VOV4.Êđê - Kyua hmaĭ mơ̆ng klei ruă Covid-19, lu mlan êgao dŭm anôk bruă mnia blei dŭ mdiăng ti Dak Lak hrŏ prăk hrui wĭt mơ̆ng 70-80%, boh nik amâo mâo ôh prăk hrui wĭt leh mjưh mdei ngă bruă. Ti anăp klei dleh dlan mơ̆ng anôk bruă mnia blei, Êpul hgŭm bruă dŭ mdiăng ê tô Dak Lak akâo kơ anôk bruă djŏ tuôm bi hrŏ prăk jia, ênoh bi liê amâo dah bi kdung mmông tla nư, jao prăk bảo hiểm kơ mnuih mă bruă čiăng kơ dŭm anôk bruă mnia blei hgao wưng dleh dlan ară anei.

Knơ̆ng bruă mnia mblei lehanăn dŭ mdiăng Hải Cường (anôk mă bruă phŭn ti ƀuôn prŏng Ƀuôn Ama Thuôt) mâo 8 boh êdeh jhưng đih mdiăng tuê mơ̆ng Dak Lak nao kơ Hà Nội, hŏng êbeh 30 čô mnuih mă bruă jing mgăt êdeh, pô drông tuê, pô tĭng yap ngăn prăk, pŭ mnơ̆ng dhơ̆ng. Nguyễn Hải Cường, khua kiă kriê knơ̆ng bruă mniă blei lehanăn dŭ mdiăng brei thâo, kyua klei ruă tưp, lu mlan êgao amâo mâo tuê đĭ êdeh ôh, dŭm boh êdeh mdei bruă dŭ mdiăng tuê mơ̆ng Dak Lak nao kơ Hà Nội lehanăn mklăk wĭt hŏng anăn, ngă kơ knơ̆ng bruă luič liê lu êdi. Khădah luič liê ƀiădah ăt tla ênŭm dŭm mta prăk jia, prăk bảo hiểm yang ƀuôn kơ mnuih mă bruă djŏ hŏng hdră bhiăn. Tơdah amâo mâo klei đru, knơ̆ng bruă srăng kruh rai yơh. “Hlăm hruê mmông anei, knơ̆ng bruă lŏ bi hnô prăk luič liê hlăm brô 100 êklăk prăk/sa mlan. Ênoh prăk anei jing prăk mưn mnuih mă bruă, prăk jia anôk jưh mdei, ênoh prăk êlan klông, lehanăn prăk mnga kơ knơ̆ng bruă ngăn prăk. Hmei mâo leh klei akâo kơ dŭm anôk bruă djŏ tuôm msĕ si: knơ̆ng bruă kiă kriê êlan klông, knơ̆ng bruă prăk jia čar, dŭm knơ̆ng ngăn prăk bi hrŏ brei prăk mnga, jia VAT, prăk tăk êlan klông…Knŏng sơnăn yơh hmei dưi găn klei ruă tưp lehanăn dưi lŏ wĭt ngă bruă msĕ yăng đar.”

Êpul hgŭm dŭ mdiăng hŏng Ôtô Dak Lak mâo 40 knơ̆ng bruă, hŏng giăm 18.000 boh êdeh dŭ mdiăng tuê lehanăn mnơ̆ng dhơ̆ng dŭm mta. Tui si Phạm Văn Mạnh - khua kiă kriê êpul dŭ mdiăng hŏng ôtô čar Dak Lak, klei ruă tưp Covid-19 lŏ bluh đĭ ngă klei hmăi kjham kơ bruă dŭ mdiăng mơ̆ng dŭm knơ̆ng bruă.

