VOV4.Êđê - Hruê 16-8, kahan ksiêm kdriêk Krông Pač, čar Dak Lak mâo leh Hdră mtrŭn kčŭt kđi klei ngă soh “bi tưp lar klei ruă tưp huĭ hyưt kơ mnuih” mâo hlăm mlan 8/2021 ti alŭ 6 leh anăn alŭ 7 ti să Vụ Bổn, ngă kơ 2 êpul mâo klei ruă Covid-19 hŏng 20 čô. Leh ƀuh phung ruă, bruă sang čư̆ êa kdriêk Krông Pač kwang dar jih să Vụ Bổn hŏng êbeh 4 êbâo gŏ êsei, hlăm brô 18 êbâo čô mnuih ƀuôn sang čiăng ngă dŭm hdră mdrao mgŭn, gang mkhư̆ klei ruă tưp lar hlăm êpul êya.

Mbĭt anăn, Knơ̆ng bruă sang čư̆ êa kdriêk Krông Pač ăt brei Khua Knơ̆ng bruă sang čư̆ êa să Vụ Bổn mdei bruă kyua ngă ngơi mang hlăm hdră gang mkhư̆ klei ruă tưp.  Bruă kčŭt kđi ti să Vụ Bổn jing kñăm bi mklă klei bi knăl ngă soh “Bi mtưp klei ruă huĭ hyưt kơ mnuih” kčah mtrŭn ti mta 240 hlăm Hdră bhiăn kčŭt hưn. Yap truh tlam 16-8, čar Dak Lak mâo 527 čô mnuih rưa Covid-19, hlăm anăn mâo 426 čô dôk mdrao mgŭn, 2 čô djiê, mâo 99 čô dưi mdrao hlao leh anăn kbiă mơ̆ng Sang êa drao.

H Zawut pô mblang