VOV4.Êđê- Dak Lak ăt mkŏ mjing klei bi lông mŭt adŭ 10 hlăm dŭm sang hră gưl hŏng 4 mta klei hriăm Ngữ văn, Toán, Ngoại ngữ lehanăn mta hriăm thơ̆ng. Wưng thŭn hriăm 2021-2022, čar Dak Lak srăng mkŏ mjing klei bi lông mŭt adŭ 10 hŏng 2 sang hră gưl 3 thơ̆ng mjuăt bi hriăm phung hđeh thâo jing: sang hră sang hră gưl 3 thơ̆ng mjuăt bi hriăm phung hđeh thâo Nguyễn Du lehanăn sang hră gưl 3 kơ phung hđeh mnuih djuê ƀiă Nơ Trang Lơng. Dŭm sang hră mơ̆ng khua knŭk kna mkăn srăng dưn yua klei hrŏng ruah. Srăng ngă klei bi lông hlăm 2 hruê 8 lehanăn 8-9/6/2021. Tui hluê anăn, hlăm aguah, dŭm čô hđeh srăng bi lông mta Ngữ Văn lehanăn tlam, phung hđeh srăng bi lông mta Ngoại Ngữ. Bi kơ hruê 9/6, aguah srăng bi lông mta hriăm Toán lehanăn tlam bi lông kơ mta hriăm thơ̆ng. Sơnăn, čar Dak Lak ăt ngă klei bi lông hlăm hruê mmông bi êdah leh mơ̆ng êlâo. Čiăng kơ klei bi lông mŭt adŭ 10 mâo klei êđăp ênang, kpă ênô lehanăn djŏ hdră êlan, knơ̆ng bruă mtô mjuăt lehanăn sang hră mơar mtă kơ dŭm čô knuă druh, phung nai mtô, phung mă bruă hlăm sang hră mđĭ hĭn bruă klam pô, mâo klei kpă, ngă jăk klei mprăp kơ mnơ̆ng dhơ̆ng yua hlăm klei bi lông, dŭm anôk mâo klei bi lông rơ̆ng kjăp dŭm klei êđăp ênang hlăm bruă gang mkhư̆ klei ruă tưp Covid-19.

Pô mblang: H’Nêč Êñuôl