VOV4.Êđê - Ară anei, čar Dak Lak mâo êbeh 600 čô mnuih mâo klei ruă tưp Covid-19, hlăm anăn mâo leh êbeh 100 čô mnuih ruă dưi mdrao hlao. Čar Dak Lak mâo lu mnuih mă bruă mơ̆ng ƀuôn prŏng Hồ Chí Minh leh anăn dŭm čar Bình Dương, Đồng Nai wĭt kơ alŭ wăl pô, mâo klei bi knăl mâo klei ruă tưp lehanăn jing F0. Kyua ngă kjăp bruă bi ktlah, kwang dar dŭm anôk mâo klei ruă tưp, kyuanăn dŭm alŭ wăl hlăm čar Dak Lak dưi gĭr mkhư̆ klei đĭ lar mơ̆ng klei ruă tưp hlăm yang ƀuôn.

Hjăn ti să Quảng Hịêp, kdriêk Čư̆ Mgar mâo leh giăm 1000 čô mnuih wĭt mơ̆ng ƀuôn prŏng Hồ Chí Minh leh anăn Bình Dương wĭt ti ƀuôn sang ñĕ kơ klei ruă tưp. Hlăm anăn mâo truh 100 čô mnuih đĭ êdeh p’phŭt. Kyua ngă jăk bruă hưn klei suaih pral, bi ktlah hjăn sa anôk, anăn khă gơ̆ ti să Quảng Hịêp mâo leh 6 čô djŏ kman SARS-CoV-2 ƀiădah amâo tưp lar ôh hlăm êpul êya. Ngô Minh Đức, Khua Knơ̆ng bruă sang čư̆ êa să Quảng Hịêp brei thâo: Alŭ wăl mâo lu anak čô mnuih djuê ƀiă nao mă bruă ti dŭm čar nah dhŭng. Digơ̆ jing gŏ êsei ƀun snăn leh wĭt ti sang ñĕ kơ klei ruă tưp kƀah lu mta. Bruă sang čư̆ êa, êpul hgŭm iêu mthưr dŭm gŏ sang mâo klei găl đru, rơ̆ng kơ phung bi ktlah hjăn djăp mnơ̆ng ƀơ̆ng huă leh anăn dŭm mta mnơ̆ng yua aguah tlam. Đức brei thâo: Kyua klei hluê ngă jăk bruă bi ktlah hjăn mdrao mgŭn plah wah mnuih hŏng mnuih, gŏ sang hŏng gŏ sang anăn klei ruă tưp amâo tưp lar ôh hlăm êpul êya “Hlăm hdră bi ktlah hjăn snăn să mkŏ mjing grăp alŭ sa êpul ktuê dlăng čiăng ktuê dlăng phung bi ktla hjăn ti sang. Mơ̆ng bruă ksiêm dlăng, ƀuh phung dleh dlan snăn să hmao iêu mthưr phung ƀuôn sang, phung mâo ai tiê kmah gĭr đru mbĭt hŏng bruă sang čư̆ êa, đru braih, đru ƀung hdang krô leh anăn dŭm mta mnơ̆ng mkăn hlăm grăp hruê. Tơdah phung ară anei dôk kpăk đuôm ti dŭm krĭng mâo klei ruă tưp snăn klă sĭt hluê si klei gĭt gai mơ̆ng Knơ̆ng bruă sang čư̆ êa čar srăng ba wĭt tơdah mâo klei čiăng. Hŏng alŭ wăl tơdah mâo phung ƀuôn sang wĭt snăn srăng drông leh anăn mâo wăl bi ktlah hjăn mdrao mgŭn, leh anăn hmao đru kơ mnuih ƀuôn sang hơĭt ai tiê hlăm wăl bi ktlah hjăn”.

