VOV4.Êđê- Mđing truh asăp iêu mthưr jih jang mnuih ƀuôn sang gang mkhư̆ klei ruă Covid 19 mbĭt hŏng kluôm ala, mnuih ƀuôn sang ti Dak Lak hrăm mbĭt hŏng kluôm ala đru mguôp prăk kăk, đru kơ keh vaccine lehanăn dŭm hdră gang mkhư̆ klei ruă tưp. Lu êpul êya, anôk bruă duh mkra lehanăn mnuih ƀuôn sang, khădah dôk tlă anăp hŏng lu klei dleh dlan hlăm bruă duh mkra, mnia mblei lehanăn klei hdĭp ƀiădah ăt mprăp nao hgŭm đru mguôp ai tiê, mnơ̆ng dhơ̆ng kyua êpul êya.

Thŭn khua lehanăn amâo đei thâo yua đĭng blŭ thâo mĭn, Y Tuaih Niê, djuê ana Êđê, ti ƀuôn hgŭm Ea Tam, ƀuôn prŏng Ƀuôn Ama Thuôt, čar Dak Lak, brei anak mniê ñu mtô kơ bruă mơĭt sa ênoh prăk hlăm keh vaccine gang mkhư̆ klei ruă tưp Covid-19. Y Tuaih Niê lač, ktuê dlăng dŭm klei mrâo, kâo ƀuh klei huĭ hyưt mơ̆ng klei ruă tưp lehanăn klei suăi êdi kơ dŭm čô aê mdrao ba anăp bruă gang mkhư̆ klei ruă tưp. Kâo čiăng đru sa kdrêč điêt hrăm mbĭt hŏng ala čar gang mkhư̆ klei ruă tưp Covid-19.

“Đru mguôp prăk hlăm keh vaccine gang mkhư̆ klei ruă tưp Covid-19 jing bruă kâo hơ̆k mơak lehanăn sa ai hŏng bruă anei. Kyua anei jing bruă yuôm bhăn čiăng rơ̆ng kơ klei suaih pral lehanăn gang mkhư̆ klei ruă tưp Covid-19”

Amâo djŏ knŏng mơĭt prăk đru hlăm đĭng blŭ, Phan Quang Vũ, k’iăng khua knơ̆ng bruă pui kmlă êran hŏng ai êa Ƀuôn Đon, brei thâo, sa ai hŏng klei iêu mthưr mơ̆ng dhar bruă mặt trận čar Dak Lak, knơ̆ng bruă mâo klei mtrŭt mjhar kơ jih jang phung mă bruă hlăm knơ̆ng bruă đru mguôp, dưi bi mguôp 50 êklăk prăk đru kơ keh vaccine gang mkhư̆ klei ruă tưp Covid-19.

            “Sa ai hŏng ala čar srăng hrăm mbĭt, bi đru gang mkhư̆ klei ruă tưp Covid-19, hlăm knơ̆ng bruă ăt mâo klei iêu mthưr kơ jih jang mnuih mă bruă hlăm knơ̆ng bruă bi đru sa hruê ai, lehanăn lŏ mă mơ̆ng ngăn prăk bi đru lehanăn ngăn prăk hlăm knơ̆ng bruă. Hlăm ai tiê, jih jang mnuih mă bruă hlăm knơ̆ng bruă mâo klei sa ai, mâo đa đa čŏng lŏ bi mguôp thiăm mơ̆ng prăk pô êngao kơ klei bhiăn mơ̆ng knơ̆ng bruă. Ăt hmăng hmưi klei ruă srăng tuič ruê̆ djal, grăp čô mnuih ƀuôn sang mâo klei thâo săng čiăng dưi hnưm tlaih mơ̆ng klei ruă tưp.”

