VOV4.Êđê- Hlăm wưng giăm anei, ti Dak Lak mâo nanao anôk bluh mâo klei ruă Covid 19 hlăm êpul êya yang ƀuôn. Kñăm mdrơ̆ng hŏng klei dôk mâo dleh dưi ksiêm dlăng mơ̆ng klei ruă tưp, Dak Lak hyuă kjăp leh bruă ksiêm dlăng, mđĭ klei hâo hưn, mtô mblang, mtrŭt mjhar mnuih ƀuôn sang mđĭ klei thâo săng hlăm hdră gang mkhư̆ klei ruă tưp. Mbĭt anăn mđĭ hdră ksiêm dlăng kman – dŏng mdrao mnuih ruă Covid 19 ti Sang êa drao kdriêk Krông Ƀŭk truh 2 blư̆, mprăp 2 anôk bi ktlah mklin sa anôk ti Ƀuôn Ama Thuôt, djăp anôk kơ hlăm brô 1.300 čô mnuih.

Leh giăm 2 hruê kăm mtrŭn hnơ̆ng bi ktlah hjăn ala ƀuôn hluê si Asăp mtrŭn mrô 16 ti hnơ̆ng asăp mtrŭn mrô 15 mơ̆ng Khua knŭk kna, ƀuôn prŏng Ƀuôn Ama Thuôt, čar Dak Lak hyuă kjăp wĭt dŭm hdră kčah bi ktlah gang mkhư̆ klei ruă Covid-19. Knŏng 13 hruê, mâo 4 anôk mâo klei ruă tưp hlăm êpul êya hŏng giăm 50 čô mnuih ruă mrâo, amâo djŏ knŏng ngă kơ ƀuôn prŏng Ƀuôn Ama Thuôt lŏ wĭt hluê ngă asăp mtrŭn mrô 16 đuič ôh, ƀiădah lŏ mkŏ mjing klei ksiêm mkă pral hlăm kluôm alŭ wăl, hŏng giăm 102 êbâo gŏ êsei mnuih ƀuôn sang. Vũ Văn Hưng, Khua Knơ̆ng bruă sang čư̆ êa ƀuôn prŏng Ƀuôn Ama Thuôt brei thâo, mâo 70 êpul ksiêm mkă dưi mkŏ mjing, leh anăn srăng ksiêm mkă nanao mơ̆ng hruê 27-8. Êngao anăn, bi ktlah hjăn kjăp hĭn mơ̆ng ƀuôn prŏng hluê ngă, srăng rơ̆ng kơ bruă ksiêm mkă pral, êđăp ênang, dưi ksiêk mgaih phung F0 dôk mâo hlăm êpul êya.

“Hluê ngă asăp mtrŭn mrô 16 jing kăm amâo brei hlei pô dưi kbiă hlăm ktuê êlan, êngao kơ phung ngă bruă. Leh anăn, hrue 1-9 srăng amâo mâo ôh klei nao sang hră, mdei jih jang dŭm bruă sang hră. Nao sang mnia snăn srăng mâo dŭm êpul hgŭm, phung mniê, phung êdam êra srăng nao sang mnia blei brei mnơ̆ng kơ mnuih ƀuôn sang truh ti grăp gŏ êsei, alŭ ƀuôn. Kluôm ƀuôn prŏng srăng ksiêm mkă ƀrư̆ ƀrư̆ hluê si mta mơ̆ng jih jang gŏ êsei, hlăm wang 5-7 hruê srăng bi leh”

Sa krĭng wăl mrâo kwang dar ti să Čư̆ Êbur, ƀuôn prŏng Ƀuôn Ama Thuôt

 Hlăm jih 2 hruê kăm êgao, Covid-19 ti Dak Lak dleh ktuê dlăng. Amâo djŏ knŏng hjăn ƀuôn prŏng Ƀuôn Ama Thuôt lu mnuih ƀuôn sang ôh, ƀiădah dŭm să ƀiă mnuih ƀuôn sang, msĕ si Čư̆ Bao (wăl krah Ƀuôn Hô), să Čư̆ Né (kdriêk Krông Ƀuk) leh anăn să Ea Nam (kdriêk Ea H’leo) ăt mâo phung ruă hlăm êpul êya hŏng êbeh 150 čô djŏ klei ruă.

