VOV4.Êđê- Tlam mbruê, tui si klei hưn mdah mơ̆ng anôk bruă mdrao mgŭn kdriêk Krông H’Nang, čar Dak Lak, hlăm alŭ wăl mrâo čih yap mâo 63 čô hlăm klei test pral mâo kman Sars-CoV-2 ti ƀuôn Wĭk, Ƀuôn Đê leh anăn Ƀuôn Giêr, să Ea Hồ.

Êlâo kơ anăn, aguah hruê 3/11, leh hmao ƀuh 2 čô hđeh sang hră ti alŭ wăl să Ea Hồ mâo klei ruă tưp Covid-19 hlăk hruê 1/11, êpul êya ngă bruă ngă leh bruă tui duah phung djŏ tuôm giăm hŏng 2 čô hđeh sang hră anei lŏ ƀuh thiăm 3 čô hlăm gŏ sang 2 čô anei mâo kman Sars-CoV-2, pŏk phai bruă tui duah mơ̆ng dŭm čô anăn, anôk bruă mdrao mgŭn kdriêk Krông H’Nang ƀuh jih jang phung mâo klei ruă tưp mâo phŭn mtưp mơ̆ng sa klei čang djiê ti să Ea Hồ hlăk hruê 29/10. Ară anei bruă tui duah, mă mta ksiêm mkă kman kơ mnuih ƀuôn sang hlăm alŭ wăl dôk dưi ngă mjêč.

Pô mblang: Y-Ƀel Êban