VOV4.Êđê- Dŭm čar krĭng Lăn dap kngư hlăm anăn mâo Dak Lak mŭt leh hlăm yan hjan. Khă snăn, ti să Êa Siên, wăl krah Ƀuôn Hô, čar Dak Lak ăt ka mâo hjan mơh, dŭm knơ̆ng kdơ̆ng êa khuôt jih êa ngă kơ giăm 2.000 ha mnơ̆ng pla hmăi djŏ kjham lehanăn êbeh 1.400 gŏ êsei kƀah êa yua.

Đang kphê prŏng êbeh 1 ha hlăk dôk hlăm wưng pĕ boh mơ̆ng gŏ sang Hưá Văn Quân, să Ea Siên, wăl krah Ƀuôn Hô dôk tlă anăp hŏng klei adiê không ktang. Kphê dôk hlăm wưng rông adiê năng ai bi mtah siam ƀiădah adhan hla dliu, boh mda krô luh. Hưá Văn Quân brei thâo, tơdah hlăm 3 hruê kơ anăp adiê amâo hjan, đang kphê amâo dưi lŏ krih êa, snăn srăng luič mang jih.  

“Wưng giăm anei msĕ si dŭm thŭn êlâo adiê amâo không snăn kphê mboh srăng prŏng hĭn lu, ƀiădah kyua adiê không anăn ana amâo đĭ jing ôh ngă kơ boh điêt hĭn mkă hŏng dŭm thŭn. Adiê không lŏ ngă kơ adhan ana kphê krô, adiê luh, boh nik mâo lu ana djiê hĕ.”

Mnuih ƀuôn sang să Ea Siên dôk čang guôn adiê hjan grăp mmông čiăng mdrơ̆ng hŏng klei adiê không

Ăt msĕ snăn mơh, đang kphê pla pluă ktơr prŏng 1,4 ha mơ̆ng gŏ sang Siu H’Niê, alŭ 2 B, să Ea Siên, wăl krah Ƀuôn Hô ăt dôk tlă anăp hŏng adiê không ktang. Siu H’Niê brei thâo, thŭn dih ênhă anei dưi hrui pĕ mâo êbeh 4 ton kphê asăr, 5 ton ktơr asăr, ƀiădah thŭn anei adiê không ngă kơ ana kphê djiê krô, ktơr pla pluă snăn djiê jih. Prăk hrui wĭt mơ̆ng gŏ sang Siu H’Niê lu jưh hlăm 1,4 ha lăn anei, ƀiădah klei adiê không ngă djiê krô jih.

“Adiê mđiă ktang snei ktơr djiê jih leh. Thŭn dih hrui mă mâo 20 êklăk prăk snăn thŭn anei luič mang, bi đang kphê ăt krô hla, boh luh. Êa knơ̆ng kdơ̆ng êa snăn khuôt kđang jih leh. Tơdah dŭm hruê dơ̆ng amâo mâo adiê hjan ôh snăn hnơ̆ng boh mnga srăng hrŏ lu. Klei adiê không kƀah êa kjham ngă luič liê lu”.

Klei ksiêm yap mơ̆ng Knơ̆ng bruă sang čư̆ êa să Ea Siên brei ƀuh, yan puih mnga thŭn 2021, kluôm să mâo giăm 2000 ha ana pla mjing dŭm mta, hlăm anăn mâo 1.500 ha ana pla mjing sui thŭn jing kphê, tiu, măk ka, boh êrang, adôk jing êbeh 500 ha jing ana ƀiă hruê mlan mâo: mdiê, ktơr, êtak leh anăn kñĭt triêl.

Dŭm êtuh ha ktơr mrâo pla mơ̆ng mnuih ƀuôn sang ti să Ea Siên, wăl krah Ƀuôn Hô djiê krô kyua amâo mâo êa krih

Hluê si Nguyễn Quốc Cường –  Khua Knơ̆ng bruă sang čư̆ êa să Ea Siên, klei adiê không ti să mâo leh hlăm lu thŭn, boh nik hlăm yan không. Khădah, bruă adiê không mâo ti krah yan hjan msĕ si ară anei amâo đei mâo ôh. Cương brei nthâo, kyua lăn ala mdê hjăn anăn phŭn êa mur ti să hin, êa pioh kơ brua wpla mjing leh anăn hdĭp mda aguah tlam lu mă mơ̆ng dua knơ̆ng kdơ̆ng êa Ea Mik, Ea Ƀlang leh anăn dŭm ênao êa, êa krông, êa hnoh. Klei ka mâo adiê hjan  prŏng kơ dŭm knơ̆ng kdơ̆ng êa, ênao êa amâodah êa hnoh khuôt. Hĭn mơh, dŭm knơ̆ng kdơ̆ng êa jing Ea Mik leh anăn Ea Ƀlang lu thŭn êgao ka hwai mdoh, mkra mđĭ anăn bruă mgơ̆ng êa amâo djăp hnơ̆ng ngă kơ klei khuôt êa kjham hĭn. Klei adiê không mâo amâo djŏ knŏng luič liê giăm 2000 ha ana pla mjing ôh, ƀiădah lŏ ngă kơ êbeh 7.500 čô mnuih ƀuôn sang ti să kƀah êa yua aguah tlam kjham êdi.

“Adiê không kƀah êa mâo ti să ngă dleh dlan kơ bruă kroh êa kơ ana pla mjing leh anăn êa yua aguah tlam. Kơ êa yua aguah tlam snăn Knơ̆ng bruă sang čư̆ êa să kčĕ kơ wăl krah Ƀuôn Hồ mkŏ mjing hdră bruă mkăp pom mơ̆ng knơ̆ng kdơ̆ng êa tluôn Krông Ƀuk wĭt kơ anôk mgơ̆ng ti alŭ 2A čiăng msir mgaih êa yua kơ mnuih ƀuôn sang ti dŭm alŭ; bi êa krih kơ ana pla mjing snăn să ăt hưn mdah dŭm hdră hwai bi doh, mkra mđĭ dua bĭt knơ̆ng kdơ̆ng êa mkăn čiăng pioh kơ bruă krih êa ti alŭ wăl.”

 Klei adiê không mâo ti krah yan jan bi êdah yan adiê ƀrư̆ hruê ƀrư̆ amâo jăk, dleh đaŏ tĭng ti Lăn Dap Kngư.

Pô mblang: H’Zawut Ƀuôn Yă