VOV4.Êđê - Čiăng đru kơ mnuih ƀuôn sang dleh dlan kyua klei ruă Covid-19, dŭm hruê êgao, lu anôk bruă leh anăn dŭm êpul hgŭm ti čar Dak Lak pŏk ngă leh dŭm mta bruă knưng mnơ̆ng amâo mă prăk. Ti krah yan klei ruă tưp, dŭm hnư mnơ̆ng amâo mă prăk đru leh kơ mnuih ƀuôn sang lŏ mâo thiăm mnơ̆ng ƀơ̆ng huă grăp hruê.

Leh nao jŭm dar dŭm anôk čhĭ mnia hlăm “Siêu thị mini hŏng ênoh 0 prăk”, Aduôn Đoàn Thị Xuân Đào, ti alŭ 2 ƀuôn hgŭm Tân Lợi, ƀuôn prŏng Ƀuôn Ama Thuôt, čar Dak Lak čuăn ruah blei leh kơ pô dŭm mta mnơ̆ng yua msĕ si: Braih, hbâo bi mƀăt, sĭk, êa msĭn, êa prăi, mnơ̆ng ƀơ̆ng hlăm tŏ lehanăn dŭm mta djam mtam mkăn. Aduôn Đoàn Thị Xuân Đào brei thâo, gŏ sang ñu jing gŏ sang ƀun ƀin, ung ñu mrâo djiê kyua klei ruă asei mlei, hjăn ñu dôk rông 2 čô anak điêt nao sang hră mơar. Čiăng mâo prăk yua grăp hruê, Aduôn Đào kreh nao čhĭ mnơ̆ng ti sang mnia, ƀiădah giăm leh sa mlan ñu dôk kơ sang čiăng gang mkhư̆ klei ruă tưp. Leh ƀuôn hgŭm mbha hră nao blei mnơ̆ng ti siêu thị 0 prăk, ñu ƀuh mâo klei mơak sơnăk. “Lač jăk êdi kơ hdră êlan anei dưi đru leh kơ kâo hlăm wưng mâo klei ruă tưp, kyua amâo dưi nao mă bruă ôh, mâo thâo duah prăk, kyuanăn, hdră êlan anei dưi đru kơ kâo mdul sa kdrêč dleh dlan hlăm klei hdĭp.”

“Siêu thị hŏng ênoh 0 prăk” jing sa hdră mơ̆ng bruă Đoàn čar Dak Lak, êpul hgŭm phung mniê čar bi mguôp hŏng knơ̆ng bruă kông mah, boh tâo yuôm Phú Nhuận (PNJ) mâo anôk ngă bruă krĭng Lăn Dap Kngư - krĭng dhŭng kwar krah mbĭt hŏng dŭm anôk bruă mkŏ mjing, kñăm čiăng đru kơ mnuih ƀuôn sang mâo klei hdĭp dleh dlan, gŏ sang ƀun ƀin lehanăn giăm ƀun ƀin. Hlăm siêu thĭ anăn mâo giăm 40 mta mnơ̆ng dhơ̆ng yua jing mnơ̆ng mjêč, mnơ̆ng ƀơ̆ng huă lehanăn djam mtam dŭm mta.

Hlăm hră anăn dưi hưn mdah mơ̆ng dŭm ƀuôn hgŭm, să ti ƀuôn prŏng Ƀuôn Ama Thuôt, êpul mkŏ mjing bruă anei dưi mbha leh 500 “pŏk hră klei khăp” kơ dŭm gŏ sang dôk hlăm klei dleh dlan, grăp pŏk hla anăn mâo ênoh 300 êbâo prăk. mơ̆ng hruê 14 - 17/8, mơ̆ng 7 mmông krah aguah truh kơ 5 mmông tlam grăp hruê, mnuih ƀuôn sang dưi yua hră anei lehanăn blei dŭm mta mnơ̆ng pô čiăng. Ayŏng Võ Chí Nhân khua êpul Marketing, knơ̆ng bruă kông mah, boh tâo yuôm Phú Nhuận (PNJ) brei thâo, êpul mkŏ mjing bruă anei duh bi liê leh 180 êklăk prăk čiăng blei dŭm mta mnơ̆ng mơ̆ng dŭm siêu thĭ prŏng hŏng ênoh djŏ, lehanăn anăn ba čhĭ dŭm mta anei hlăm siêu thị mini 0 prăk. Mnuih ƀuôn sang dưi čuăn ruah dŭm mta mnơ̆ng mâo ênôh amâo êgao 300 êbâo, čiăng dưi mâo ênŭm mnơ̆ng dhơ̆ng hŏng ênoh hră dưi mbha leh. Mbĭt hŏng anăn, di ñu mâo klei dưi lŏ ruah thiăm dŭm mta djam mtam tui si pô čiăng. “Dŭm mta mnơ̆ng thơ̆ng hlăm siêu thị jing mâo păt čiăng ênŭm, hlei mâo bruă čiăng mjêč srăng čuăn ruah dŭm mta anăn yơh, hmei amâo ngă ôh bruă đung hruh mnơ̆ng thơ̆ng hŏng ênoh 300 êbâo prăk, ƀiădah brei diñu mâo klei êngiê brei diñu ruah dŭm mta diñu čiăng, msĕ si diñu nao siêu thị yăng đar mơh. Bi hŏng kâo, ƀuh hră hŏng ênoh 300 êbâo jing ƀiă, ƀiădah hriê kơ siêu thị anei diñu srăng dưi blei lu mnơ̆ng hĭn hŏng ênoh 300 êbâo, kyua hlăm klei ngă bruă mơ̆ng Metro lehanăn Co.Op, di ñu lui kơ pô ênoh êlưih, kyuanăn ênoh lŏ čhĭ jing êlưih mơh.

