VOV4.Êđê- Thâo bi čung ba, đru bi gui klei dleh dlan hŏng mnuih ƀuôn sang ti ƀuôn prŏng Hồ Chí Minh hlăk dôk hluê ngă hdră bi ktlah yang ƀuôn hluê si Asăp mtrŭn mrô 16 mơ̆ng Khua knŭk kna, dŭm gưl Êdeh mdiăng mnơ̆ng bi đru mơ̆ng dŭm êpul êya, anôk bruă, mnuih ti Dak Lak nao ba leh kơ ƀuôn prŏng. Dŭm pluh ton mnơ̆ng dhơ̆ng hlăk dôk mdiăng ba kơ krĭng kwar Dhŭng, khădah Dak Lak ăt dôk gĭr hlăm hdră mdrơ̆ng kñăm msưh kdŭn klei ruă Covid 19.

Hmư̆ hing Êpul gru bi kal hrah ƀuôn prŏng Ƀuôn Ama Thuôt dôk hrăm mbĭt hŏng êpul phung mniê kahan ksiêm čar Dak Lak lehanăn dŭm čô mâo ai tiê kmah mkŏ mjing “êdeh klei khăp” čiăng ba djam mtam, boh kroh đru kơ ƀuôn prŏng Hồ Chí Minh hlăm dŭm hruê bi kbưi yang ƀuôn. Amai Lê Thị Thanh Tâm, pô sang mnia mblei Lợi Tâm, ƀuôn prŏng Ƀuôn Ama Thuôt, ngă leh mjêč klei blŭ hrăm hŏng ƀĭng găp čiăng hrăm mbĭt ngă bruă anei. Amai Tâm lač: Dlăng kơ Sài Gòn kdrưh k’ang ƀiădah ară anei amâo lŏ jăk ôh kyua klei ruă tưp, amai ƀuh klei amâo jăk hlăm ai tiê, čiăng mâo klei đru mtam:

“Dlăng kơ ƀuôn prŏng Hồ Chí Minh dôk găn klei dleh dlan, kyuanăn yơh kâo čiăng hrăm mbĭt hŏng êpul gru bi kal hrah đru kơ mnuih ƀuôn sang ti ƀuôn prŏng Hồ Chí Minh dưi găn klei dleh dlan anei. Hmăng hmưi ƀuôn prŏng Hồ Chí Minh srăng hnưm dưi găn jih klei ruă tưp anei.”

Êdeh mdiăng djam tam ba mnơ̆ng kơ ƀuôn prŏng Hồ Chí Minh

Amai Tống Thị Tươi ti ƀuôn hgŭm Tân Lợi, ƀuôn prŏng Ƀuôn Ama Thuôt, jing pô mâo bruă ngă hur har hlăm dŭm bruă iêu thưr kơ dŭm čô mâo ai tiê kmah hrăm mbĭt hŏng “Êdeh klei khăp” bi mguôp čar Dak Lak hŏng ƀuôn prŏng Hồ Chí Minh lač, jih jang djam mtam, boh kroh dưi bi mklin lehanăn mơĭt kơ ƀuôn prŏng Hồ Chí Minh anăn, dưi mâo dŭm čô kahan ksiêm lehanăn mnuih mâo ai tiê kmah nao truh ti đang djam mơ̆ng mnuih ƀuôn sang lehanăn blei. Mâo djam mtam mơĭt kơ anôk mâo klei ruă tưp, đru kơ mnuih ƀuôn sang hlăm ƀuôn prŏng amâo dleh nao čhĭ ôh lehanăn đru ênưih ba chĭ djam mtam hlăm alŭ wăl čar Dak Lak.

“10 hruê êlâo, kyua klei ruă tưp mnuih ƀuôn sang amâo thâo bĭt anôk ba čhĭ djam mtam ôh. Leh ƀuh klei ruă tưp ti ƀuôn prŏng Hồ Chí Minh dleh ktuê dlăng êdi, sơnăn yơh ayŏng amai adei hmei bi trông, blei dŭm djam mtam anăn ba mơĭt kơ ƀuôn prŏng Hồ Chí Minh, bruă anăn dưi đru kơ mnuih ƀuôn sang mâo anôk ba čhĭ djam lehanăn ba truh kơ anôk dôk mâo klei čiăng êdi. Anei jing gưl êdeh tal 2 lehanăn hmei srăng mâo gưl êdeh tal 3.”

Dŭm êbâo boh mnŭ, boh bip dưi ba kơ krĭng mâo klei ruă tưp

Aduôn Nguyễn Thị Lý, k’iăng khua kiă kriê êpul gru bi kal hrah ƀuôn prŏng Ƀuôn Ama Thuôt brei thâo, leh êpul gru bi kal hrah bi mguôp hŏng êpul kahan ksiêm mniê čar Dak Lak mkŏ mjing hdră êlan “Êdeh klei khăp” mđing kơ anôk mâo klei ruă, jih 2 anôk bruă anei dưi iêu thưr leh klei đru prŏng mơ̆ng dŭm čô mâo ai tiê kmah. Truh kơ ară anei, hdră êlan anei dưi ba mơĭt leh 50 tôn djam mtam, boh kroh, dŭm êbâo asăr boh mnŭ lehanăn kphê ba kơ ƀuôn prŏng Hồ Chí Minh, hŏng ênoh  giăm 400 êklăk prăk. Bruă ngă rơ̆ng kơ pô djă êdeh ăt dưi mđing mĭn êdi, mâo klei êđăp ênang hlăm bruă gang mkhư̆ klei ruă tưp.

Băng: “Čiăng rơ̆ng mâo klei êđăp ênang kơ pô mngăt êdeh ba djam mtam anei truh kơ anôk mâo klei ruă tưp, êpul gru bi kal hră hrăm mbĭt hŏng anôk bruă mdrao mgŭn ƀuôn prŏng ngă klei ksiêm mkă kman hmar kơ pô mgăt êdeh. Leh diñu wĭt mơ̆ng ƀuôn prŏng Hồ Chí Minh anôk bruă mdrao mgŭn srăng lŏ ngă klei ksiêm mkă kman hmar kơ diñu čiăng di ñu mâo klei hơ̆it hlăm klei hdĭp grăp hruê.”

Ti krah dŭm hruê hlăm ala čar, boh nik ƀuôn prŏng Hồ Chí Minh, hlăk jih ai tiê pô gang mkhư̆ klei ruă tưp Covid-19, dŭm mnơ̆ng dhơ̆ng klei khăp mơ̆ng Dak Lak amâo knŏng djŏ jing hjăn klei đru hlăm mnơ̆ng ƀơ̆ng huă, ƀiădah anăn jing ai tiê thâo bi đru, bi êdah klei bi mguôp dưi găn klei dleh dlan, bi mjưh klei ruă tưp./.

Pô mblang: Y-Ƀel Êban