Ti sang mkra mjing mơ̆ng knơ̆ng bruă msei ASEAN (Anôk bruă tuh tia Hoà Phú, čar Dak Lak), ayŏng Lê Trung Hiếu mbĭt hŏng 3 čô dôk mă bruă čuh kpur riă msei. Êlâo dih ngă bruă anei čiăng mâo 5 – 7 čô mă bruă, ƀiădah leh ayŏng Hiếu mkra mjing kdrăp ƀhur osi kơ kpur riă msei, bi êran knŏng čiăng mă 4 čô.

“Ayŭ osi pô ngă hŏng kngan, pô mă bruă dôk ti djiêo kpur riă, čŭt đĭng leh anăn ayŭ êwa kơ kpur, huĭ êdi kyua pui hlơr, msei kčăi djŏ asei mlei. Mơ̆ng boh sĭt anăn, kâo mĭn mkra mjing kdrăp ƀhur êwa hŏng môtơr, bi mguôp pŏk mdjiê mơ̆ng kbưi. Leh mkra dŏ anei, ayŏng adei dưi dôk kbưi hŏng kpur, ƀuh tŭ dưn leh anăn ñĕ kơ klei arưp aram”.

Knơ̆ng bruă riă msei ASEAN ară anei mâo 340 đoàn viên, bi kƀĭn ti 2 êpul công đoàn. Hluê si Nguyễn Hữu Thống, khua Công đoàn knơ̆ng bruă, hlăm bruă riă msei, klei kčĕ đru mguôp yuôm bhăn hlăm klei mkriêm prăk kăk, mđĭ hnơ̆ng mkra mjing leh anăn hnơ̆ng jăk mnơ̆ng dhơ̆ng. Knơ̆ng bruă mtrŭt mjhar mnuih mă bruă mă bruă mlih mrâo, mđĭ ai dưi bi ktưn. Mơ̆ng anăn, mâo lu kỹ sư, phung mă bruă mâo dŭm klei kčĕ klă klơ̆ng, bi Lê Trung Hiếu mâo 3 klei kčĕ jing kdrăp pŏm êa mkriêt mkriêm pui kmlă, mkra mđĭ dŏ hrip pui kmlă leh anăn mkra mđĭ đĭng ƀhur osi, mbĭt anăn ksiêm duah mkra mlih kdrăp mtrang mngač. Thông brei thâo:

“Dŭm klei kčĕ mơ̆ng ayŏng Hiếu đru bi hrŏ jih hnơ̆ng ênoh bi liê mkra mjing, mđĭ hnơ̆ng jăk mnơ̆ng dhơ̆ng, mtrŭt mđĭ klei mlih mrâo, đru kơ knơ̆ng bruă đĭ kyar hơĭt kjăp.”

Êjai ayŏng Lê Trung Hiếu khăp kơ klei mă bruă, klei mkra mjing hlăm sang măi, bi amai H’Chuyên Niê, hŏng bruă riêk ktăk ksu, ăt đru mguôp kơ đang pla mjing. Jing sa čô mă bruă ti đang ksu Phú Xuân, mâo 10 ngă bruă, amai bi leh jăk nanao bruă klam pô. Amai mă bruă lu hĭn giăm 20% mkă hŏng hnơ̆ng mă bruă mbĭt. Amai H'Chuyên brei thâo:

“Pô srăng gĭr kgŭ ưm, nao ưm amâodah wĭt êla hĭn hŏng pô mkăn. Êjai riêk ktăk ksu pô mâo klei răng, amâo mâo ruăt ôh, amâo mâo brei ktăk ksu rôč kơ tač. Dhŏng reh ktăk ksu pô sah ƀơ̆ng nanao, dŭm mta mkăn msĕ si kniêm, giêt êa, amâodah klei kă pô djă ênŭm nanao.”

Ti čar Dak Lak ară anei mâo giăm 62 êbâo čô đoàn viên công đoàn, bi kƀĭn ti êbeh 1.350 anôk bruă công đoàn nah gŭ. Dŭm thŭn êgao, hdră bi lông ktưn mă bruă knuă dưi ngă kluôm êlam, iêo jak klei sa ai mơ̆ng phung đoàn viên, hlue anăn mâo dŭm êbâo klei kčĕ, bi mrâo hdră mnêč, đru mđĭ boh tŭ dưn mkra mjing, mnia mblei. Čiăng mđĭ klei klei mlih mrâo. Êpul hgŭm mă bruă čar Dak Lak kreh pah mni leh anăn pŏk mlar gru hmô. Nguyễn Phú Lập – K’iăng khua êpul hgŭm mnuih mă bruă čar Dak Lak brei thâo:

Thŭn anei, hŏng hdrăm mă bruă mbrư, Êpul hgŭm phung mă bruă čar ngă leh dŭm hdră êlan leh anăn hră mơar gĭt gai, mơĭt kơ công đoan nah gŭ čiăng mđĭ ai, mtrŭt mjhar phung mă bruă lŏ khăp kơ bruă hĭn, ƀrư̆ ƀrư̆ mkŏ mjing alŭ wăl đĭ kyar hĭn. Hlăm mlan mnuih mă bruă, hmei bi mguôp hŏng knơ̆ng bruă kiă kriê bruă knuă čar mkŏ mjing Hruê knăm mnuih mă bruă ti anôk bruă tuh tia Hoà Hiệp hlăm hruê 5/5 hŏng 3000 čô nao hgŭm. Hmăng hmưi thŭn nei srăng mâo lu ai dưi đru kơ lu mnuih mă bruă.

Hlăm klei mlih mrâo leh anăn mlih mrô, phung mă bruă msĕ si Lê Trung Hiếu leh anăn H’Chuyên Niê dôk bi klă klei yuôm pô hŏng ai tiê mbruă leh anăn bruă klam hlăm bruă knuă. Mơ̆ng anôk  riă msei truh kơ anôk reh ktăk ksu, dŭm klei kčĕ leh anăn klei gĭr mơ̆ng diñu jing mđĭ boh tŭ dưn bruă mkra mjing leh anăn bi djŏ guôp hŏng dŭm klei čuăn mrâo mrang./.\