Tui si ayŏng Trần Doãn Tới, k’iăng khua kiă kriê bruă Đoàn čar Dak Lak, mbĭt hŏng siêu thị mini 0 prăk, hruê mmông leh êgao, êpul hđeh êdam êra čar Dak Lak ăt dưi ngă leh lu hdră êlan tui si klei bi hmô hŏng ênoh 0 prăk msĕ si siêu thị thâo ba mđuê̆, êdeh dŭ mdiăng hŏng ênoh 0 prăk, bur 0 prăk, anôk chĭ mnia 0 prăk…Kñăm đru kơ dŭm čô mâo klei dlei dlan lehanăn dŭm êpul mnuih êdu awăt mâo klei hmăi klă kyua klei ruă tưp Covid-19. Khă dah anei jing klei iêu mdê, ƀiădah dŭm hdră êlan jing čiăng đru mnơ̆ng yua mjêč hlăm klei ƀơ̆ng huă grăo hruê kơ mnuih ƀuôn sang. Mbĭt hŏng bruă đru lăm dŭm anôk mnia mblei anăn, dŭm êpul êya ngă bruă lŏ mkŏ mjing êpul shipper nao ba mnơ̆ng thơ̆ng truh kơ dŭm anôk bi ktlah, čuăl krĭng. “Leh siêu thị mini hŏng ênoh 0 prăk gưl anei ti ƀuôn prŏng Ƀuôn Ama Thuôt, hmei srăng lŏ mkŏ mjing dŭm anôk mkăn hlăm dŭm alŭ wăl mâo klei dleh dlan hlăm čar. Lehanăn bi kơ dŭm čô mnuih mâo klei dleh dlan, mâo klei hmăi klă anăp kyua klei ruă tưp Covid-19, amâo mâo ôh klei găl dưi truh ti anôk čhĭ mnơ̆ng dhơ̆ng, srăng mâo êpul shipper srăng ba truh ti sang diñu čiăng mâo klei mđĭ ai lehanăn mâo boh tŭ dưn.”

Mbĭt hŏng bruă mđing kơ mnuih mă bruă êngiê lehanăn mnuih mâo klei ldeh dlan, dôk hjăn, amâo mâo prăk ba wĭt. Mơ̆ng hruê 8/8 leh êgao, bruă sang čư̆ êa ƀuôn hgŭm Thống Nhất, ƀuôn prŏng Ƀuôn Ama Thuôt ăt mkŏ mjing leh siêu thị mini hŏng ênoh 0 prăk ti sang hră gưl sa Lê Hồng Phong. Êngao kơ dŭm mta mnơ̆ng yua mjêč lehanăn djam mtam, ti nei lŏ mâo kđeh čim lehanăn kan mtah. Truih kơ ară anei, hdră êlan anei dưi mkŏ mjing leh gưl mnia blei, hŏng hnơ̆ng 900 hnư mnơ̆ng hŏng ênoh 0 prăk kơ mnuih ƀuôn sang ti 9 să, ƀuôn hgŭm hlăm ƀuôn prŏng Ƀuôn Ama Thuôt.

Aduôn Trịnh Như Ngọc, khua bruă sang čư̆ êa ƀuôn hgŭm Thống Nhất, ƀuôn prŏng Ƀuôn Ama Thuôt, čar Dak Lak brei thâo, grăp hnư mnơ̆ng mâo ênoh msĕ sơăi, čiăng mnuih ƀuôn sang dưi ruah dŭm mta pô čiăng. Êngao kơ anăn, mnuih ƀuôn sang dưi lŏ čuăn ruah dŭm mta mnơ̆ng mjêč mkăn mâo hlăm siêu thị. Mơ̆ng hruê kčưm ngă bruă truh kơ ară anei, siêu thị hŏng ênoh 0 prăk dưi mâo leh lu klei uêñ mĭn, bi mguôp mơ̆ng lu anôk bruă, pô mâo ai tiê kmah hŏng ênoh prăk giăm 200 êklăk prăk lehanăn giăm 5 tôn djam mtam dŭm mta. Mơ̆ng ênoh klei bi mguôp anei, siêu thị srăng dưi rơ̆ng klei ngă bruă truh kơ jih hruê mmông ngă klei bi kbưi yang ƀuôn tui si hdră mtrŭn mrô 15 mơ̆ng khua knŭk kna.  “Mâo leh lu mnuih mâo ai tiê kmah mâo klei uêñ mĭn lehanăn hriê truh ti nei čiăng bi mguôp, bi đru bi mdul dŭm klei ldeh dlan kơ mnuih ƀuôn sang, kyuanăn yơh, hmei mâo klei đăo knang mơ̆ng jih jang mnuih mâo ai tiê kmah đru mguôp lu mta mnơ̆ng yua mjêč, mnơ̆ng ƀơ̆ng huă, čim kan, prăk kăk čiăng kơ hmei dưi mkŏ mnjing hră êlan hŏng klei jăk hĭn, ba truh dŭm hnư mnơ̆ng kơ phung mnuih dôk čiăng, hmei čiăng đru sa kdrêč hlăm klei dleh dlan hlăm wưng anei hŏng diñu.”

Hŏng boh tŭ dưn “Sa kpăt êjai êpa msĕ hŏng sa hruh leh trei”, dŭm hnư mnơ̆ng mơ̆ng dŭm siêu thị hŏng ênoh 0 Prăk dưi đru leh kơ mnuih ƀuôn sang sa kdrêč hlăm klei dleh dlan. Dŭm mta mnơ̆ng anăn ktang mâo klei yuôm bhăn kyua dưi hmao đru dŭm mta mnơ̆ng mjêč hlăm gŏ sang diñu êjai dôk hlăm wưng klei ruă tưp.