel pô mblang