Lu mnuih, êpul bruă, anôk bruă mnia blei mguôp hlăm keh vaccin leh anăn kdrăp mnơ̆ng gang mkhư̆ klei ruă tưp čar Dak Lak

            Bi kơ tui hluê Vũ Đình Tân, khua kiă kriê knơ̆ng bruă pui kmlă êran hŏng ai angĭn krĭng krah dhŭng čar Dak lak, amâo djŏ knŏng mdei hlăm bruă đru prăk hlăm keh vaccine, êpul khua gĭt gai êpul group ăt iêu mthưr kơ dŭm čô mă bruă mâo klei đru mguôp hlăm bruă gang mkhư̆ klei ruă tưp Covid-19 hlăm dŭm alŭ wăl pô dôk ngă bruă. Ti čar Dak Lak, êpul group mguôp leh 1 êklai prăk čiăng đru blei vaccine lehanăn mnơ̆ng dhơ̆ng yua hlăm bruă gang mkhư̆ klei ruă tưp Covid-19.

“Hŏng knŭk kna, mrâo anei, êpul group bi mguôp leh 1 êklăk USD kơ bruă blei vaccine gang mkhư̆ klei ruă tưp Covid-19. Lehanăn bi kơ alŭ wăl čar Dak Lak, ară anei êpul group ăt dôk gĭt gai kơ dŭm čô mă bruă hlăm dŭm knơ̆ng bruă ăt mâo bruă klam, êngao kơ bruă đru blei vaccine, knơ̆ng bruă srăng lŏ dơ̆ng đru thiăm.”

Amâo djŏ knơ̆ng mguôp hlăm keh blei vaccin đuič ôh, lu anôk bruă lŏ đru mguôp hlăm bruă gang mkhư̆ klei ruă Covid-19 ti alŭ wăl

            Tui hluê Lê Xuân Sương, k’iăng khua gĭt gai dhar bruă mặt trận čar Dak Lak, leh êgao sa hruê kăm mtrŭt mjhar bruă bi đru gang mkhư̆ klei ruă tưp Covid-19, anôk bruă dưi tŭ mă êbeh 5,1 êklai prăk mơ̆ng dŭm êpul êya, mnuih ƀuôn sang lehanăn knơ̆ng bruă đru mguôp, mơ̆ng ênoh prăk anei, srăng mâo hdră êlan mbha blei vaccine, mmơ̆ng dhơ̆ng yua đru kơ êpul ba anăp bruă gang mkhư̆ klei ruă tưp Covid-19.

            “Êjai mtrŭt mjhar dŭm gưl, mâo sơăi klei nao hgŭm hur har. Khădah hlăm wưng klei ruă tưp dŭm knơ̆ng bruă tuôm hŏng klei dleh dlan, ƀiădah hŏng ai tiê kyua yang ƀuôn, dŭm knơ̆ng bruă, knơ̆ng bruă ngăn prăk, dŭm čô mâo ai tiê kmah lehanăn dŭm gŏ sang bruă mnia mblei đru mguôp leh prăk kăk lehanăn mnơ̆ng dhơ̆ng yua. êngao kơ dŭm gưl mnuih ƀuôn sang, mâo lu mnuih jing gŏ sang ƀun ƀin ăt kah sa kdrêč điêt mơ̆ng gŏ sang lehanăn mơĭt kơ dŭm anôk mâo klei ruă tưp. Mâo đa đa amâo mâo prăk kăk ôh, diñu mơĭt dŭm mnơ̆ng dhơ̆ng truh ti anôk mâo klei ruă tưp.”

            Hlăm gưl bluh đĭ klei ruă tưp anei, čar Dak Lak čih yap mâo 4 čô mnuih ruă, khădah dôk tuôm hŏng klei dleh dlan kyua dŭm klei hmăi mơ̆ng klei ruă tưp, ƀiădah mnuih ƀuôn sang, yang ƀuôn lehanăn dŭm knơ̆ng bruă hlăm alŭ wăl čar ăt dôk hrăm mbĭt đru bi mguôp gang mkhư̆ klei ruă tưp Covid-19.

Pô mblang: Y-Ƀel Êban