Klă klơ̆ng, mâo dŭm mta êdeh mdiăng tuê msĕ si: êdeh tuê, êdeh ƀuyt, êdeh taxi bi hrŏ klei dŭ mdiăng, ênoh tuê dưi mdiăng… ênoh prăk ba wĭt kah knar mơ̆ng dŭm knơ̆ng bruă hrŏ mơ̆ng 70-80%, hlăm anăn mâo lu knơ̆ng bruă lĭng čan prăk mơ̆ng knơ̆ng bruă ngăn prăk čiăng duh bi liê blei êdeh êdâo dŭ mdiăng. Êngao kơ anăn, knơ̆ng bruă lŏ brei prăk mưn mnuih mă bruă lehanăn đru prăk kơ mnuih mă bruă hlăk ka lŏ mâo bruă mă, brei prăk bảo hiểm yang ƀuôn, bảo hiểm luič bruă mă, prăk tăk êlan klông, prăk mkra êlan klông, dŭm mta prăk jia, prăk mnga knơ̆ng bruă ngăn prăk…

Phạm Văn Mạnh lač, ti anăp dŭm klei dleh dlan mrâo lač, êpul hgŭm ngă leh hră mơar akâo kơ dŭm anôk bruă đru kơ dŭm knơ̆ng bruă hlăm wưng klei ruă tưp Covid-19 dôk dleh dưi ksiêm dlăng. “Hmei ngă leh hră mơar akâo kơ phŭn bruă ngăn prăk lehanăn anôk bruă jia dưi ksiêm dlăng lehanăn bi hrŏ prăk jia VAT trŭn mơ̆ng 1-2% mkă hŏng êlâo dih jing 10%, bi kơ knơ̆ng bruă ngăn prăk, hmei hmăng hmưi prăk leh čan amâo tĭng prăk mnga ôh hlăm 12 mlan ti thŭn 2021. Kơ bruă brei prăk bảo hiểm yang ƀuôn, hmei mâo leh mơh klei akâo kơ phŭn bruă mnuih mă bruă, kahan êka êkeh lehanăn yang ƀuôn mâo klei blŭ kơ bruă akâo amâo guôn tla ôh prăk Bảo hiểm yang ƀuôn kơ mnuih mă bruă hlăm sa thŭn lehanăn srăng lŏ brei tơdah knơ̆ng bruă lŏ wĭt ngă bruă msĕ yăng đar.”

Lê Đình Minh, k’iăng khua knơ̆ng bruă dŭ mdiăng hlăm êlan klông čar Dak Lak bi mklă, ară anei anôk bruă tŭ mă leh hră akâo đru dŏng mơ̆ng êpul hgŭm dŭ mdiăng hŏng ôtô čar Dak Lak. Anôk bruă bi mklin leh dŭm boh phŭn čiăng hưn mdah hŏng bruă sang čư̆ êa čar lehanăn dŭm anôk bruă djŏ tuôm, ngă bruă bi hrŏ ênoh prăk mjêč kơ dŭm knơ̆ng bruă, êpul bi mguôp bruă dŭ mdiăng hlăm alŭ wăl čar. “Ară anei, tui si klei akâo mơ̆ng êpul hgŭm dŭ mdiăng hŏng ôtô čar Dak Lak, bruă sang čư̆ êa jao leh kơ knơ̆ng bruă ngăn prăk, knơ̆ng bruă mnuih mă bruă, kahan êka êkeh lehanăn yang ƀuôn, knơ̆ng bruă êlan klông, bruă mdrao mgŭn, knơ̆ng bruă prăk jia čar Dak Lak, knơ̆ng bruă ngăn prăk, bảo hiểm…Kñăm ksiêm duah klei ktrâo atăt mơ̆ng gưl dlông lehanăn klei găl klă hlăm alŭ wăl čiăng dưi duah dŭm hdră êlan đru kơ dŭm knơ̆ng bruă dŭ mdiăng hŏng ôtô hlăm hruê mmông mdei ngă bruă kyua klei ruă tưp Covid-19, dưi găn ênuk dleh dlan ară anei. Leh mâo klei bi tŭ ư kơ dŭm hdră êlan srăng ba mdah hŏng bruă sang čư̆ êa čar lehanăn mgaih msir djŏ hŏng klei bhiăn ala čar.”