VOV4.Êđê- Hluê si  Knơ̆ng bruă mnuih mă bruă, kahan êka êkeh leh anăn ala ƀuôn čar Dak Lak, mơ̆ng akŏ thŭn truh hruê 20-5 mrâo êgao, ti čar mâo 23 čô hđeh djiê mngăt hlăm êa. Ară anei, čar Dak Lak mŭt hlăm yan hjan, êa hlăm ênao, êa krông, êa hnoh đĭ. Êngao anăn, kyua ngă bruă pla mjing hlăm đang kphê, tiu… anăn hlăm hma mnuih ƀuôn sang mâo anôk mgơ̆ng êa krih ba klei huĭ hyưt kơ phung hđeh. Anei ăt jing wưng hđeh mphŭn gưl mdei prŏng anăn huĭ dah klei truh djiê mngăt hlăm êa ăt đĭ. Hluê si Knơ̆ng bruă sang hră mtô bi hriăm čar Dak Lak, klei djiê mngăt hlăm êa kơ phung hđeh khăng mâo hlăm wưng mdei prŏng, kyua anăn êlâo kơ mjưh ruê̆ thŭn hriăm 2020-2021, Knơ̆ng bruă gĭt gai leh dŭm anôk bruă mđĭ ktang bruă hâo hưn kơ mnuih ƀuôn sang leh anăn hđeh sang hră kơ bruă kriê dlăng anak čô pô leh anăn hriăm mjuăt klei thâo gang mkhư̆ klei djiê mngăt hlăm êa kơ hđeh sang hră čiăng gang mkhư̆ jih hnơ̆ng klei truh tăm mâo.

Pô mblang: H’Zawut Ƀuôn Yă