VOV4.Êđê- Hluê si Anôk bruă ksiêm dlăng klei ruă tưp čar Dak Lak, tĭng truh hruê 18/11, kluôm čar tlŏ leh êbeh 1 êklăk 300 êbâo hnơ̆ng vaccine Covid 19 kơ 1 êklăk 335 êbâo čô mnuih mơ̆ng 18 thŭn kơ dlông. Hluê anăn, truh hruê 18/11, čar Dak Lak mâo leh Phŭn bruă mdrao mgŭn mkăp 12 gưl vaccine gang mkhư̆ Covid 19, hŏng 1.262.048 hnơ̆ng čiăng tlŏ mgang kơ mnuih ƀuôn sang mơ̆ng 18 thŭn kơ dlông. Dak Lak mâo 88,82% ênoh mnuih mơ̆ng 18 thŭn kơ dlông dưi tlŏ vaccine gang mkhư̆ Covid 19 aruăt tal 1, ênoh tlŏ aruăt tal 2 mâo 10%.

Hluê si Nay Phi La, Khua knơ̆ng bruă mdrao mgŭn čar Dak Lak, čiăng rơ̆ng tlŏ djăp 2 aruăt vaccine gang mkhư̆ Covid 19 kơ mnuih mơ̆ng 18 thŭn kơ dlông, mđing truh kơ hdră srăng tlŏ truh 80% ênoh mnuih mơ̆ng 12 thŭn kơ dlông, hlăm wưng ti anăp, čar dôk čiăng hlăm brô 1 êklăk 800 êbâo hnơ̆ng vaccine. Ară anei, kluôm čar mâo 236 anôk tlŏ mgang, hlăm anăn tơdah čiăng dưi mkŏ mjing truh 500 êpul tlŏ mgang kơ hlăm brô 200 êbâo čô/hruê. Anôk bruă mdrao mgŭn čar Dak Lak mâo leh hdră kčah klă klơ̆ng kơ grăp êpul mnuih tơdah mâo vaccine srăng nao tlŏ mtam./.

Pô mblang: H’Nêč Êñuôl