VOV4.Êđê- Ti anăp klei dleh ktuê dlăng mơ̆ng klei ruă Covid-19 leh phung tưp hlăm êpul êya lŏ dơ̆ng đĭ, tlam 25-8, Knơ̆ng bruă sang čư̆ êa čar Dak Lak mâo Hră mơar mrô 8118 kơ bruă ba yua Asăp mtrŭn mrô 16 mơ̆ng Khua knŭk kna hŏng ƀuôn prŏng Ƀuôn Ama Thuôt leh anăn kdriêk Krông Ƀuk mơ̆ng 6 mmông tlam hruê 26 mlan 8 êla truh mâo klei hâo hưn mrâo.

Hluê anăn, Knơ̆ng bruă sang čư̆ êa čar Dak ;ak jao kơ Khua gĭt gai Knơ̆ng bruă sang čư̆ êa  ƀuôn prŏng Ƀuôn Ama Thuôt leh anăn kdriêk Krông Ƀuk pral bi mklă dŭm boh phŭn čiăng êdi čiăng hyuă kjăp rơ̆ng kơ bruă dang mkhư̆ klei ruă tưp tŭ dưn hĭn. Jao kơ Knơ̆ng bruă sang čư̆ êa  ƀuôn prŏng Ƀuôn Ama Thuôt pral ba yua dŭm ênoh bi liê djŏ hdră bhiăn mơ̆ng prăk alŭ wăl pŏk ngă klei ksiêm mkă pral kman Sars-Cov-2 kơ mnuih ƀuôn sang ti ƀuôn prŏng čiăng bi ktlah phung F0 hlăm êpul êya. Tal anei, ƀuôn prŏng lŏ dơ̆ng mbha hră nao sang mnia, srăng hyuă kjăp hĭn bruă ktuê dlăng čiăng mkhư̆ mnuih ƀuôn sang kbiă kơ êngao.

Pô mblang: H’Zawut Ƀuôn Yă