VOV4.Êđê - Leh bi mklă lăm lui klei kwang dar hŏng krĭng mnuih ƀuôn sang dôk ti êlan điêt mrô 189/1 êlan Mai Hắc Đế, ƀuôn hgŭm Tân Thành, ƀuôn prŏng Ƀuôn Ama Thuôt, bruă sang čư̆ êa lehanăn anôk bruă djŏ tuôm čar Dak Lak ăt lŏ mđĭ  hdră gang mkhư̆ klei ruă Covid 19. Mta phŭn anei srăng dưi hưn mthâo hlăm hdră mđung hruê anei, knăm sa, hruê 31/5/2021. Knhal tuič hdră mâo kdrêč Quốc hội hŏng phung bi ala kơ mnuih ƀuôn sang, hmei hưn lač kơ klei bi kƀĭn tal 56 mơ̆ng Dhar bruă gĭt gai Quốc hội kơ bruă hluê ngă hdră mkiêt mkriêm, bi kdơ̆ng hŏng klei bi liê thŭn 2020.

Ti anăp klei čuăl krĭng, kăm ghă, dŭm čô knuă druh bruă mdrao mgŭn nao krih leh êa drao mdjiê kman gưl knhal tuič ti êlan điêt 189/1 êlan Mai Hắc Đế, ƀuôn hgŭm  Tân Thành, ƀuôn prŏng Ƀuôn Ama Thuôt- anôk dưi čih yap mâo 2 čô mnuih mâo klei ruă tưp Covid-19. Leh kơ anăn dŭm boh mnư̆, anôk gang dưi ruh mđuê̆. Êpul gĭt gai bruă sang čư̆ êa ƀuôn hgŭm Tân Thành răk leh klei bi mklă bruă lăm lui klei čuăl krĭng, kăm ghă lehanăn mđup brei hră bi mklă bi leh dŭm hruê mmông bi ktlah hŏng 100 čô mnuih ƀuôn sang, tŭ mă hră bi klă, Bùi Trung Khánh brei thâo: “Hmei ƀuh klei mơak sơnăk, kyuadah dŭm hruê mmông leh êgao dưi ngă djŏ klei bhiăn mơ̆ng ala čar, knŭk kna kơ bruă bi ktlah bruă mdrao mgŭn, ngă djŏ dŭm klei bhiăn mơ̆ng alŭ wăl. Hlăm hruê mmông kơ anăp hmei srăng lŏ čŏng ngă klei bi ktlah hjăn hlăm sang lehanăn ksiêm dlăng klei suaih pral mâo 7 hruê, truh mmông anăn, tơdah mâo klei hơĭt srăng lŏ mă bruă msĕ aguah tlam.”

Êlâo kơ anăn, hlăm mmăt hruê 8/5, mâo sa čô mâo klei ruă tưp Covid-19 ti êlan điêt 189/1 êlan Mai Hắc Đế jing mnuih ruă mrô 3237. Hlăm mlam anăn mtam, čar Dak Lak mâo klei bi mklă srăng čuăl krĭng lehanăn bi ktlah anôk anei hŏng 47 gŏ sang lehanăn 144 čô mnuih. Hlăm klei čuăl krĭng, dhar bruă mdrao mgŭn mă lehanăn mkă dlwang kman 2 blư̆ kơ jih jang mnuih hlăm anei, amâo mâo ƀuh ôh mnuih mâo kman Sars CoV 2. Aduôn Lê Thị Ngọc Hương ti êlan 189/1 êlan Mai Hắc Đế, ƀuôn hgŭm  Tân Thành, ƀuôn prŏng Ƀuôn Ama Thuôt lač: “Leh giăm 20 hruê, hlăm ai tiê ƀuh mơak sơnăk lehanăn hmăng hmưi amâo lŏ mâo mnuih găn klei anei ôh. Khă dôk hlăm anôk bi ktlah mâo lu klei čiăng ktrŏ ai tiê mơh, ƀiădah leh ƀuh jih jang mnuih ăt mâo klei gĭr, hmăng hmưi  klei ruă tưp srăng jih hnưm lehanăn amâo lŏ mâo ôh mnuih nao dôk hlăm anôk bi ktlah.”