 Klei msĕ hlăm dŭm anôk mâo klei ruă anei jing djŏ tuôm kơ bruă dŭm anôk bruă mnia blei ngă bruă hŏng dŭm čar, ƀuôn prŏng hlăk mâo klei ruă Covid-19 bluh mâo ktang. Hdră hiu duah brei ƀuh, hlăk mâo lu klei kƀah hlăm bruă ktuê dlăng phung mgăt êdeh, êdeh êdâo, mkŏ klei hâo hưn plah wah dŭm čar leh anăn plah wah dŭm êpul djŏ tuôm. Msĕ si ti wăl krah Ƀuôn Hô, leh giăm 1 hruê kăm ƀuh mâo êpul 57 čô mnuih ruă, bruă hiu duah ăt jưh ti sa anôk bruă mnia blei, kyua amâo mâo ôh klei hâo hưn kơ pô mgăt êdeh nao pŭ suai ti anôk bruă mnia blei anei dŭm hruê akŏ mlan 8. Thiếu tá Trần Ngọc Tú –  Khua Êpul kahan ksiêm hlăm êlan klông mrô 1, Adŭ bruă kahan ksiêm čar Dak Lak, mbĭt hŏng dŭm êpul bruă djŏ tuôm mă bruă ti Anôk ktuê dlăng kban 110, ksiêm dlăng mnuih, êdeh êdâo mơ̆ng nah dưr hlăm čar brei thâo, ară anei bruă dleh hiu duah dưi msir mgaih kyua kdrăp ksiêm mkă mrô QR hlăm đĭng blŭ thâo mĭn.

“Hlăk anăn snăn ka mâo ôh bruă anăn. Ară anei snăn ksiêm dlăng mrô QR sơaĭ. Êdeh truh snăn brei ksiêm dlăng mrô QR, wăt bruă mdrao mgŭn, wăt Phŭn bruă kahan ksiêm. Sĭt ksiêm dlăng djăp jih klei gâo hưn.”

Hla kak lač kơ klei huĭ hyưt tưp klei ruă Covdi-19 gưl să ti Dak Lak

 Ti anăp klei ruă tưp dleh ktuê dlăng, bi kƀĭn hŏng Anôk bruă gĭt gai gang mkhư̆ klei ruă Covid-19 čar Dak Lak, Phạm Ngọc Nghị, Khua Knơ̆ng bruă sang čư̆ êa čar brei thâo, anôk mâo klei mnuih ƀuôn sang leh anăn êpul bruă djŏ tuôm ngă ngơi mang. Mbĭt hŏng klei hyuă kjăp klei bhiăn, mđĭ klei hâo hưn kơ mnuih ƀuôn sang kơ klei gang mkhư̆ klei ruă tưp, alŭ wăl hlăm čar brei mprăp kơ klei dleh dlan hĭn srăng mâo čiăng mâo hdră msir klă klơ̆ng, djŏ mmông. Êlâo hĭn, Dak Lak srăng mđĭ klei dưi tŭ jum - mdrao klei ruă Covid-19 ti sang êa drao prŏng Krông Ƀuk mơ̆ng 100 truh 200 jhưng, mprăp thiăm 2 anôk bi ktlah hjăn ti Ƀuôn Ma Thuôt, djăp kơ hlăm brô 1.300 čô mnuih. Leh anăn hluê si Phạm Ngọc Nghị, klei dưi mdrao klei ruă Covid-19 ăt brei dưi bi mđĭ:

“Akâo kơ sang êa drao prŏng krĭng lăn Dap Kngư mprăp thiăm 5 êtuh boh jhưng đih mdrao, kyua drei lŏ đru kơ dŭm čar Lăn Dap Kngư. Brei mprăp anôk, kdrăp mnơ̆ng êlâo. Kơ êdi, sĭt mâo mnuih ruă snăn pô srăng lŏ dơ̆ng mđĭ ktang mnuih mă bruă. Hlăm klei mdrao mgŭn snăn gĭr čiăng kơ mnuih ruă nao truh ti tal 2 snăn dưi kbiă mơ̆ng sang êa drao. Bi čiăng truh ti tal 1 snăn bŏ hŏng klei dleh dlan”

            Hluê si Anôk bruă ktuê dlăng klei ruă tưp čar Dak Lak, ti čar mâo 1 kdriêk hlăm “krĭng amâo mâo klei ruă tưp - krĭng êđăp ênang. 8 kdriêk hlăm krĭng kñĭ - krĭng mâo klei huĭ hyưt, 3 kdriêk, 1 wăl krah leh anăn ƀuôn prŏng Ƀuôn Ama Thuôt, jing (krĭng kñĭ khua)- yap jing krĭng mâo klei huĭ tưp, leh anăn kdriêk Krông Ƀuk jing (krĭng hrah) - krĭng mâo klei huĭ hyưt hĭn. Hlăm boh klei mrâo mdrơ̆ng hŏng klei ruă Covid 19, Ƀuôn Ma Thuôt leh anăn Krông Ƀuk bi ktlah leh hjăp mơ̆ng hruê 26-8. Bruă ksiêm mkă jih jang ăt mphŭn pŏk ngă. Hlăm anăn, Ƀuôn Ama Thuôt mphŭn ksiêm mkă kluôm ƀuôn prŏng leh anăn kdriêk Ea Kar mphŭn ksiêm mkă hlăm jih jang ƀuôn mnuih djuê ƀiă. Mnuih ƀuôn sang Dak Lak čang hmăng klei gĭr ktưn mrâo srăng đru pral bi ktlah phung F0 hlăm êpul êya, mjưh klei bluh mâo dŭm anôk mâo lu mnuih ruă, đru mkhư̆ tŭ dưn klei ruă Covid-19.

Pô mblang: H’Zawut Ƀuôn Yă