Mđing hmư̆ ai tiê klei čang hmăng mơng mnuih mă bruă, Khua gĭt gai Tô Lâm bi êdah klei mgei ai tiê kyua mâo lu gru bi hmô năng mđing êdi, bi knăl knhuah jăk siam mơ̆ng mnuih mă bruă Việt Nam hrue anei: Kreh kruiñ, thâo gĭr, hdĭp mâo klei thâo uêñ, thâo khăp kơ găp djuê, sĭt suôr hŏng ƀĭng mă bruă, hŏng anôk duh mkra, hŏng êpul bruă Công đoàn lehanăn hŏng lăn čar. Khua gĭt gai mñă,   Đảng lehanăn knŭk kna čih yap nanao dŭm gưl mnuih mă bruă jing êpul êya yuôm bhăn hlăm bruă rŭ mdơ̆ng lehanăn răng mgang lăn čar.

Hlăm grăp gưl cách mạng, mnuih mă bruă Việt Nam găn nanao klei dleh dlan, knap mñai, hlăm anôk duh mkra, hlăm sang mkra mjing, alŭ wăl tuh tia, hlăm djăp bruă duh mkra mnia mblei, bruă dŭ mdiăng, kdrăp mrâo, klei mkra mjing. Snăn kiê kngan, ai tiê klei mĭn lehanăn klei mbruă mơ̆ng ayŏng amai adei mâo mjing leh dŭm boh tŭ dưn kơ klei mđĭ kyar lăn čar ară anei.  Khua gĭt gai Tô Lâm mtă lŏ dơ̆ng duh mĭn bi jăk kơ klei hdĭp mda mnuih mă bruă, anăn jing bruă čuăn yuôm bhăn  hlăm kđi čar, hŏng klei amâo mâo mdei ôh. Ƀuôn prŏng lŏ ksiêm dlăng bi nik klei kơ sang dôk kơ mnuih mă bruă, sang hră hriăm, sang rông hđeh, sang êa drao, anôk kơ dhar kreh, alŭ wăl hdĭp mda ti dŭm alŭ wăl duh mkra hlăm ƀuôn prŏng. Si srăng ngă čiăng kơ mnuih mă bruă, amâo mâo djŏ knŏng mâo bruă knuă mă, ƀiădah lŏ mjing djăp klei găl rông anak aneh, duh kơ amĭ ama ti ƀuôn sang, amâo mâo djŏ knŏng mă bruă knuă, ƀiădah lŏ mâo klei mdei msăn, hriăm mjuăt, mđĭ klei hdĭp ai tiê./.