VOV4.Êđê - Yang hruê 9-8, čar Dak Lak mkŏ mjing leh êpul nao drông 478 čô mnuih mơ̆ng ƀuôn prŏng Hồ Chí Minh wĭt kơ alŭ wăl čiăng ñĕ kơ klei ruă tưp. Anei jing gưl tal êlâo Dak Lak ba êpul nao hlăm krĭng mâo klei ruă tưp drông mnuih ƀuôn sang pô wĭt.

478 čô wĭt tal anei hlăm phung dưi mđing tal êlâo msĕ si: phung khua thŭn, hđeh điêt, phung mniê ba tian, phung mniê dôk rông anak điêt ti gŭ 36 mlan, phung nao ksiêm mkă klei ruă, nao čuă găp djuê, nao mă bruă ka dưi lŏ wĭt, phung dôk dưn hdră êlan đru hlăm grăp mlan, găp djuê nao hŏng hđeh điêt ti gŭ 10 thŭn… mâo klei čiăng wĭt kơ ƀuôn sang. 

Mnuih ƀuôn sang dưi drông wĭt brei mâo hră ksiêm mkă pral amâo mâo ôh klei ruă Covid-19. Leh wĭt ti alŭ wăl, tui hluê kdriêk mnuih ƀuôn sang anăn dôk srăng bi ktlah hjăn sa anôk ti kdriêk anăn hlăm 14 hruê leh anăn lŏ dơ̆ng bi ktlah hjăn ti sang 7 hruê. 22 boh êdeh nao drông mnuih wĭt tal anei mâo Êpul grup Phương Trang đru jih prăk bi liê dŭ mdiăng.

H Zawut pô mblang