VOV4.Êđê - Hruê mbruê, čar Lâm Đồng lŏ mâo 6 čô mâo klei ruă tưp Covid-19 mrâo. Hlăm anăn, mâo 4 čô hlăm êpul mâo klei ruă mrâo hmao ƀuh hlăm yang ƀuôn ti ƀuôn prŏng Đà Lạt. Hlăm boh tŭ dưn phŭn kčưm, anôk bruă djŏ tuôm čar Lâm Đồng bi klă phŭm mtưp mơ̆ng 4 čô anei jing mơ̆ng mnuih ti ƀuôn prŏng Hồ Chí Minh hriê kơ Đà lạt leh anăn mưn sang jưh dôk êjai.

Knơ̆ng bruă mdrao mgŭn čar Lâm Đồng ngă mjêč leh bruă hâo hưn mrô 71 čiăng tui duah klei pô tuôm găn nao êbeh 10 anôk djŏ tuôm, hlăm anăn mâo dŭm sang jưh mdei, sang huă mnăm, sang mnăm kphê, êa čê hŏng êa ksâo êmô, sang čhĭ êa drao leh anăn sang čhi mnia. Mbĭt hŏng êpul mâo klei ruă tưp mrâo anei, čar Lâm Đồng dôk ksiêm duah, tui duah, ktuê dlăng 19 êpul mâo klei ruă tưp mkăn. Ară anei čar Lâm Đồng mâo 490 čô mâo klei ruă tưp, hlăm anăn mâo 313 čô mnuih ruă dưi mdrao hlam leh anăn wĭt kơ pưk sang.

Y Ƀel pô mblang