VOV4.Êđê- Klei bi kƀĭn tal 2 Êpul gơ̆ng bruă mnuih ƀuôn sang čar Dak Lak gưl X, wưng thŭn 2021 – 2026 dưi mkŏ mjing hlăm 2 hruê, hruê 12 lehanăn 13/8. Dưi mkŏ mjing hlăk klei ruă Covid 19 dôk mâo dleh dưi ksiêm dlăng ti alŭ wăl, klei bi kñĭn tal anei dưi mkŏ mjing hluê hdră online hŏng 8 anôk mkŏ kñăm rơ̆ng kjăp hdră gang mkhư̆ klei ruă tưp.

Ti anôk bi kƀĭn tal anei, Êpul gơ̆ng bruă mnuih ƀuôn sang čar Dak Lak tĭng dlăng leh boh tŭ hluê ngă hdră kčah mđĭ kyar bruă duh mkra – ala ƀuôn, rơ̆ng kjăp bruă lĭng kahan, răng mgang klei êđăp ênang hlăm 6 mlan akŏ thŭn ; dŭm bruă klam, hdră msir phŭn hlăm 6 mlan knhal jih thŭn 2021. Hlăm 6 mlan êgao, khădah hmăi mơ̆ng klei ruă Covid 19 ƀiădah hŏng bruă mđing kiă kriê, gĭt gai hluê ngă “Mta kñăm mdua” gang mkhư̆ klei ruă tưp êjai mđĭ kyar bruă duh mkra – ala ƀuôn êjai, hnơ̆ng mâo mnơ̆ng dhơ̆ng kluôm ti alŭ wăl čar (GRDP- mkă hŏng hŏng thŭn 2010) ăt đĭ êbeh 22.200 êklai prăk, đĭ 9,11%.

Hnơ̆ng hrui wĭt kơ ngăn prăk knŭk kna mâo 3.595 êklai prăk, đĭ 11,5% mkă hŏng wưng anei thŭn êlâo; dŭm hdră bruă dhar kreh – ala ƀuôn dưi krơ̆ng kjăp; dŭm hdră mtrŭn đru kơ yang ƀuôn mâo mđing hluê ngă, klei hdĭp mnuih ƀuôn sang dưi rơ̆ng kjăp. Ti klei bi kƀĭn, phung bi ala srăng đru mguôp klei blŭ lehanăn hdră msir hluê ngă bruă klam hlăm dŭm mlan adôk hlăm thŭn 2021; bi trông čhai, bi mklă dŭm hdră mtrŭn djŏ tuôm kơ hdră kčah mđĭ kyar bruă duh mkra ala ƀuôn čar Dak Lak 5 thŭn ti anăp. Ti 8 anôk mkŏ, êlâo kơ mkŏ mjing klei bi kƀĭn tal 2, Êpul gơ̆ng bruă mnuih ƀuôn sang čar Dak Lak gưl X, phung bi ala dưi ksiêm dlăng pral kman SARS – CoV2 lehanăn brei dôk bi kbưi hŏng pô mkăn, truă čhiăm guôm ƀô̆ hluê ngă kjăp hdră gang mkhư̆ klei ruă tưp./.

Pô mblang: H’Nêč Êñuôl