VOV4.Êđê- Ti ƀuôn Kplang, să Tân Tiến, kdriêk Krông Pač, čar Dak Lak lu thŭn êgao ăt hmư̆ nanao ênai kwang mơ̆ng čing čhar đa tăp năng pral tăp năng êmưt msĕ si ba ai êwa hdĭp ktang phĭt, jăk jĭn hlăm ai tiê grăp čô mnuih ƀuôn sang tinei, mjing ai ktang khăp čiăng kơ dhar kreh ai tiê klei mĭn, klei đăo knang lehanăn klei bi hgŭm mguôp.

Čiăng dưi bi kriê pioh čing čhar, ƀuôn Kplang mâo mkŏ mjing leh 3 êpul tông čing kơ 3 gưl mnuih, mnuih prŏng, hđeh êlăk lehanăn hlăk ai. Hlăm anăn, lŏ mđĭ ai kơ gưl êdei thâo bi kriê pioh, lehanăn mđĭ mlar knhuah gru klei tŭ dưn mơ̆ng čing čhar, anăn yơh jing klei jih ai tiê mơ̆ng 10 čô hlăm êpul tông čing ƀuôn Kplang. Mnuih khua thŭn hĭn mâo leh 80 thŭn, mda thŭn hĭn jing hlăm brô 50 thŭn. Y-Yik Ƀuôn Yă 55 thŭn, hlăm êpul tông čing ƀuôn Kplang yăl dliê: “Ênai čing, ênai knah jing mnguh mngăt anak Êđê, kyua ênai čing čhar ñu ñŭ kma hlăm ai tiê anak mnuih, mbĭt hŏng lăn ala čư̆ dliê. Kyuanăn, khădah hdĭp hlăm ênuk ară anei dưn, anak Êđê ăt kriê pioh dhar kreh čing čhar, mbĭt hŏng klei djă pioh sang krum dlông, lehanăn knhuah hdĭp yang ƀuôn pô”.

Hŏng klei čang hmăng anăn, phung dôk hlăm êpul tông čing ƀuôn Kplang lŏ đru mjuăt bi hriăm leh kơ anak čô pô jing hlăk ai, hđeh êlăk hlăm ƀuôn. Êbeh 3 thŭn êgao, kyua mâo klei mjuăt mgô mtô bi hriăm mơ̆ng phung khua thŭn, snăn Êpul tông čing hlăk ai ƀuôn Kplang tông raih leh, thâo mdêč djŏ trĭp hlăm grăp ênhiang tông mơ̆ng mdê bi klei tông msĕ si Iêu huă mnăm; mơak huă êsei mrâo, ngă yang akŏ pin êa, trŭn kơ bruă, lehanăn nga yang asei...

Sa hruê tông čing čhar phung thâo mbruă ti ƀuôn Kplang, să Tân Tiến, kdriêk Krông Pač, čar Dak Lak

Amuôn Y-Salem Mlô, sa čô hlăm êpul mâo 14 čô hlăm anăn mâo 7 čô êkei, lehanăn 7 čô mniê hlăm Êpul tông čing hlăk ai ƀuôn Kplang brei thâo: “Êjai hlăk điêt kâo kreh tui tiŏ amĭ ama nao hlăm knăm klei huă mnăm hlăm ƀuôn. Khăp măng ai dôk mđing hmư̆ arăng mdêč knah, kâo tui tiŏ mnuih prŏng čiăng hriăm. Phŭn tal êlâo čiăng dleh, ƀiădah mâo phung aê ama ktrâo brei êlan ƀiă đuič snăn ară anei ƀrư̆ ƀrư̆ dơ̆ng mưn leh. Ară anei grăp blư̆ mâo mmông hriăm hlăm knhal jih hrue kăm kâo nao hriăm ênŭm, jăk êdi jing hrăm mbĭt hŏng mah jiăng hlăm êpul nao mdah klei tông čing”.

Thŭn anei êgao 80 thŭn leh, Y - Ut Ƀuôn Ya, Khua ƀuôn lehanăn lŏ jing khua êpul tông čing ƀuôn Kplang dôk bi mĭn nanao yơh čing čhar jing ngăn dưn mơ̆ng aê aduôn pô đưm, tơdah amâo lŏ gĭr bi kriê pioh, amâo lŏ mtô bi hriăm ôh kơ anak čô ară anei, sĭt nik tơdah leh jih phung mduôn đuĕ wĭt hŏng aê aduôn, năng ai amâo lŏ mâo ôh mnuih thâo tông čing. Kyuanăn, amâo mâo djŏ knŏng mtô bi hriăm tông čing čhar kơ êpul hđeh êdam, Y-Ut lehanăn lu phung thâo mbruă mkăn lŏ mkŏ mjing êpul tông čing hđeh điêt. Nanao hlăm grăp blư̆ yan mdei prŏng truh, phung mduôn khua mnuih thâo kơ čing čhar lŏ truh hlăm grăp boh sang mđĭ ai phung hđeh nao hriăm hlăm adŭ tông čing. Mơ̆ng 10 thŭn phung hđeh dưi nao mŭt leh hlăm êpul tông čing, dơ̆ng tal êlâo jing hriăm tông čing kram, lu phung hđeh êmăt snăk, mâo klei khăp tui hriăm, knŏng hlăm sa wưng tui hriăm phung hđeh dơ̆ng thâo mdêč dŭm ênhiang tông mdê mdê. Dlăng kơ phung hđeh mâo klei khăp hriăm tông, snăn Y-Ut đao knang, phung hđeh gưl mrâo lŏ mâo phung thâo kơ čing čhar čung bamjuăt mgô mtô bi hriăm, sĭt nik srăng jing phung lŏ čuê bruă kriê pioh dhar kreh čing čhar, anăp amrra dưi kwang nanao hlăm ƀuôn sang.

Kñăm kriê pioh lehanăn mđĭ bi lar knhuah gru yuôm bhăn dhar kreh čing čhar, hlăm dŭm thŭn êgao, bruă sang čư̆ êa alŭ wăl mâo mkŏ mjing leh dŭm knăm djuê ana djŏ tuôm hŏng čing čhar; lŏ blei mâo 3 rĭng čing; 20 kdrăp čŭt hơô pioh kơ êpul tông čing; rŭ mdơ̆ng sang bi kƀĭn ƀuôn Kplang; mkŏ mjing mâo 6 boh adŭ mtô bi hriăm tông čing kơ hlăm brô 200 čô hlăk ai hđeh êlăk./.

Pô mblang: Y-Khem Niê