VOV4.Êđê -  Hruê 16/6, anôk bruă mdrao mgŭn čar Dak Lak mphŭn pŏk hdră tlŏ mgang vaccine gang mkhư̆ Covid 19 gưl 2 kơ giăm 30 êbâo čô mnuih lu jing phung mâo klei mđing tal êlâo ti alŭ wăl čar. Gưl anei, Dak Lak tŭ mă leh 27.210 hnơ̆ng vaccine AstraZeneca. Ênoh mnuih dưi tlŏ mgang hlăm gưl 2 anei truh 29.900 čô mnuih.

Hlăm anăn, mnuih dưi tlŏ aruăt tal 1 mâo 21.787 čô, mâo wăt êpul ba akŏ hlăm hdră gang mkhư̆ klei ruă tưp ka dưi tlŏ hlăm gưl 1 msĕ si phung mă bruă mdrao mgŭn, mnuih nao hlăm hdră gang mkhư̆ klei ruă tưp, lĭng kahan, kahan ksiêm nao hlăm hdră gang mkhư̆ klei ruă tưp, mnuih mă bruă hlăm anôk bruă êlan phiơr, bruă dŭ mdiăng, hiu čhưn ênguê, mnuih mă bruă hlăm anôk bruă pui kmlă, êa yua, phung nai mtô (gưl hđeh điêt, gưl sa); mnuih mă bruă ti dŭm anôk bruă sang hră m’ar, mjuăt bi hriăm; mnuih mă bruă ti dŭm êpul êya, anôk bruă, anôk ngă hră m’ar kreh bi tuôm hŏng lu mnuih (Dŭm knơ̆ng, dhar bruă hlăm alŭ wăl ƀuôn prŏng Ƀuôn Ama Thuôt). Mnuih dưi lŏ aruăt tal 2 mâo 8.113 čô mă bruă mdrao mgŭn tlŏ leh aruăt tal 1. Hlăm gưl tlŏ mgang vaccine gang mkhư̆ klei ruă Covid 19 gưl 2, amâo tlŏ ôh kơ mnuih mâo klei ruă lehanăn mnuih êbeh 65 thŭn./.

H Nêč pô mblang