VOV4.Êđê- Bruă sang čư êa kdriêk Ea H’Leo, čar Daklak mrâo brei mdei bruă êjai kơ khua bruă sang čư̆ êa lehanăn k’iăng khua bruă sang čư̆ êa să Ea Nam kyua ngơi mang hlăm bruă gang mkhư̆ klei ruă tưp. Yap truh kơ hruê 5/9, kdriêk Ea H’Leo mâo 112 čô mâo klei ruă tưp Covid-19, ti să Ea Nam mâo 73 čô, jing anôk mâo lu mnuih mâo klei ruă tưp ti kdriêk Ea H’Leo. Tui si klei bi mklă mrô 2906 lehanăn 2908, khua bruă sang čư̆ êa kdriêk Ea H’Leo brei mdei bruă êjai kơ khua bruă sang čư̆ êa să Ea Nam Nguyễn Văn Nhiệm lehanăn k’iăng bruă sang čư̆ êa Kpă Y Chức wưng păn bruă 2021-2026. Hruê mmông brei mdei bruă jing 15 hruê čiăng ksiêm dlăng, bi klă bruă klam mơ̆ng pô djă akŏ hlăm bruă gang mkhư̆ klei ruă tưp Covid-19 hlăm alŭ wăl să Ea Nam. Să Ea Nam lui mnuih ƀuôn sang mkŏ mjing klei dơr Djiê, dôk lu mnuih, ngă soh hŏng asăp mtrŭn mrô 15 mơ̆ng khua knŭk kna, ngă tưp lar klei ruă hlăm êpul êya yang ƀuôn. Hlăm hruê mmông brei mdei bruă, khua bruă sang čư̆ êa să Ea Nam Nguyễn Văn Nhiệm mâo bruă klam jao jăp bruă kơ Nguyễn Văn Tiến, k’iăng khua bruă sang cư̆ êa să.

Pô mblang: Y-Ƀel Êban