Hmei nao ti ƀuôn Khoá, să Čư̆ Pui, kdriêk Krông Bông hlăm hruê tal êlâo lăm lui asăp kwang dar. Mnuih ƀuôn sang Êđê tinei lŏ wĭt hŏng klei hdĭp aguah tlam sĕ si nao hlăm lo mđoh êa kơ mdiê, kriê dlăng đang kphê, mă rơ̆k kơ êmô kbao… Khădah grăp čô truă čhiăm guôm ƀô̆ sơaĭ leh anăn dôk bi kbưi. Diñu răng tơdah bi tuôm hŏng phung amâo thâo kral kyua mrâo găn dŭm hruê mlam bŏ hŏng huĭ hyưt. Hruê 23-7, mâo 2 čô anak čô ti ƀuôn Khoá wĭt mơ̆ng Bình Dương djŏ leh klei ruă Covid-19. Mơ̆ng 2 čô anei, 26 čô ti ƀuôn Khoá djŏ kman Sars Cov-2. Mbĭt hŏng anăn mâo lu phung F1. Yăl dliê hŏng ayŏng Y Nghĭ Mlô djuê ana Êđê ti Ƀuôn Khoá. Ñu brei thâo: Anei jing gưl tal sa leh 21 hruê bi ktlah hjăn, ñu nao hlăm war kriê dlăng êmô. Mô̆ leh anăn anak ñu djŏ kman Sars –Cov-2, dưi ba mdrao mgŭn. Y Nghị jing F1, anăn 3 hruê kăm dôk hlăm sang, hŏng 8 blư̆ phung knuă dru mdrao mgŭn nao mă mta ksiêm mkă ƀiădah myun mơh amâo ƀuh ôh man “Hlăm hdră bi ktlah hjăn, kâo bi mni kơ anôk bruă djŏ tuôm mjing djăp klei găl, đru kơ kâo mnơ̆ng yua aguah tlam čiăng hơĭt bi ktlah hjăn hlăm sang, amâo bi tuôm hŏng pô mkăn. Kâo hơĭt ai tiê.”

Nguyễn Văn Tâm, Khua bruă Đảng să Čư̆ Pui brei thâo, hăm wưng êgao jih bruă kđi čar ti să hluê ngă leh klei blŭ 4 tinăn mtam hŏng klei gĭr gang mkhư̆ klei ruă tưp lar. Leh năn truh hruê 17-8 mrâo êgao, jih jang dŭm anôk kwang dar lŏ wĭt hdĭp mda msĕ hŏng aguah tlam.

Nguyễn Văn Toàn, Khua bruă mặt trận să Čư Pui brei thâo: Boh phŭn bi mklă klei tŭ jing hlăm bruă gang mkhư̆ klei ruă tưp lar hlăm êpul êya anăn jing” Jih hnơ̆ng hluê ngă 5 klei mtă. Hlăm anăn bruă “Ti anôk dôk, snăn dôk tinăn yơh” jing klei blŭ phŭn, brei dưi hluê ngă jih hnơ̆ng. Čiăng 178 gŏ êsei mnuih ƀuôn sang ti ƀuôn Khoá hluê ngă jăk bruă kwang dar, bi ktla hjăn, bruă sang čư̆ êa mâo leh hră čih grăp gŏ sang hlăm ƀuôn hŏng ênoh phung F0, F1. Să mkŏ mjing êpul mdrơ̆ng hŏng klei ruă tưp hŏng êpul mdrao mgŭn, kahan ksiêm, kahan ƀuôn gak ti anôk bruă jih hruê mlam. Diñu păn kjăp hră čih klei hdĭp grăp gŏ sang hlăm wăl kwang dar čiăng ktrâo lač, msir mgaih boh klei mâo. Boh nik, êpul anei dŭ mdiăng, mkăp djăp ênŭm mnơ̆ng dhơ̆ng kơ gŏ sang hlăm wăl kwang dar. Nguyễn Văn Toàn bi mklă “Êlâo hĭn jing klei mđing dlăng gĭt gai mơ̆ng gưl dlông ăt msĕ mơh mơ̆ng gưl bruă Đảng, bruă sang čư̆ êa alŭ wăl siă suôr hŏng mnuih ƀuôn sang. Hmei mâo êpul ba anăp ti anôk mâo klei ruă tưp, thâo kơ klei čiăng, boh nik mtă kơ mnuih ƀuôn sang dôk hlăm sang, amâo kbiă ti êngao. Kƀah mnơ̆ng ƀơ̆ng huă amâodah ya mnơ̆ng čiăng snăn mâo leh êpul ba anăp kăp mbha.  Mơ̆ng êsei huă, êa mnăm grăp hruê snăn êpul knuă druh mơ̆ng să truh ƀuôn jih ai tiê, đua klam.”

