VOV4.Êđê- Hluê ngă klei gĭt gai mơ̆ng Knơ̆ng prăk knŭk kna lŏ dŏng pŏk ngă dŭm hdră msir, hdră đru, ruh mtlaih klei dleh dlan kơ phung čan prăk hmăi mŏng klei ruă Covid 19, mơ̆ng hruê 16/6/2021, Agribank mđĭ ênoh brei čan hŏng prăk mnga hdjul hŏng jih jang phung tuê čan prăk hmăi mŏng klei ruă Covid 19 truh 200 êbâo êklai prăk kñăm đru kơ phung tuê msir mghaih klei dleh dlan, bi h’ĭt klei hdĭp ngă bruă duh mkra pla mjing, rơ̆ng klei êđăp ênang ala ƀuôn.

Đang kphê mrâo lŏ wĭt pla 1 ha mơ̆ng ayŏng Lê Đức Anh (êpul 5, knơ̆ng bruă kphê Đ’rao, kdriêk Čư̆ mgar, čar Dak Lak) mâo leh 8 thŭn hŏng anei, jing wưng mâo boh mnga lu hĭn. Dŭm phŭn kphê mâo lu dhan lehanăn mboh lu. Ayŏng Đức Anh brei thâo: Êlâo dih gŏ sang ñu rŭ hĕ đang kphê leh khua ana, brei lăn mdei 2 thŭn djŏ hŏng klei bhiăn lŏ wĭt pla ana kphê, lehanăn lŏ wĭt pla mrâo yơh. Kyua ruah djŏ mjeh jăk, ngă djŏ bruă kriê dlăng anăn đang kphê mrâo đĭ hriê siam êdi. Amâo msĕ hŏng lu anôk, ana kphê kreh djiê kyua tuôm hŏng lu mnơ̆ng ngă leh mrâo wĭt pla 2, 3 thŭn.

“Lŏ wĭt pla ana kphê leh brei lăn mdei, pla lu mta ana êtak êbai čiăng lŏ bi mrâo lăn lehanăn leh pô lŏ pla mrâo srăng mâo hnơ̆ng boh mnga lu hĭn. Êlâo dih ka lŏ wĭt pla mrâo, kyua ana kphê leh khua ana, 1 ha knŏng mâo mă 7-8 tôn. Leh lŏ wĭt pla mrâo lŏ mâo mơ̆ng 15-17 tôn, tơdah tăp myun srăng mâo lu hĭn, đang kphê kâo 1 ha, mâo 17 tôn boh mnga.”

Phung knuă druh Knơ̆ng prăk Agribank ti Dak Lak đru mnuih ƀuôn sang ngă hră mơar bi hrŏ prăk mnga kyua hmaĭ mơ̆ng klei ruă Covid-19

            Nguyễn Hữu Thọ, khua knơ̆ng bruă kphê Đ’rao brei thâo: knơ̆ng bruă mâo 488 ha kphê, mơ̆ng thŭn 2010 truh kơ ară anei lŏ wĭt pla leh 298 ha, mâo truh kơ 60% ênhă lăn. Ênoh prăk duh bi liê jing êbeh 33 êklai prăk. Jih jang ênoh prăk anei jing  prăk lĭng čan mơ̆ng knơ̆ng bruă ngăn prăk bruă lŏ hma lehanăn mđĭ kyar krĭng ƀuôn sang anôk mă bruă ti Čư̆ M’Gar brei čan hŏng prăk mnga hdjul. Mơ̆ng akŏ thŭn 2020 truh kơ ară anei, kyua ênoh pla mjing kphê jing lu hĭn kơ ênoh čhĭ, kyuanăn yơh knơ̆ng bruă tuôm hŏng lu klei dleh dlan. Tĭng mkă, mâo êbeh 65% hlăm 435 mnuih mă bruă hlăm knơ̆ng bruă jing mnuih djuê ƀiă, klei hdĭp dôk mâo lu klei dleh dlan, mâo lu hlăm anăn nao lĭng čan hlăm dŭm knơ̆ng bruă ngăn prăk wĭt duh bi liê kơ bruă pla mjing lehanăn klei hdĭp grăp hruê. Hlăm ênoh prăk leh mâo čan êbeh 41 êklai prăk mơ̆ng knơ̆ng bruă ară anei, jing jang anăn jing prăk lĭng čan mơ̆ng knơ̆ng bruă ngăn prăk bruă lŏ hma lehanăn mđĭ kyar krĭng ƀuôn sang hlăm kdriêk. Mơ̆ng hruê mâo klei ruă tưp Covid-19 bluh đĭ, knơ̆ng bruă ngăn prăk đru leh kơ knơ̆ng bruă dưi bi tai hruê tla nư lehanăn lŏ bi hrŏ prăk mnga. Bruă anei đru mâo dŭm kdrêč kơ knơ̆ng bruă lehanăn mnuih mă bruă dưi bi hrŏ dŭm klei dleh dlan.

