VOV4.Êđê- Khua lăn čar Nguyễn Xuân Phúc mâo leh klei blŭ hrăm hluê êlan đĭng blŭ hŏng Khua kiă kriê tal sa Anôk bruă Đảng Cộng sản gưl dlông Cuba, Khua gĭt gai Cu-ba Miguel Díaz-Canel bi trông kơ hdră êlan, hdră msir lŏ mđĭ hĭn klei bi mjĕ jăk siam mâo mŏng đưm plah wah dua Đảng, Knŭk kna lehanăn mnuih ƀuôn sang dua ala čar. Khua lăn čar Nguyễn Xuân Phúc bi êdah klei m’ak gưl tal êlâo mâo klei blŭ hrăm hŏng Miguel Díaz-Canel hŏng k’hưm păn ngă bruă mrâo; bi mni kơ klei bi mjĕ dua ala čar hlăk lŏ đĭ kyar jăk siam amâo uêñ kơ wưng dôk bluh mâo klei ruă tưp. Dua khua kiă kriê mñă klă leh ai tiê bi hgŭm mguôp kjăp phĭt plah wah Việt Nam hŏng Cuba, mprăp ai tiê sa ai lehanăn bi đru kơ hdơ̆ng găp hlăm ya klei mâo, tŭ ư mđĭ hĭn hdră bi hgŭm lehanăn bi trông kơ klei thâo hlăm hdră mkŏ mkra yang ƀuôn êngiê ngă phŭn ti dua ala čar. Khua gĭt gai Miguel Díaz-Canel mñă klă, Cuba bi myuôm klei bi hgŭm hlăm bruă vaccine hŏng Việt Nam, gĭr mơ̆ng ară anei truh kơ knhal jih thŭn 2021 srăng mkăp hŏng hnơ̆ng lu vaccine Abdala gang mkhư̆ Covid-19 mơ̆ng Cu-ba lehanăn mprăp ba nao phung thơ̆ng kơ bruă hriê ba jao hdră mkra mjing vaccine kơ Việt Nam./.

Pô mblang: H’Nêč Êñuôl