Mnuih ƀuôn sang mâo klei bi ktlah ti êlan 189/1 êlan Mai Hắc Đế, ƀuôn hgŭm  Tân Thành, ƀuôn prŏng Ƀuôn Ama Thuôt mâo 47 gŏ sang lehanăn 140 čô mnuih, hlăm anăn mâo 20 gŏ sang mưn, jing mnuih mă bruă êngiê. Hlăm dŭm hruê mmông bi ktlah anôk anei, mbĭt hŏng bruă mbha gak mơ̆ng dŭm êpul êya čiăng răng mgang klei êđăp ênang, gang mkhư̆ klei ruă tưp, bruă sang čư̆ êa hlăm alŭ wăl iêu thưr kơ dŭm čô mâo ai tiê bi đru kơ mnơ̆ng ƀơ̆ng huă, mnơ̆ng yua grăp hruê čiăng rơ̆ng kơ klei hdĭp mnuih ƀuôn sang. Hluê anăn, mâo giăm 50 êklăk prăk, êbeh 5 tôn djam mtam, giăm 15 tôn braih, dŭm êtuh huôm ƀung hdang krô lehanăn mnơ̆ng dhơ̆ng yua grăp hruê mơ̆ng phung mâo ai tiê jăk mđup brei kơ mnuih ƀuôn sang ti nei.

Aduôn Trần Thị Dinh, k’iăng khua bruă sang čư êa ƀuôn hgŭn Tân Thành, ƀuôn prŏng Ƀuôn Ama Thuôt, čar Dak Lak brei thâo: dŭm hruê mmông kơ anăp, khădah lăm lui leh klei kăm ghă, ƀiădah alŭ wăl lŏ mâo hdră êlan ksiêm dlăng kơ mnuih ƀuôn sang ti nei čiăng hmao mâo hdră êlan mgaih msir tơdah mâo klei truh. “Leh lăm lui dŭm klei kăm ghă, êpul gĭt gai bruă gang mkhư̆ klei ruă tưp Covid-19 hlăm alŭ wăl srăng lŏ tui ksiêm dlăng, hâo hưn kơ mnuih ƀuôn sang srăng ngă jăk bruă gang mkhư̆ klei ruă tưp Covid-19 ară anei. Tơdah hlei mâo klei mtŭk, êngoh hlơr, ruă kŏ srăng nao hlăm anôk mdrao mgŭn ƀuôn hgŭm Tân Thành čiăng mâo klei mtô kơ bruă mdrao mgŭn.”

Tui hluê aê mdrao Nguyễn Trung Thành, k’iăng khua kiă kriê knơ̆ng bruă mdrao mgŭn čar Dak Lak, dhar bruă mdrao mgŭn iêu mthưr leh lu êpul êya nao hgŭm hlăm bruă gang mkhư̆ klei ruă tưp Covid-19 , hlăm anăn anôk mdrao mgŭn ti să, ƀuôn hgŭm,wăl krah hlăm alŭ wăl mâo klei mguôp prŏng hlăm bruă dưi ksiêm dlăng klei ruă tưp. Jing anôk bruă ba anăp lehanăn jing anôk bruă mdrao mgŭn giăm hĭn, kyuanăn dŭm kdrăp mdrao mgŭn ti dŭm anôk mdrao mgŭn hlăm să, ƀuôn hgŭm, wăl krah mâo bruă klam yuôm bhăn hlăm bruă gang mkhư̆ klei ruă tưp Covid-19.

Hruê mmông leh êgao, êjai alŭ wăl čar Dak Lak čih yap mâo 3 čô mnuih mâo klei ruă tưp Covid-19, dŭm anôk bruă mdrao mgŭn să, ƀuôn hgŭm, wăl krah dưi mâo dŭm êpul êya nao gak hrue mlam čiăng mdrơ̆ng hŏng dŭm klei truh tơdah mâo klei ruă tưp. Mbĭt anăn lŏ mđĭ klei ksiêm dlăng kơ klei suah pral mnuih ƀuôn sang hlăm alŭ wăl. Tơdah hmao ƀuh mnuih mâo klei mtŭk, êngoh hlơr, ruă kŏ, dleh bi êwa srăng ba nao mdrao mgŭn lehanăn hmao mgaih msir dŭm čô mnuih mâo klei đing jing mnuih mâo klei ruă tưp Covid-19, hur har hlăm bruă đru kčĕ hŏng êpul gĭt gai bruă gang mkhư̆ klei ruă tưp Covid-19 hlăm alŭ wăl, hrăm mbĭt hŏng dŭm anôk bruă ngă krih êa drao mdjiê kman, bi doh mnơ̆ng jhat. Mtô kơ dŭm gŏ sang, anôk mâo lu mnuih dôk hlăm bruă bi doh sang pưk, nao hưn klei suaih pô, ksiêm dlăng kjăp dŭm čô mnuih mrâo wĭt mơ̆ng anôk mâo klei ruă tưp čiăng dưi hmao bi ktlah. Ti anăp anei, knơ̆ng bruă mdrao mgŭn Dak Lak srăng mkŏ mjing êpul ksiêm dlăng čiăng nao ksiêm dlăng mjêč dŭm anôk mdrao mgŭn čiăng ƀư̆ mkra, mtô lač lehanăn kčĕ kơ dŭm anôk bruă srăng ngă jăk bruă gang mkhư̆ klei ruă tưp Covid-19 hlăm alŭ wăl.”