Wưng leh êgao, Knơ̆ng kiă kriê mnuih mă bruă Việt Nam mâo ngă leh lu bruă, mta kñăm kơ klei bi blŭ hrăm êpul êya lehanăn mâo ba wĭt leh lu klei tŭ dưn. Truh kơ ară anei, dŭm klei leh bi tŭ ư plah wah mnuih mă bruă truh êbeh 85% ênoh jih jang mnuih mă bruă hlăm dŭm anôk duh mkra, dŭm êpul êya bruă công đoàn. Blŭ hrăm ti anôk bi tuôm, K’iăng khua lăn čar Võ Thị Ánh Xuân bi myuôm êpul knuă druh bruă công đoàn nah gŭ, lehanăn 101 čô knuă druh công đoàn nah gŭ jing kdlưn hĭn hlăm dŭm klei bi blŭ hrăm hlăm êpul êya đru leh kơ êbeh 382 êbâo čô mnuih mă bruă dưi dưn  hŏng ênoh kah knar êbeh 6 êbâo êklai prăk/thŭn .

K’iăng khua lăn čar mñă, jih jang boh tŭ dưn anăn đru leh kơ mnuih mă bruă mâo klei hdĭp jăk hĭn, hơĭt hĭn hlăm klei mă bruă, mjing knơ̆ng čiăng kơ mnuih mă bruă ruah mdưm klei jưh knang kơ êpul bruă Công đoàn hlăm klei mă bruă knuă lehanăn hŏng jih bruă kđi čar. K’iăng khua lăn čar Võ Thị Ánh Xuân čang hmăng kơ anôk bruă kiă kriê mnuih mă bruă Việt Nam lŏ dơ̆ng mlih mrâo ktang hĭn hdră êlan mă bruă hlăm công đoàn hŏng klei khuăt kjăp, wĭt phă nah gŭ, mđĭng kơ mnuih mă bruă, dlăng kơ mnuih mă bruă jing phŭn. Lehanăn mđĭ boh tŭ kơ klei bi ala, kơ klei duh mĭn, răng mgang keli tŭ dưn kơ mnuih mă bruă, lehanăn pral dưi thâo ƀuh dŭm klei čang hmăng, klei akâo mơ̆ng mnuih mă bruă, mghaih msir jih jang klei dleh kpăk hlăm nah gŭ, đru mjing klei đăo knang, lehanăn mđĭ hĭn klei thâo bi mguôp jih jang djuê ana./.