VOV4.Êđê -  Čar Dak Lak dôk tui ngă hdră êlan “đru kơ yan bi lông” kơ 32 anôk bi lông bi ruê̆ klei hriăm gưl 3 thŭn 2021, hŏng giăm 1000 čô hđeh êdam êra čŏng pô nao hgŭm. Tui si bruă Êdam êra čar Dak Lak, hdră êlan đru kơ yan bi lông anei ăt srăng dưi ngă hlăm wưng ala čar mâo mnuih mâo klei ruă tưp Covid-19.

Kyuanăn, dŭm čô čŏng nao kơ bruă srăng đru hlăm bruă kih waih, mdjiê kman hlăm dŭm anôk bi lông, hâo hưn kơ hdră bhiăn hlăm klei bi lông, hdră bhiăn hlăm bruă gang mkhư̆ klei ruă tưp Covid-19, lehanăn dŭm čô anei srăng đru ksiêm dlăng dŭm čô hđeh mâo klei hdĭp dleh dlan mâo mâo klei iêu mthưr, mtrŭt mjhar klei đru mguôp. Boh nĭk hlăm anôk bi lar klei mrâo đru kơ yang bi lông čar Dak Lak ti Facebook srăng klă klơ̆ng bi ba mdah lehanăn mâo dŭm klei mrâo hlăm klei bi lông, đru kơ phung amĭ ama lehanăn hđeh sang hră dưi hmar thâo dŭm klei mrâo.

Y Ƀel pô mblang