VOV4.Êđê - Hluê ngă klei gĭt gai mơ̆ng Êpul grup pui kmlă Việt Nam (EVN), hlăm dua mlan 7 -8/2021, Knơ̆ng bruă pui kmlă Dak Lak bi hrŏ prăk pui kơ giăm 150 êbâo phung yua pui kmlă ti kdriêk Čư̆ Kuin leh anăn ƀuôn prŏng Ƀuôn Ama Thuôt, dŭm alŭ wăl bi ktlah yang ƀuôn hluê si Hdră mtrŭn mrô 16 mơ̆ng Knŭk kna čiăng gang mkhư̆ klei ruă Covid-19. Hlăm gưl 4, Knơ̆ng bruă pui kmlă Dak Lak đru êbeh 12 êklai 5 êtuh êklăk prăk bi hrŏ prăk pui kmlă kơ phung blei yua.

Hluê anăn hnơ̆ng klă klơ̆ng mâo: Bi hrŏ 15% prăk pui (êlâo kơ tĭng jia VAT) hlăm hră mă prăk pui kơ phung yua truh 200 kWh/mlan; bi hrŏ 10% prăk pui (êlâo kơ tĭng jia VAT) hlăm hră mă prăk pui kơ phung yua êbeh 200 kWh/mlan. Hà Văn Chương- K’iăng Khua Knơ̆ng bruă pui kmlă Dak Lak brei thâo, klei bi ktlah yang ƀuôn gang mkhư̆ klei ruă Covid-19 hluê si Hdră mtrŭn 16 mơ̆ng Khua Knŭk kna, grăp čô dôk hlăm sang anăn klei yua pui kmlă đĭ. Bruă bi hrŏ prăk pui kmlă kơ phung yua jing klei čiăng êdi hlăm boh klei ruă tưp ară anei. Anôk bruă dôk mjêč bi hgŭm hŏng anôk bruă djŏ tuôm čih anăn phung blei yua čiăng đru bi hrŏ, amâodah amâo mă prăk pui kmlă hluê si klei kčah mtrŭn. “Knơ̆ng bruă pui kmlă Dak Lak akâo kơ Knơ̆ng bruă sang čư̆ êa čar Dak lak, ƀuôn prŏng Ƀuôn Ama Thuôt, kdriêk Čư̆ Kuin leh anăn anôk bruă mâo klei dưi čiăng bi mklă anăn phung blei yua ti dua alŭ wăl bi ktlah yang ƀuôn hluê si Hdră mtrŭn 16 djăp klei găl dưi bi hrŏ amâodah amâo mă prăk hlăm gưl anei. Leh anăn dưi bi mklă, hmei srăng ngă mtam bruă bi hrŏ prăk pui kmlă kơ êpul anei hluê si klei kčah mtrŭn hlăm mlan 7 leh anăn 8 thŭn anei.”

H Zawut pô mblang