VOV4.Êđê - Dŭm hruê êgao, dŭm klei êdu kƀah hlăm bruă test pral klei ruă Covid-19 leh anăn mkăp hră amâo djŏ kman klei ruă kơ mnuih ƀuôn sang găn dŭm anôk ksiêm dlăng klei ruă tưp mlir čar, ngă leh kơ lu mnuih ƀuôn sang ti Dak Lak lĕ hlăm klei dleh dlan. Diñu tui duah anôk ksiêm mkă, lu mnuih amâo dưi ngă lŏ wĭt hŏng klei ênguôt. Mbĭt anăn, klei hdĭp, bruă mă ăt dleh dlan.

Ksŭh sa êwa leh kbiă mơ̆ng adŭ hưn mthâo klei suaih pral Sang êa drao ƀuôn prŏng Ƀuôn Ama Thuôt, čar Dak Lak, amai Trần Thị Tuyết, ti Lâm Hà, čar Lâm Đồng brei thâo, hruê 5/7 amai mbĭt hŏng găp đĭ êdeh ph’phŭt nao ti Gia Lai čuă găp djuê. Leh wĭt ti Dak Lak lehkơnăn lŏ nao wĭt phă Lâm Đồng snăn amai thâo čar Lâm Đồng brei jih jang mnuih mŭt hlăm alŭ wăl bi mâo hră bi mklă amâo ƀuh kman Sar CoV2. Amai mjêč ruăt nao ti sang êa drao ƀuôn prŏng čiăng ksiêm dlăng pral kman klei ruă ƀiădah leh truh ti anôk anei, amai hmư̆ klei wĭt lač mơ̆ng sang êa drao mdei êjai hdră ngă bruă anei. Amâo dưi ksiêm dlăng kman, amâo mâo hră “Dưi găn êrô” ktuê êlan wĭt ti sang mơ̆ng amai Tuyết lŏ kdung sui hĭn “Hmei dôk kpăk đuôm tinei lehanăn amâo thâo bĭt mjing si srăng ngă čiăng dưi wĭt kơ Lâm Đồng. Tơdah ară anei lŏ nao ti ƀuôn prŏng Pleiku ksiêm dlăng kman lehanăn lŏ kplăk wĭt, đĭ êdeh truh 15 – 16 mmông snăn dleh mơh kơ hmei. Hmei čang hmăng kơ anôk bruă djŏ tuôm mâo hdră đru si bĕ ngă čiăng kơ hmei dưi găn êrô jăk găl hĭn.

Bi ayŏng Trần Anh Kiệt, pô mgăt êdeh ktuê êlan Ƀuôn Ama Thuôt - Ƀuôn prŏng Hồ Chí Minh lŏ mgăt êdeh wĭt kơ tluôn, tŭ ư mdei sa wưng kyua amâo mâo anôk ksiêm dlăng kman klei ruă Covid 19. “Dŭm hruê êlâo kâo ăt ksiêm dlăng kman pral mơh ƀiădah hră jih wưng kčah djă yua leh ară anei, arăng lač lŏ mâo hdră ksiêm dlăng amâo ƀuh kman kơh dưi nao, amâo mâo snăn kăn dưi nao mơh, truh ti krĭng hlăm dhŭng adih arăng brei pô wĭt mtluôn mơh.

Nguyễn  Ngọc Thịnh, K’iăng khua Sang êa drao ƀuôn prŏng Ƀuôn Ama Thuôt brei thâo, kyua klei čiăng ksiêm dlăng kman klei ruă Covid 19 mơ̆ng mnuih ƀuôn sang đĭ lu hlăk kdrăp yua ksiêm dlăng mơ̆ng sang êa drao ƀiă, amâo mkăp djăp ôh kơ klei čiăng mơ̆ng mnuih ƀuôn sang kyua anăn Sang êa drao mdei êjai hdră ksiêm dlăng anei. “Ară anei, tal êlâo jing brei nao akâo kơ Knơ̆ng bruă mdrao mgŭn lŏ blei thiăm kdrăp ksiêm dlăng hluê djŏ si klei kčah mtrŭn, tal dua jing brei drei bi mklă srăng blei kdrăp anei hŏng hnơ̆ng dŭm hluê hŏng hdră bi mklă ênoh mnuih čiăng nao ksiêm dlăng. Ară anei, klei dôk čiăng mơ̆ng mnuih ƀuôn sang lehanăn anôk bruă duh mkra đĭ lu êdi.

