VOV4.Êđê- Klei ruă Covid 19 gưl anei, Dak Lak jing krĭng mâo klei mđing êdi ti lăn dap kngư hlăk mâo dŭm čô mnuih ruă tưp mơ̆ng alŭ wăl mkăn. Mbĭt hŏng klei mâo dleh dưi ksiêm dlăng mơ̆ng klei ruă anei ti ƀuôn prŏng Hồ Chí Minh kyua anăn amâo djŏ knŏng ti Dak Lak ƀiădah dŭm alŭ wăl jĕ giăm hlăm anăn mâo Gia Lai ăt pŏk ngă kjăp hdră gang mkhư̆ klei ruă.

Kdriêk Čư̆ Pưh, čar Gia Lai jing alŭ wăl bi lir hŏng anôk mnuih ruă mrô 7186 dôk mơ̆ng čar Dak Lak, leh kơnăn mtam, čar Gia Lai hlŏng lŏ wĭt ngă bruă dŭm anôk ksiêm dlăng klei ruă tưp ti êlan dơ̆ng mrô 14, ti kban 110 bi knông hŏng čar Dak Lak. Êpul êya lu dhar bruă mâo: “Êpul kahan ksiêm êlan klông, Anôk ksiêm dlăng êlan klông, bruă mdrao mgŭn… ngă leh bruă kơ̆ng mdei êdeh, mkă hnơ̆ng hlơr asei, hưn mdah klei suaih prăl dŭm čô găn anôk anei. Tui si pô mgăt êdeh Dương Quốc Hiệu, ti wăl krah Đak Đoa, mrâo wĭt mơ̆ng ƀuôn prŏng Hồ Chí Minh truh kơ čar Gia Lai, klei ngă djŏ bruă hưn mthâo klei suaih pral ăt msĕ hŏng dŭm hdră êlan gang mkhư̆ klei ruă tưp mơ̆ng dŭm êpul êya djŏ tuôm dưi brei kơ ñu lehanăn lu phung mgăt êđeh mâo klei êđăp ênang hlăm ai tiê.”

“Leh truh ti nei, dưi mâo klei ksiêm mkă mơ̆ng dŭm čô ayŏng adei êlâo kơ wĭt hlăm alŭ wăl, kâo ƀuh phung ayŏng adei ngă jăk êdi bruă anei. Pô găn hlăm êlan klông ƀuh bruă gang mkhư̆ klei ruă tưp mơ̆ng dŭm čô ayŏng adei mgăt êdeh êlan taih kbưi mâo klei rơ̆ng kjăp. Bi kơ bruă huă mnăm, phung ayŏng adei mâo đei jĕ giăm hŏng dŭm čô mnuih hlăm alŭ wăl, răng mgang kjăp êjai dôk hlăm êdeh jing răng mgang kơ mô̆ anak lehanăn gŏ sang pô.”

Kwang dar alŭ wăl sang mnia Ba Khiá, să Ea Wy, kdriêk Ea H’Leo, čar Dak Lak

Ayŏng Ksor Mươt, knuă druh bruă mdrao mgŭn ti anôk ksiêm dlăng kban 110- êlan dơ̆ng prŏng mrô 14 găn ti čar Gia Lai brei thâo, êngao kơ bruă brei guôm ƀô̆ mta hŏng čhiăm guôm ƀô̆, mkă hnơ̆ng hlơr asei lehanăn mdjiê kman, jih jang srăng hưn mdah lei suaih pral hŏng klei klă lehanăn kluôm ênŭm. Boh nik mơ̆ng anôk hriê, ti anôk nao lehanăn klei suaih pral ară anei, dŭm klei ruă dôk mâo djŏ tuôm, khădah luič lu mmông, ƀiădah jih jang ăt tui ngă djŏ dŭm hdră bhiăn, klei mtô mơ̆ng êpul êya djŏ tuôm.

“Tơdah êngoh amâo dah mâo dŭm klei đĭng srăng ba bi ktlah mtam, tơdah mkă hnơ̆ng hlơr ƀuh msĕ yang đar srăng mtă kơ mnuih ƀuôn sang hưn mdah klei suaih pral lehanăn brei diñu nao yơh. Ti anôk să, ti anôk alŭ srăng hưn mdah ti să anăn. Bi kơ dŭm čô mnuih wĭt mơ̆ng kbưi amâo dah mơ̆ng ƀuôn prŏng Hồ Chí Minh srăng nao hưn mthâo klei suai pral ti anôk bruă mdrao mgŭn.”

Anôk ktuê dlăng klei ruă tưp Dak Lak - Gia Lai

            Truh kơ ară anei, jih jang dŭm čô mnuih djŏ tuôm hŏng mnuih ruă mrô 7186 ti čar Dak Lak mâo leh klei ksiêm mkă amâo mâo ƀuh kman SARS-COV-2, khădah ăt lŏ srăng ngă klei bi ktlah, ksiêm dlăng. Bi kơ dŭm čar krĭng Lăn Dap Kngư, boh nik jing klei găn êlan dơ̆ng prŏng mrô 14 (êlan Hồ Chí Minh) mdei leh bruă dŭ mdiăng tuê, mâo đa đa dŭm čô amâo ngă djŏ hŏng hdră bhiăn mâo leh klei bi kmhal mơ̆ng êpul êya djŏ tuôm, bruă sang čư̆ êa lehanăn dŭm êpul êya djŏ tuôm dŭm alŭ wăl mâo nanao klei bi mguôp čiăng ngă hrăm mbĭt, hŏng klei ktang lehanăn mâo boh tŭ dưn hĭn hlăm bruă gang mkhư̆ klei ruă tưp Covid-19.

Pô mblang: Y-Khem Niê