VOV4.Êđê - Bruă sang čư̆ êa kriêk Krông pač, čar Dak Lak brei mdei bruă êjai hŏng sa čô khua kiă kriê bruă sang čư̆ êa să Vụ Bổn kyua ngă ngơi mang lui klei ruă tưp lar hlăm yang ƀuôn. Tui hluê anăn, Trần Văn Sáu, khua kiă kriê bruă sang čư̆ êa să Vụ Bổn srăng mdei ngă bruă 15 hruê mơ̆ng hruê 10/8 truh kơ hruê 24/08/2021. Boh phŭn brei pô anei mdei bruă êjai kyua amâo hmao mâo klei gĭt gai hlăm bruă gang mkhư̆ klei ruă tưp Covid-19, lui truh kơ bruă dôk bi ngi lu mnuih lehanăn klei bi ktlah ti sang amâo kjăp ôh, lui klei ruă tưp lar hlăm yang ƀuôn. Yap truh kơ tlam hruê 10/8, să Vụ Bổn mâo 2 anôk mâo klei ruă tưp ti alŭ 6 lehanăn alŭ 7 hŏng 19 čô mnuih ruă. Hlăm anăn, ti alŭ 7 mâo 16 čô. Ênoh mnuih mâo klei ruă tưp Covid-19 hlăm hruê 10/8 ngă truh kơ ênoh mnuih mâo klei ruă tưp Covid-19 ti kdriêk Krông Pač đĭ hmar, dôk tal 3 hlăm čar Dak Lak, ară anei, dŭm anôk bruă dôk ngă klei kwang dar, tui duah pô djŏ tuôm, ksiêm mkă kman lehanăn ngă dŭm hdră êlan bruă mdrao mgŭn čiăng dưi ksiêm dlăng klei ruă tưp Covid-19 ti să Vụ Bổn.

Y Bel pô mblang