VOV4.Êđê - Hluê si Anôk gĭt gai hdră gang mkhư̆ klei ruă Covid 19 čar Dak Lak, hlăm hruê 10/8, kluôm čar lŏ mâo 36 čô djŏ kman SARS –CoV-2 ti 6 kdriêk lehanăn ƀuôn prŏng Ƀuôn Ama Thuôt.

Klei năng mđing, ti alŭ 7 să Vụ Bổn, kdriêk Krông Pač mâo leh lu mnuih ruă hŏng 17 čô jing F0 amâo thâo phŭn bi mtưp. Ară anei, anôk bruă djŏ tuôm kwang dar leh alŭ anei. Anôk bruă mdrao mgŭn Dak Lak tui duah leh dŭm êtuh čô jing F1. Čiăng rơ̆ng hdră đru kơ mnuih ƀuôn sang hlăm krĭng kwang dar, să Vụ Bổn mkŏ mjing leh sa êpul mkăp mnơ̆ng dhơ̆ng lehanăn hưn mthâo mrô đĭng blŭ êpul anei kơ mnuih ƀuôn sang.

Mbĭt hŏng anăn să ăt brei alŭ anei hưn mthâo anăn gŏ êsei ƀun, gŏ êsei dleh dlan huĭ srăng kƀah mnơ̆ng ƀơ̆ng huă hlăm wưng hluê ngă hdră bi ktlah kñăm mâo hdră đru. Hdră ksiêm dlăng, tui duah čiăng čuăl krĭng gang mkhư̆ klei ruă tưp dôk mâo să pŏk ngă kjăp. Tĭng truh yang hruê dơ̆ng hruê 10/8, čar Dak Lak mâo leh 446 čô djŏ kman SARS –CoV -2, hlăm anăn mâo 415 čô dôk dŏng mdrao, 30 čô hlao lehanăn mâo 1 čô djiê./.

H Nêc pô mblang