VOV4.Êđê- Khua knŭk kna Phạm Minh Chính mrâo gĭt gai, Čiăng lŏ mlih mrâo bruă thâo ba yua klei mrâo mrang hlăm bruă gang mkhư̆ klei ruă tưp Covid-19. Tui hluê anăn, dŭm klei dưn yua mơ̆ng phŭn bruă klei mrâo lehanăn hâo hưn jao kơ dŭm knơ̆ng bruă mrâo mrang hlăm ala čar mđĭ kyar hlăm dŭm hruê leh êgao, srăng jing mnơ̆ng dưn yua srăng dưm hlăm đĭng ƀlŭ kơ jih jang mnuih tơdah nao hlăm anôk mâo lu mnuih, đru kơ bruă dưi hmao ƀuh klei bi jĕ, bi hrŏ bruă bi ktlah lehanăn tui duah lu F1, F2 msĕ hŏng ară anei.

Ti anăp anei, phŭn bruă mdrao mgŭn srăng mâo hră mtrŭn kơ bruă srăng brei jih jang dưm kdrăp dưn yua anei hlăm đĭng ƀlŭ čiăng đru kơ bruă gang mkhư̆ klei ruă tưp Covid-19. Leh klei bi kƀĭn trực tuyến hruê mbruê 26/5 hŏng 2 čar Bắc Ninh lehanăn Bắc Giang lehanăn boh nĭk leh mâo klei gĭt gai mơ̆ng khua knŭk kna kơ bruă brei dưm kdrăp dưn yua klei mrâo mrang hlăm bruă gang mkhư̆ klei ruă tưp Covid-19, phŭn bruă klei mrâo lehanăn hâo hưn bi êdah, srăng brei jih jang dưm kdrăp dưn yua mka mjing mơ̆ng Việt Nam.

 Pô mblang: Y-Khem Niê