VOV4.Êđê - Hlăm 2 hruê 17 lehanăn 18/7, čar Dak Lak leh mâo lu mnuih mâo klei ruă tưp Covid-19. Hyưt kơ bruă kƀah mnơ̆ng ƀơ̆ng huă hlăm hruê mmông ngă klei bi kƀưi yang ƀuôn tui si hdră mtrŭn mrô 15 mơ̆ng knŭk kna, kyuanăn mnuih ƀuôn sang ti ƀuôn prŏng Ƀuôn Ama Thuôt nao blei lu mnơ̆ng dhơ̆ng pioh, ngă kơ ênoh dŭm mnơ̆ng dhơ̆ng hlăm sang mnia đĭ êgao hnơ̆ng. Đoàn Ngọc Thượng, k’iăng khua bruă sang čư̆ êa ƀuôn prŏng Ƀuôn Ama Thuôt brei thâo: Ƀuôn prŏng mâo leh hdră êlan đru mnơ̆ng ƀơ̆ng huă lehanăn mnơ̆ng yua mjêč kơ mnuih ƀuôn sang. Êngao kơ anăn, ƀuôn prŏng mprăp leh dŭm hdră êlan bi kna, bi hluh êlan ba mnơ̆ng dhơ̆ng čiăng kơ mnuih ƀuôn sang dưi nao blei, amâo uêñ kơ bruă kƀah mnơ̆ng dhơ̆ng. Čiăng dưi mâo ênŭm mnơ̆ng yua kơ mnuih ƀuôn sang, sang mnia mblei prŏng Co.opmart Ƀuôn Ama Thuôt mâo leh hdră êlan mkăp pioh dŭm mta mnơ̆ng dhơ̆ng msĕ si: braih, dŭm mta ƀung hdang krô, mnơ̆ng bi mƀăt, mnơ̆ng ƀơ̆ng hlăm atŏ ƀuăt lehanăn dŭm mta mnơ̆ng ƀơ̆ng bi êăt. Mbĭt anăn rơ̆ng mâo dŭm mnơ̆ng ƀơ̆ng msĕ si: kđeh čim, kan, djam mtam, boh kroh dŭm mta.

 Anôk bruă kriê dlăng anôk čhĭ mnia Dak Lak ngă hră mơar đŭ bi kmhal sa sang mnia Bách Hoá Xanh ti êlan Ngô Quyền, ƀuôn hgŭm Tân An, ƀuôn prŏng Ƀuôn Ama Thuôt kyua ngă soh klei čhĭ mnia amâo hơĭt ênoh leh anăn čhĭ yuôm hĭn soh hŏng kčah mtrŭn hlăm yan klei ruă tưp. Êpul bruă djŏ tuôm ngă leh hră mơar čiăng msir mgaih hluê si klei kčah mtrŭn. Hlăm wưng anei, ti lu sang mnia mâo lu mnuih ƀuôn sang blei mkăm pioh mnơ̆ng dhơ̆ng čiăng gang mkhư̆ klei ruă Covid-19, kyua klei mĭn huĭ hin mnơ̆ng dhơ̆ng hlăm wưng bi ktlah yang ƀuôn hluê si Asăp mtrŭn mrô 15 mơ̆ng Knŭk kna. Anôk bruă kriê dlăng anôk čhĭ mnia čar Dak Lak mâo leh hră mơar mtă kơ dŭm anôk bruă hyuă kjăp bruă ksiêm dlăng, ktuê dlăng amâo brei mâo klei mkăm pioh, mđĭ ênoh mnơ̆ng dhơ̆ng yua aguah tlam.

Y Ƀel, H Zawut pô mblang