VOV4.Êđê- Yan hruê 31-5 Phŭn bruă mdrao mgŭn hưn mdah lŏ mâo sa čô mnuih ruă Covid-19 ti Dak Lak, anăn jing mnuih ruă mrô 7186. Pô anei dôk ti alŭ 7, să Čư̆ Mốt, kdriêk Ea H’Leo, jing F1 mơ̆ng mnuih ruă ti ƀuôn prŏng Hồ Chí Minh. Ti anăp klei ruă tưp dleh ktuê dlăng, kdriêk Ea H’Leo mjêč pŏk ngă dŭm hdră čuăl krĭng mkhư̆ klei ruă tưp, 10 anôk dôk ngă klei kwang dar. Bruă bi ktlah yang ƀuôn ăt dưi pŏk ngă pral.

Nông Ngọc Thiết, khua bruă sang čư̆ êa să Ea Wy, anôk mâo lu bĭt djŏ tuôm hŏng mnuih ruă mrô 7186 brei thâo, mơ̆ng 10 mmông mmăt hruê 30/5, dŭm êpul êya djŏ tuôm hlăm alŭ wăl mdơ̆ng leh dŭm anôk ksiêm dlăng, čuăl krĭng ti alŭ wăl sang mnia Thanh Dậu, sang mnăm  êa kphê ana mnŭt, sang huă mnăn 3 Khía, sang mdrao êgei mbah Việt Pháp 2 lehanăn lŏ tui duah dŭm čô jing F1 lehanăn F2:

“Hŏng lu hdră êlan ngă, dưi čih yap mâo 27 čô jing F1, lehanăn giăm 200 čô jing F2, hmei mdơ̆ng leh 5 anôk ksiêm dlăng hlăm dŭm anôk mnuih ruă tuôm găn nao. Dŭm anôk ksiêm dlăng mâo leh klei hưn mthâo mơ̆ng anôk mđung asăp blŭ. Hmei mkŏ mjing leh hdră êlan brei anôk bruă mdrao mgŭn să tui duah dŭm čô mnuih jing F1, F2 lehanăn F3. Kơ boh klei anei, hmei iêu mthưr kơ mnuih ƀuôn sang dưi thâo lehanăn čŏng nao hưn mthâo bruă mdrao mgŭn.

Alŭ wăl gak răng ti alŭ 6b să  Čư̆ Môt

Bi kơ să Čư̆ Môt, anôk čih yap mâo mnuih mâo klei ruă tưp Covid-19 mrô 7186, mơ̆ng mlam mmăt hruê 30/5 truh kơ ară anei, bruă sang čư̆ êa ngă leh klei tui duah lehanăn bi ktlah 15 čô jing F1, 150 čô mnuih jing F2 lehanăn 180 čô mnuih jing F3. Dŭm čô anei mâo leh klei mtô srăng bi ktlah mơ̆ng anôk bruă mdrao mgŭn. Hlăm alŭ wăl ăt mâo leh 5 anôk čuăl krĭng ti 3 alŭ 6a, 6b lehanăn alŭ 7 hŏng ênoh 2.500 čô mnuih. Võ Văn Lệ, k’iăng khua bruă sang čư̆ êa să Čư̆ Môt brei thâo: Grăp anôk čuăl krĭng, bruă sang čư̆ êa să tiŏ nao 7 čô hlăm êpul kahan ƀuôn, êpul hđeh êdam êra, êpul phung mniê lehanăn kahan ksiêm klam bruă ti năn. Bruă đru kơ mnuih ƀuôn sang hlăm anôk čuăl krĭng ăt mâo klei dlăng yuôm bhăn êdi.

Hmei tiŏ nao grăp êpul 2 čô hđeh êdam lehanăn sa čô mniê, tơdah mnuih ƀuôn sang dôk hlăm anôk čuăl krĭng mâo klei čiăng srăng hưn hŏng phung anăn nao blei mnơ̆ng yua kơ mnuih ƀuôn sang. Dhar bruă mặt trận ăt iêu mthưr čiăng mtrŭt mjhar kơ dŭm čô mă bruă knŭk kna hlăm alŭ wăl mâo klei đru mguôp mơ̆ng pô hlăm bruă gang mkhư̆ klei ruă tưp anei.

Tui hluê Nguyễn Văn Hà, khua bruă sang čư̆ êa kdriêk Ea H’Leo, tĭng truh kơ 2 mmông tlam hruê 31/5, hlăm alŭ wăl dưi hmao ƀuh 62 čô jing F1, êbeh 300 čô mnuih jing F2. Ară anei, jih jang mnuih jing F1 dưi ba bi ktlah hlăm anôk bi ktlah mbĭt ti sang dôk kơ phung hđeh sang hră mơ̆ng sang hră Cao đăng Công nghệ krĭng Lăn Dap Kngư. Boh tŭ hlăm klei ksiêm mkă kman dưi ƀuh, 47/62 čô mnuih, amâo mâo ƀuh kman Sars CoV 2 gưl tal 1. Mơ̆ng 9 mmông mmăt hruê 31/5 bruă sang čư̆ êa kdriêk ngă leh klei bi kbưi yang ƀuôn tui hluê asăp mtrŭn 15 mơ̆ng khua knŭk kna ti wăk krah êa Drăng, să Ea Wy.

Kwang dar alŭ wăl sang mnia Ba Khiá ti să Ea Wy

Nguyễn Văn Hà mñă klă: Bruă sang čư̆ êa mâo leh hdră êlan čiăng rơ̆ng mâo djăp mnơ̆ng ƀơ̆ng huă kơ mnuih ƀuôn sang dôk hlăm anôk čuăl krĭng. Mbĭt hŏng anăn bruă sang čư̆ êa mbha leh bruă knuă kơ dŭm anôk bruă lehanăn mtă kơ dŭm êpul êya djŏ tuôm srăng mgaih msir kjăp dŭm klei ngă soh hŏng hdră êlan bi kbưi yang ƀuôn.

“Dhar kreh mâo bruă klam čiăng dưi ksiêm dlăng hlăm dŭm bruă dhar kreh ksiêm dlăng, bruă hlăm čar srăng ksiêm dlăng kơ dŭm boh klei hlăm klei đăo knang, bi kơ kahan ksiêm srăng ksiêm dlăng dŭm kdrŭn êdeh čiăng thâo kơ mnuih wĭt đĭ hlăm êdeh anăn. Bi kơ dŭm să, dŭm adŭ bruă mâo klei amâo uêñ truh kơ klei soh srăng mđua bruă soh anăn kơ pô ba anăp. Amâo ngă ngơi mang, mprăp na nao ai tiê  mdrơ̆ng hŏng klei ruă tưp, amâo dưi kdjăt kƀla huĭ hyưt ôh.”

  Gưl bluh đĭ klei ruă tưp Covid-19 tal 4 anei, Dak Lak čih yap mâo 4 čô mnuih ruă jing dŭm čô ruă mrô 3237, 3334, 3836 lehanăn 7186. Alŭ wăl ngă leh klei bi ktlah mbĭt, bi ktlah hlăm anôk bruă mdrao mgŭn kơ dŭm êtuh čô jing F1, bi ktlah ti sang êbeh 5 êbâo čô mnuih lehanăn êbeh 3 êbâo čô mnuih dôk hlăm dŭm anôk čuăl krĭng.

 Pô mblang: Y-Ƀel Êban