VOV4.Êđê- Giăm 2 thŭn êgao, lu phung hđeh mâo klei hdĭp dleh dlan ti dŭm sang hră krĭng taih kbưi hlăm alŭ wăl kdriêk Čư̆ Mgar mâo tŭ mă leh sa hdră jăk êdi mâo anăn “Knơ̆ng bruă mkăp mjeh bê”. Anei jing bruă mâo Êpul hgŭm Kyua phung hđeh khăp h’iêng (mơ̆ng Êpul hgŭm bruă Đội kdriêk Čư̆ Mgar) bi hgŭm lehanăn hluê ngă kñăm đru kơ phung hđeh ƀun, đru sa kdrêč čiăng kơ phung hđeh gĭr ktưn kpưn đĭ kyar klei hdĭp mda.

Grăp aguah ưm, adei Đặng Viết Mạnh, hđeh sang hră adŭ 7A, sang hră gưl 2 Ngô Mây să Ea Mdroh, đru kơ amĭ amai khăt hla kyâo, wiă rơ̆k kơ giăm 10 drei bê. Adei lač, mâo dŭm drei bê anei kyua êlâo dih mâo 2 drei bê mơ̆ng êpul hgŭm đội kdriêk Čư̆ Mgar mđup brei hlăk mlan 5 thŭn 2020. Giăm 2 thŭn răng kriê mâo klei đĭ kyar, ară anei gŏ sang adei dưi mă čhĭ lehanăn blei mnơ̆ng ƀơ̆ng huă grăp hruê lehanăn tla prăk hriăm kơ 4 čô amai adei hlăm wưng kčưm thŭn hriăm mrâo.

Mơ̆ng ară anei truh kơ yan mnga, bê lŏ dơ̆ng mđai 2 truh kơ 3 drei êđai, mâo yơh pluh drei bê. Amĭ ama čhĭ leh ƀiă čiăng blei braih, hdruôm hră mơar lehanăn tla prăk hriăm kơ 4 čô amai adei.”

Phung hđeh sang hră ƀun ti kdriêk Čư̆ Mgar dưi mđup brei 2-3 drei bê mjeh, mâo ênoh mơ̆ng 8 -10 êklăk prăk

Ăt msĕ hŏng anăn, adei Bàn Minh Kiệt hđeh sang hră adŭ 7C, sang hră gưl 2 Ngô Mây, să Ea M’Droh ăt mâo klei mkăp brei 3 drei bê mjeh mơ̆ng êpul hgŭm bruă đội kdriêk Čư̆ Mgar hlăk mlan 3 thŭn 2020. Truh kơ ară anei, gŏ sang adei răng kriê lehanăn mâo êđai truh leh 13 drei, mâo ênoh giăm 100 êklăk prăk.

Tui si Lý Văn Chòi jing Ama adei Kiệt, leh mâo bê mjeh, êngao đru kơ gŏ sang mâo klei găl rông mnơ̆ng mđĭ kyar bruă duh mkra, tlaih mơ̆ng klei ư̆ êpa, knap mñai, lŏ hdơ̆ng đru kơ phung anak hlăm sang mâo klei thâo săng đru ngă bruă, mâo klei kreh kriăng mă bruă knuă.

“Phung anak adôk ti sang kăn mâo bruă mă leh, mâo bê mjeh anei, diñu ăt hnêč nao mă hla tơrô, wiă rơ̆k čiêm bê đru kơ amĭ ama. Bruă nao ngă bruă msĕ sơ năn đru kơ phung hđeh mâo klei thâo săng hĭn kyua thâo kral êla mmông hriăm hră, êla mmông đru kơ amĭ ama. Êdei dih jing mnuih tŭ jăk kơ yang ƀuôn.”