Mâo lu ti Krông Bông ăt adôk mâo phung F0, ƀiădah anei jing phung hlăm wăl bi ktlah hjăn. Mơ̆ng akŏ mlan 8 truh ară anei, Krông Bông amâo mâo ôh phung djŏ kman Sars-Cov-2 hlăm êpul êya. Lê Văn Long, Khua Knơ̆ng bruă sang čư̆ êa kdriêk Krông Bông bi mklă: leh jih bruă kđi čar ngă bruă hŏng klei djŏ, jih ai tiê bĭt anăn mjing klei sa ai, klei thâo săng hluê ngă mơ̆ng mnuih ƀuôn sang snăn krĭng mâo klei uă tưp srăng dưi mkhư̆ “Krông Bông jing kdriêk tal êlâo 37 wăl bi ktlah hjăn sa anôk leh anăn giăm 1 êbâo čô mnuih dưi bi ktlah hjăn mơ̆ng hruê 24-7 truh kơ ară anei. Dŭm phung ruă lu jing phung wĭt mơ̆ng krĭng mâo klei ruă tưp leh anăn dôk bi ktlah hjăn ti wăl bi ktlah hjăn mơ̆ng kdriêk snăn mâo klei ruă dưi ba mdrao mgŭn ti čar. Adôk jing amâo mâo ôh pô ruă hlăm êpul êya. Kyua anăn klei ruă tưp amâo tưp lar. Ară anei ti kdriêk mjing leh dŭm krĭng ka mâo mnuih ruă, mjing klei găl kơ mnuih ƀuôn sang dŭm djuê ana ti alŭ wăl kƀĭn mđĭ kyar bruă duh mkra, mguôp hŏng bruă gang mkhư̆ klei ruă tưp hlăm wưng kơ anăp jăk hĭn.”

Anôk mrâo mâo klei ruă dưi thâo ƀuh jing ƀuôn Kwăng A, să Čư̆ Bao, wăl krah Ƀuôn Hô. Anei jing anôk tưp lar hlăm êpul êya lu hĭn tal 1 ti Dak Lak yap mơ̆ng leh gưl klei ruă tưp bluh mâo tal 4. Leh bi mklă 29 čô F0 ti ƀuôn Kwăng A, mơ̆ng krah mlam hruê 19-8-2021, Knơ̆ng bruă sang čư̆ êa wăl krah Ƀuôn Hô ba yua leh Asăp mtrŭn mrô 16, hluê ngă hdră mjêč gang mkhư̆ klei ruă tưp ti kluôm să Čư̆ Bao. Phạm Ngọc Tiên, Khua dlăng bruă Đảng, Khua Knơ̆ng bruă sang čư̆ êa să Cư̆ Bao brei thâo, Anôk bruă gĭt gai gang mkhư̆ klei ruă tưp Covid-19 să Čư̆ Bao ăt jao leh êpul răng mgang klei êđăp ênang, kriê dlăng klei hdĭp kơ dŭm gŏ sang hlăm wăl bi ktlah hjăn. “Hlăm hdră kwang dar snăn hmei hâo hưn iêu mthưr phung mâo ai tiê kmah hrăm mbĭt hŏng Anôk bruă gĭt gai mơ̆ng să čiăng đru, mjing klei găl kơ mnuih ƀuôn sang hlăm krĭng kwang dar mâo klei hdĭp djăp ênŭm, amâo mâo ôh gŏ êsei kƀah mnơ̆ng ƀơ̆ng huă.”

Hluê si aê mdrao Trần Kim Long, khua dlăng anôk bruă gang mkhư̆ klei ruă tưp, Anôk bruă ktuê dlăng klei ruă tưp čar Dak Lak, yap truh knhal jih hruê kăm êlâo, êpul mdrao mgŭn hiu duah, mă mta ksiêm mkă pral kơ giăm 1 êbâo čô djŏ tuôm kơ êpul mâo klei ruă. Hjăn anôk mkra mjing lŏ hma Čư̆ Bao, hlăm Knơ̆ng bruă ksu Dak Lak (Dakruko), leh mâo klei hâo hưn hlăm Anôk mkra mjing lŏ hma mâo đa đa phung mă bruă djŏ kman Sars-Cov-2, khua gĭt gai anôk bruă bi hgŭm leh hŏng CDC čar Dak Lak test pral kơ jih jang phung knuă druh, mnuih mă bruă ti Anôk bruă. Čiăng pral gang mkhư̆ klei ruă Covid-19 tŭ dưn, anôk bruă ba yua leh hdră 3 tinăn mtam, jih jang phung mă bruă srăng mkra mjing êjai hdĭp mda, bi ktlah hjăn ti anôk bruă.

Mơ̆ng akŏ mlan 7 truh ară anei, Dak Lak ƀuh lu êpul mâo klei ruă tưp lar hlăm êpul êya ƀiădah jih jang dưi mâo čar gĭr ktưn gang mkhư̆ klei ruă tưp. Êngao kơ êpul tưp tal êlâo djŏ tuôm kơ pô mă bruă sang êdeh Tiến Oanh, dŭm êpul mkăn tŭ dưn mkhư̆ klei ruă tưp leh 14 hruê kwang dar./.