“Knơ̆ng bruă ngăn prăk bruă lŏ hma đru kơ knơ̆ng bruă bi hrŏ hĕ prăk mnga, bi hrŏ jih jang prăk mnga kơ dŭm klei lĭng čan. Mơ̆ng 9,5 truh kơ 9% dưi bi hrŏ truh kơ 8,5 lehanăn 7,5 lehanăn 6,5, kyuanăn dưi bi hrŏ mơh klei ktrŏ prăk mnga bruă lĭng čan kơ knơ̆ng bruă hlăm 6 mlan akŏ thŭn 2021. Mơ̆ng thŭn 2020 knơ̆ng bruă ngăn prăk mâo leh klei ksiêm dlăng leh anăn bi hrŏ truh kơ jih thŭn 2021. Prăk mnga anăn ăt đru kơ knơ̆ng bruă dưi mgaih msir dŭm klei dleh dlan hlăm hruê mmông leh êgao.”

Đru kơ dŭm anôk bruă sang hră hđeh êngao knŭk  kna

Lê Hồng Phong, jing pô duh bi liê rŭ mdơ̆ng sang hră kơ hđeh điêt Phong Lan ti wăl krah Quảng Phú, kdriêk Čư̆ M’Gar mâo leh 10 thŭn hŏng anei. Mơ̆ng hruê klei ruă tưp bluh đĭ, mâo mmông sang hră kđăl băng truh kơ dŭm mlan. Ară anei hlăm sang hră mâo mă knŏng 70 čô hđeh, hlăm brô 1/4 mkă hŏng yăng đar. 13 čô nai srăng bi mlih nanao hruê mă bruă. Kyuadah anei jing sang hră čŏng pŏk, sơnăn yơh nai mdei mă bruă jing mđrĭng mơh hŏng klei khăt bi hrŏ mơh prăk mlan. Lê Hồng Phong brei thâo: knơ̆ng bruă ñu ăt dưi bi hrŏ prăk mnga lĭng čan mơ̆ng knơ̆ng bruă ngăn prăk:

“Knơ̆ng prăk iêu phung duh mkra hriê lehanăn êmuh kơ si ngă klei dleh dlan? Lehanăn ktrâo kơ phung duh mkra ngă hră hưn mdah. Knơ̆ng bruă ngăn prăk ăt ngă klei găl brei čan hŏng prăk mnga hdjul. Hlăm klei truh msĕ hŏng anei, kâo čiăng knơ̆ng bruă ngăn prăk lŏ bi hrŏ hĭn prăk mnga hlăm wưng klei ruă tưp anei lehanăn lŏ dưi bi tai hruê mmông tla wĭt prăk ana. Tal 2, tơdah dưi mâo klei đru, kâo čiăng lŏ čan sa ênoh prăk dưi tla prăk mlan kơ dŭm čô nai, đru kơ diñu hlăm wưng mâo klei ruă tưp anei. ”

Knơ̆ng prăk Agribank Dưr Dak Lak đru kơ mnuih čan bi hrŏ prăk mnga kyua hmaĭ mơ̆ng klei ruă Covid-19

Nguyễn Quang Vinh, k’iăng khua kiă kriê knơ̆ng bruă ngăn prăk bruă lŏ hma lehanăn mđĭ kyar krĭng ƀuôn sang krĭng dưr čar Dak Lak brei thâo:

“Hlăm 2 thŭn leh êgao mâo klei ruă tưp Covid-19, knơ̆ng bruă ngăn prăk Agribank krĭng dưr čar Dak Lak đru leh kơ dŭm čô čan lĭng dưi mgaih msir dŭm klei dleh dlan lehanăn krŭ wĭt bruă mnia mblei msĕ si: bi tai hruê mmông tla prăk, amâo mă prăk mnga lehanăn amâo bi mlih êpul lĭng čan jing 2.277 čô mnuih hŏng ênoh prăk 451 êklai prăk. Brei čan mă prăk mnga hdjul hŏng ênoh prăk 735 êklai prăk, hŏng ênoh leh brei čan jing 337 êklai prăk. hlăm anăn mâo 19 knơ̆ng bruă hŏng ênoh prăk brei čan 144 êklai prăk. Bi hrŏ prăk mnga kơ dŭm čô čan mơ̆ng sui mơ̆ng 1 truh 3%. Mơ̆ng hruê mâo klei ruă tưp Covid-19 truh kơ ară anei, Agribank krĭng dưr čar Dak Lak dưi bi leh hră mơar kơ 31.500 čô mnuih hŏng ênoh prăk čan jing 16.320 êklai prăk. Agribank krĭng dưr čar Dak Lak đru leh kơ dŭm čô lĭng čan dưi găn dŭm klei dleh dlan, hơĭt bruă mkra mjing lehanăn mđĭ kyar bruă duh mkra. ”

Pô mblang: Y-Ƀel Êban