Mbĭt hŏng sang êa drao ƀuôn prŏng Ƀuôn Ama Thuôt, ti alŭ wăl čar Dak Lak lŏ mâo 2 êpul êya hluê ngă hdră ksiêm dlăng pral kman klei ruă Covid 19 jing Sang êa drao mdrao klei ruă phung hđeh Đức Tâm lehanăn Adŭ mdrao Hòan Hảo. Khă snăn, kyua ka dưi mâo klei tŭ ư mơ̆ng Knơ̆ng bruă mdrao mgŭn čar Dak Lak, 2 hruê leh hưn mthâo mkŏ mjing hdră ksiêm dlăng pral kman klei ruă Covid 19, truh kơ ară anei 2 anôk bruă anei mdei mơh hdră ksiêm mkă dlăng kman. Snăn, truh kơ ară anei, Dak Lak ka mâo anôk ksiêm dlăng kman klei ruă Covid 19 ôh. Mnuih ƀuôn sang čiăng nao kơ alŭ wăl mkăn brei mâo hră bi mklă amâo ƀuh kman Sar CoV2 ară anei bi dôk guôn s’aĭ. Klei hdĭp, bruă mă dôk jưh knang hlăm hdră anei yơh.

Hluê si Trịnh Quang Trí, Khua anôk bruă ksiêm dlăng klei ruă tưp čar Dak Lak, hră bi mklă boh tŭ ksiêm dlăng kman klei ruă Covid 19 knŏng dưi bi mklă sa čô mnuih djŏ amâo dah amâo mâo ôh kman klei ruă ti wưng ksiêm dlăng. Hră anei amâo boh tŭ hlăm wưng sui ôh, ăt kăn dưi rơ̆ng pô anei amâo djŏ ôh klei ruă hlăm êdei anăp. Kyua anăn brei lŏ ksiêm tĭng wĭt kơ Hră bi mklă boh tŭ ksiêm dlăng kman klei ruă Covid 19 msĕ si “Hră dưi găn êrô” čiăng dưi nao ngă bruă găl ênưih hĭn kyua klei anei srăng mjing klei kpĭ kơ mnuih ngă bruă, prăk kăk hlăk boh tŭ ba wĭt amâo lu ôh. “Ară anei, brei drei mkŏ mjing si bĕ ngă čiăng kơ mnuih ƀuôn sang nao kơ anôk bruă mdrao mgŭn hưn mthâo klei suaih pral čiăng kơ drei thâo. Bi ară anei bi nao ksiêm dlăng pral kman klei ruă anei hŏng phung mgăt êdeh taxi, mgăt ktuê êlan kbưi snăn brei drei ngă mang amâo liê prăk ôh kơ digơ̆, snăn kơh djŏ jing mjing klei găl kơ mnuih ƀuôn sang, đru mguôp hlăm hdră mdrơ̆ng hŏng klei ruă tưp.

Hluê si Nay Phi La, Khua knơ̆ng bruă mdrao mgŭn čar Dak Lak, tơdah sa čô mnuih dôk mâo kman klei ruă hlăm asei mlei, ksiêm mkă dlăng amâo ƀuh kman ƀiădah êdei kơnăn huĭ pô anei srăng bi mtưp kman klei ruă kơ pô mkăn. Kyua boh tŭ ksiêm mkă dlăng amâo ƀuh kman klei ruă čiăng dưi găn êrô, nao kơ dŭm alŭ wăl mkăn amâo mâo boh tŭ djă yua hlăm lu hruê ôh, knŏng dưi yua mơ̆ng 2 – 3 hruê đuič. Klei anei jing, hră bi mklă amâo ƀuh kman amâo mâo buh tŭ dưn ôh hlăm hdră gang mkhư̆ Covid 19, ƀiădah dôk ba lu klei dleh dlan kơ anôk bruă mdrao mgŭn lehanăn mnuih ƀuôn sang, ngă êmưt hdră dŭ mdiăng mnơ̆ng dhơ̆ng, mjing klei kpĭ kơ anôk bruă duh mkra alŭ wăl./.