VOV4.Êđê- Ƀuôn prŏng Ƀuôn Ama Thuôt srăng hluê ngă hdră bi ktlah yang ƀuôn hluê si Asăp mtrŭn mrô 16 thiăm 7 hruê, mơ̆ng 0h hruê 8/8. Anei jing klei gĭt gai mrâo hĭn mơ̆ng čar Dak lak kơ bruă ba yua hdră bi ktlah yang ƀuôn kñăm gang mkhư̆ klei ruă Covid 19. Hluê si Anôk bruă sang čư̆ êa čar Dak Lak, leh 14 hruê pŏk ngă Asăp mtrŭn mrô 16 mơ̆ng Khua knŭk kna ti alŭ wăl ƀuôn prŏng Ƀuôn Ama Thuôt lehanăn kdriêk Čư̆ Kuiñ, hdră ksiêm dlăng klei ruă Covid 19 mâo leh klei bi knăl jăk. Hŏng kdriêk Čư̆ Kuiñ, khădah ênoh mnuih djŏ kman Sar CoV2 đĭ ƀiădah lu jing hlăm anôk bi ktlah lehanăn krĭng kwang dar.

Ti alŭ wăl ƀuôn prŏng Ƀuôn Ama Thuôt, ăt mâo dŭm čô ruă ka thâo bi mklă phŭn agha bi mtưp, brei lŏ mđĭ hdră tui duah lehanăn ksiêm mkă dlăng kman hlăm lu anôk. Kyua anăn, Anôk bruă sang čư̆ êa čar Dak Lak bi mklă, prŏng Ƀuôn Ama Thuôt srăng lŏ hluê ngă Asăp mtrŭn mrô 16 mơ̆ng Khua knŭk kna 7 hruê dơ̆ng mơ̆ng 0h hruê 8/8 truh kơ jih hruê 14/8 thŭn 2021. Hŏng kdriêk Čư̆ Kuiñ, mơ̆ng 0h hruê 8/8 srăng hluê ngă Asăp mtrŭn mrô 15 mơ̆ng Khua knŭk kna hlăm 14 hruê./.

Pô mblang: H’Nêč Êñuôl