VOV4.Êđê- Hlăm wưng êgao, ti čar Dak Lak mâo leh 82 klei iêu đĭng blŭ brei tla prăk pui mơ̆ng mnuih ƀuôn sang, amâo dah brei bi mklă ksiêm dlăng bruă tlĕ yua pui kmlă… Klei mâo nanao dŭm klei iêu đĭng blŭ čiăng mă prăk leh anăn arưp khăt klei pui ngă kơ lu mnuih huĭ hyưt. Anôk bruă djŏ tuôm mâo klei hưn brei mnuih ƀuôn sang thâo răng hŏng klei iêu đĭng blŭ duah mplư čiăng đăm lĕ hlăm klei mplư.

Trần Văn Nho dôk ti sang mrô 447 êlan Lê Duẩn, ƀuôn hgŭm Êa Tam, ƀuôn prŏng Ƀuôn Ama thuôt, brei thâo, mlan 6 leh êgao, ñu mâo mă đĭng blŭ mrô amâo tuôm thâo kral ôh, brei ñu tĭng pla prăk pui êbeh 370 êbâo prăk. Kyua tuôm ba jao leh ênoh prăk pui snăn ñu mâo klei đing, lehanăn iêu kơ anôk phŭn pui kmlă čiăng bi klă boh klei anei, snăn thâo anei jing klei duah mplư:

“Diñu lač gŏ sang kâo dôk đuôm nư prăk pui kmlă, lehanăn brei tĭng tla yơh êlâo 4 h tlam čiăng tlaih tuôm hŏng klei khăt pui kmlă. Kâo êmuh ară anei si srăng tla, snăn diñu bi lač, leh mâo tŭ mă klei čih mơĭt hlăm đĭng blŭ snăn gư̆ ti anăn sa êlan link čiăng hưn pŏk mrô hgăm pô srăng mâo mtam klei ktrâo atăt hdră bi tĭng tla. Kâo ƀuh đing kơ klei anei, mâo klei amâo mâo djŏ snăn kâo mdjiê mtam đĭng blŭ. Lehanăn kâo iêu kơ anôk phŭn pui kmlă hlue mrô 19001909 čiăng hưn lehanăn êmuh, snăn mâo mnuih nah dih lač anăn jing klei duah mplư leh”.

Dŭm mrô đĭng blŭ iêu leh kơ mnuih ƀuôn sang ti Dak Lak čiăng mplư

Ăt mâo mă klei iêu đĭng blŭ brei tla prăk pui msĕ djuê anăn mơh, hŏng Trương Văn Sơn, dôk ti alŭ mrô 11, să Hoà Phú, ƀuôn prŏng Ƀuôn Ama Thuôt, mblang:

“Gŏ sang kâo mâo mơh mlan ka yŏng hmao tla ênŭm ôh prăk pui, snăn mâo mtam đĭng blŭ iêu mtă lač brei tla prăk pui. Leh kơ anăn gŏ sang hmei nao tla hĕ mtam, êdei kơ anăn lŏ hmư̆ mơh akâo brei tla prăk pui mơh, lehanăn dlăng kơ mrô đĭng blŭ anei ñu mdê. Snăn gŏ sang hmei êmuh knơ̆ng bruă pui kmlă, lač hmei ba jao leh lah prăk pui lah si ngă lŏ iêu kơ hmei hŏng mrô hmei amâo tuôm thâo kral ôh”.

Tui si anôk bruă dlăng kriê mnuih yua pui kmlă Kwar krah, mơ̆ng mlan 5 truh kơ ară anei, ti čar Daklak mâo leh 82 klei phung ƀuôn sang tuôm hŏng klei arăng iêu đĭng blŭ mơ̆ng mrô amâo tuôm thâo kral ôh, čŏng hưn lač diñu jing mnuih ngă bruă hlăm anôk bruă pui kmlă, mta brei tĭng tla yơh prăk pui, amâodah diñu lač diñu jing mnuih mơ̆ng anôk bruă kahan ksiêm kiă kriê klei mnuih yua pui tlă pui kmlă... Mnuih iêu đĭng blŭ brei bi tĭng pla prăk pui mtam amâodah lŏ bi klă klei anei, tơdah hơăi srăng khăt pui kmlă mtam. Mâo đa đa klei diñu ktrâo brei hdră kơ mnuih yua pui ngă tui si klei diñu ktrâo hŏng êlan link čih hluê êlan mơĭt klei čih.

Brei mnuih ƀuôn sang thâo răng sĭt hmư̆ mrô đĭng blŭ amâo thâo kral

Leh bi klă, knơ̆ng bruă pui kmlă Daklak lač anei jing jih jang klei duah mplư, lu mrô diñu amâo mâo djŏ jing mrô Việt Nam ôh. Jih jang klei iêu anei kñăm mplư mnuih yua pui, čiăng tlĕ mă jih jang ênoh hưn prăk kăk mâo hlăm đĭng blŭ, amâodah ênoh ngăn prăk mâo hlăm knơ̆ng prăk diñu čiăng tlĕ... Snăn mtă kơ jih jang phung ƀuôn sang brei mâo klei răng tơdah mă tŭ đĭng blŭ iêu akâo tla prăk pui anăn jing klei duah mplư, Hà Văn Chương; K’iăng khua knơ̆ng bru pui kmlă Daklak, lač:

“Knơ̆ng brua pui klă Daklak mtă truh kơ mnuih yua pui kmlă: Tal êlâo jing knŏng bi nao tĭng tla prăk pui kmlă hlăm anôk kreh tĭng tla, amâodah mơ̆ng êpul hiu hrui prăk pui mưng ngă leh mơ̆ng dŭm mlan êlâo anăn. Tal dua, brei jih jang mnuih yua pui mâo brei răng đăm duah hưn ôh ya mta ênoh ênil pô mâo hŏng phung pô amâo tuôm thâo kral ôh. Tal 3, jing jih jang ênoh pô mâo hlăm bruă pui kmlă knŏng kăp bi hâo hưn hŏng êlan mơ̆ng anôk bruă pui kmlă đuič mâo leh mơ̆ng êlâo dih truh kơ ară anei, amâo tuôm duah iêu hŏng đĭng blŭ msĕ snăn ôh, tơdah mnuih yua pui kmlă mâo klei mjêč ciăng thâo săng, snăn iêu kơ anôk bruă dlăng kriê mnuih yua pui hŏng mrô 19001909 pioh anôk bruă pui kmlă srăng đru”.

Wưng leh êgao, klei duah bi mplư hŏng êlan đĭng blŭ mâo leh lu ti dŭm alŭ wăl hlăm kluôm ala. Dŭm klei duah iêu hŏng mrô amâo mâo tuôm duah thâo kral, jing diñu yua sim amâo mâo djŏ klei bhiăn, amâodah diñu yua phần mềm tự động. Anei jing mnê̆č duah mplư hŏng kdrăp mrâo mrang lehanăn klei duah mplư djuê anăn ka thâo jih ôh. Kyuanăn, brei jih jang mnuih yua pui mâo klei răng mơ̆ng dŭm klei duah iêu lačdah akâo tlă prăk pui... amâo mâo djŏ knŏng prăk pui kmlă đuič ôh, ƀiădah kreh lŏ tuôm hŏng lu mta hdră mkăn diñu ngă kñăm čiăng duah mplư lehanăn plah mmiă ngăn dŏ mnuih mkăn./.

Pô mblang: Y-Khem Niê