VOV4.Êđê -  Hruê 27/10, čar Lâm Đồng lŏ dơ̆ng mâo thiăm 15 čô mnuih ruă Covid-19, hlăm anăn mâo lu mnuih djŏ tuôm kơ anôk mâo klei ruă mrâo ti ƀuôn prŏng Đà Lạt. Hlăm 15 čô ruă Covid-19 mrâo dưi bi mklă, mâo 7 čô dưi ƀuh ti ƀuôn prŏng Đà Lạt, 6 čô ti kdriêk Đức Trọng leh anăn 2 čô ti kdriêk Bảo Lâm.

Hjăn phung ruă mrâo ti Đà Lạt djŏ tuôm kơ anôk mâo klei ruă ti alŭ 31, êlan Nguyễn Công Trứ, ƀuôn hgŭm 8, ƀuôn prŏng Đà Lạt. Ară anei čuăl krĭng, ksiêm duah, bi ktlah hjăn phung tuôm bi tuôm giăm hŏng phung ruă mâo anôk bruă djŏ tuôm ti čar Lâm Đồng gĭr pŏk ngă. Truh wưng anei, Lâm Đồng čih yap mâo 505 čô ruă Covid-19, hlăm anăn mâo 323 čô dưi mdrao hlao leh anăn kbiă mơ̆ng sang êa drao.

H Zawut pô mblang