Leh 2-3 thŭn rông mnơ̆ng, dŭm gru hmô rông bê dưi đĭ kyar êpul truh 10-15 drei

Nai Mai Văn Chuyền, khua kiă kriê bruă đôị sang hră gưl 2 Ngô Mây, să Ea M’droh, kdriêk Čư̆ M’gar, wưng thŭn hriăm 2019-2020 brei thâo, hdră mkăp “knơ̆ng mkăp bê mjeh” kčưm mrâo mkŏ mjing. Êpul bruă đội iêu mthưr leh klei bi mguôp mơ̆ng phung mâo ai tiê kmah ti ƀuôn prŏng Hà Nội, ƀuôn prŏng Hồ Chí Minh, Đà Nẵng leh anăn dŭm čar krĭng Lăn Dap Kngư čiăng mkŏ mjing hdră mkăp brei bê mjeh kơ dŭm gŏ sang hđeh sang hră dleh dlan brei diñu rông lehanăn mđĭ kyar bruă duh mkra. Mbĭt hŏng anăn, êpul ăt bi mguôp leh hŏng êpul bruă djŏ tuôm, êpul mdrao mgŭn kơ mnơ̆ng rông… đru ngă war rông, tlŏ mgang lehanăn mtô kơ bruă răng kriê bê.

Pia jing knơ̆ng mkăp, kyua dŭm drei bê mjeh amâo brei hlao ôh, knŏng brei maiñ, dlăng kơ bê mjeh msĕ hŏng ênoh prăk mâo êlâo. Tui hluê anăn, grăp gŏ sang phung hđeh sang hră dleh dlan srăng dưi mkăp brei mơ̆ng 2 - 3 drei bê mjeh, mâo ênoh hlăm brô 8-10 êklăk prăk. hlăm wang tlâo thŭn, leh bê mđai mâo lu drei bê, gŏ sang srăng lŏ ba wĭt ênŭm ênoh bê lehanăn boh ktrŏ knar hŏng bê mjeh mă leh êlâo anăn lehanăn lŏ jao kơ gŏ sang hđeh sang hră dleh dlan mkăn.

Leh kơ năn, phung hđeh lŏ dưi đru mjeh bê kơ phung hđeh dleh dlan mkăn ti dŭm să krĭng taih kbưi ti kdriêk Čư̆ Mgar

Ƀuh klă boh tŭ dưn mơ̆ng hdră mkăp anei, êpul bi mguôp Kyua phung adei khăp h’iêng gĭr ktưn ngă bruă iêu mthưr klei đru mơ̆ng phung mâo ai tiê kmah hlăm čar lehanăn êngao čar, tui hluê anăn, ba hdră mkăp truh kơ phung hđeh sang hră dleh dlan hlăm alŭ wăl mkăn hlăm kdriêk Čư̆ Mgar msĕ si: să Ea Kpam, wăl krah Ea Pôč… kyuanăn giăm 2 thŭn hŏng anei, mâo leh 8 êpul bê hŏng ênoh 20 drei bê mjeh mơ̆ng “knơ̆ng mkăp brei bê” dưi mđup brei kơ dŭm gŏ sang mâo klei dleh dlan hlăm alŭ wăl.

“Ară anei, ênoh phung hđeh mâo klei đru jing lu hlăm dŭm să Ea M’Droh, Ea K’pam lehanăn Ea Pôč. Khădah hlăm klei ksiêm dlăng mơ̆ng êpul hgŭm bruă đội kdriêk Čư̆ Mgar, ară anei dôk mâo lu phung hđeh êrĭt êrin, mâo klei hdĭt knap mñai hlăm dŭm să mkăn ti kdriêk Čư̆ mgar čiăng mâo klei đru. Anei jing klei bi hmô jăk lehanăn yuôm bhăn, đru kơ phung adei mâo klei găl mđĭ kyar bruă duh mkra, rông mnơ̆ng dhơ̆ng hlăm gŏ sang. Đru kơ diñu mâo klei thâo săng mă bruă knuă kyuanăn hmei srăng bi lar bruă anei hlăm kluôm kdriêk.”

Bruă iêu mthưr klei bi mguôp bê mjeh mơ̆ng êpul hgŭm bruă đội kdriêk Čư̆ Mgar kơ phung hđeh sang hră krĭng taih kbưi hlăm alŭ wăl kdriêk Čư̆ Mgar jing bruă ngă jăk, klă klơ̆ng. Bruă ngă anei jing djŏ hŏng alŭ wăl krĭng ƀuôn sang, čư̆ čhiăng. Hlăm anăn dưi đru kơ gŏ sang phung hđeh mâo klei găl rông mnơ̆ng dhơ̆ng, bi hơĭt klei hdĭp, boh nik mtô kơ phung hđeh mâo ai tiê kreh kriăng hlăm klei mă bruă knuă lehanăn hriăm hră mơar./.

Pô mblang: Y-Ƀel Êban