VOV4.Êđê- Tlam hruê 4/5, anôk gĭt gai bruă gang mkhư̆ klei ruă tưp Covid-19 kdriêk Čư̆ Mgar, čar Dak Lak mâo leh săp mtrŭn mjêč truh kơ dŭm anôk bruă djŏ tuôm kyua mâo sa čô mnuih mâo klei bi knăl msĕ hŏng klei ruă tưp Covid-19. Tui hluê săp mtrŭn mnuih anei mâo klei nao hưn hŏng bruă mdrao mgŭn jing wĭt mơ̆ng ƀuôn prŏng Đà Nẵng. Mnuih anei mâo dŭm klei bi knăl kơ klei ruă tưp Covid-19 msĕ si: mtŭk, êngoh hlơr, blĕ êa dŭng… leh mâo mă klei anei, mâo leh klei mă, mkă kman mơĭt kơ anôk bruă ksiêm mkă kman Lăn Dap Kngư čiăng ngă klei ksiêm mkă lehanăn dôk guôn boh tŭ dưn. Ară anei mnuih anei dôk ti anôk bi ktlah ti khoa Nhiễm, anôk bruă drao mgŭn kdiêk Čư̆ Mgar. Leh mâo klei mrâo kơ klei đing kơ sa čô anei mâo klei ruă tưp Covid-19, dŭm êpul êya djŏ tuôm nao ngă leh bruă mdjiê kman ti anôk bruă mdrao mgŭn wăl krah Êa Pôč, sang mdei Tứ Quý, sang êdeh Toàn Thông lehanăn bi ktlah lu mnuih tuôm jĕ giăm hŏng pô ti dlông.

Pô mblang: Y-Khem Niê