VOV4.Êđê- Hgao klei rŭng răng tal êlâo, leh êbeh 1 mlan ngă klei kwang dar čiăng gang mkhư̆ klei ruă Covid-19, mnuih ƀuôn sang ti lu ƀuôn sang ti să Čư̆ Nĕ, kdriêk Krông Ƀuk, čar Dak Lak mâo leh klei mkra mlih djŏ guôp čiăng hơĭt klei hdĭp mda, rơ̆ng mkra mjing.  Hlăm sang, dŭm kdrăn lŏ ăt mtah mda, mnơ̆ng rông ăt lar êngŭm kyua mâo klei đru mơ̆ng dŭm êpul gang mkhư̆ klei ruă Covid-19 hlăm êpul êya leh anăn phung êdam êra ngă bruă.

Dưi wĭt kơ pưk sang leh sa mlan dôk mdrao klei ruă tưp Covid-19, amai H’Trâm Kpă, ti Ƀuôn Đrao, să Čư̆ Nĕ, Kdriêk Krông Ƀŭk amâo dưi mdăp ôh klei hơ̆k mơak kyua hlao leh klei ruă leh anăn dưi bi tuôm hŏng anak mniê pô, Amai H’Trâm Yăl dliê, hlăm sa mlan êgao, leh 4 čô hlăm gŏ sang mâo klei ruă tưp, amai mâo klei bi kngar leh anăn mâo lu klei mĭn. Hlăm hruê mmông dôk mdrao mgŭn, khă mâo êpul aê mdrao, nai mdrao leh anăn êpul čŏng ngă bruă kriê dlăng, đru hlăm grăp bruă, ƀiădah amai mâo nanao klei uêñ mĭn kơ phung hlăm gŏ sang leh anăn mnơ̆ng rông hlăm sang kyua jih jang nao bi ktlah, mdrao mgŭn leh anăn ƀuôn sang pô dôk kwang dar.

“Yăng dar mnuih ƀuôn sang srăng nao pưk hma duah mnơ̆ng ƀơ̆ng huă kơ gŏ sang, ƀiădah ară anei diñu amâo dưi kbiă ôh, mơ̆ng hruê klei ruă tưp bluh đĭ, kâo ăt ktuê dlăng hlăm dŭm mbah internet msĕ si Facebook leh anăn dŭm klei mrâo hlăm kdriêk, ƀuh mâo lu phung mâo ai tiê thâo kmah nao đru kơ ƀuôn sang, amâo knŏng đru kơ dŭm gŏ sang dleh dlan, ƀiădah wăt kơ dŭm gŏ sang mâo mnuih jing F0 leh anăn F1 mâo sơăi klei đru mơ̆ng knŭk kna.”

Phung čŏng ngă bruă đru kriê dlăng phung hđeh mâo amĭ dôk mdrao mgŭn klei ruă Covid-19

Êbeh sa mlan ngă klei kwang đar, klei hdĭp mnuih ƀuôn sang ti să Čư̆ Nĕ mâo klei tŭk mtŭl. Ti ƀuôn Đrao leh anăn Tơ̆ng Drun mâo 440 gŏ sang hlăm anăn amâo 439 gŏ sang jing mnuih Êđê, hdĭp mda hŏng klei ngă lŏ hma. mmông anei jing hruê mmông hrui pĕ boh mnga msĕ si mdiê, Ktơr, boh durian leh anăn jik rơ̆k đang kphê, ƀiădah kyua ngă djŏ klei bhiăn gang mkhư̆ klei ruă tưp, grăp čô dôk kơ sang sơăi, dŭm bruă msĕ si hrui pĕ boh mnga, pla ana boh kroh, blei mnơ̆ng yua mâo phung čŏng ngă bruă nao đru sơăi. Ayŏng Y-Bih Êban, sa čô hlăm êpul čŏng nao ngă bruă brei thâo:

“Dŭm bruă ngă đru kơ mnuih ƀuôn sang hlăm anôk kwang dar jing nao mă duah mnơ̆ng ƀơ̆ng kơ ŭn mnŭ msĕ si: nao wiă rơk kơ êmô, čiêm ŭn mnŭ, asâo, miêu kơ dŭm gŏ sang nao bi ktlah amâo lŏ mâo mnuih dôk hlăm sang. Đru blei mnơ̆ng yua kơ dŭm gŏ sang dôk hlăm anôk čuăl krĭng leh anăn êpul čŏng ngă bruă nao bha truh ti sang diñu. Leh mâo phung mâo ai tiê kmah hŏng êpul nao ba mnơ̆ng ƀơ̆ng huă, msĕ si djam mtam, khă dơ̆ng tlam mmăt leh ƀiădah phung ayŏng adei ăt pŭ dưm hlăm êdeh kai, êdeh pơphŭt nao kơ grăp boh sang bha kơ mnuih ƀuôn sang.”

Phung čŏng ngă bruă đru khăt rơ̆k leh anăn hla kyâo kơ mnơ̆ng rông amâo uêñ yan adiê angĭn êbŭ leh anăn êlan dleh găn êrô

Să Čư̆ Nĕ jing anôk mâo mnuih ruă lu hŏng giăm 300 čô mnuih ruă, hlăm anăn lu hĭn jing 2 ƀuôn, Ƀuôn Đrao leh anăn Ƀuôn Tơ̆ng Drun hŏng giăm 240 čô mnuih ruă. Mơ̆ng hruê 22/8 truh kơ ară anei, hlăm să mâo 17 alŭ, ƀuôn ngă klei kwang đar, 4 alŭ leh anăn dŭm ƀuôn mkăn dôk ngă klei bi kbưi tui si asăp mtrŭn mrô 16. Să mkŏ mjing leh 21 êpul čŏng ngă bruă leh anăn êpul Covid yang ƀuôn, anei jing êpul ngă bruă nao đru leh anăn jing kdrông mơ̆ng mnuih ƀuôn sang hŏng bruă sang čư̆ êa. Grăp čô hlăm êpul mâo bruă klam nao đru blei mnơ̆ng yua kơ grăp gŏ sang, ba mbha mnơ̆ng yua leh anăn čiămg guôm ƀô̆ kơ mnuih ƀuôn sang, đru ba čhĭ boh mnga bruă lŏ hma đru kơ mnuih ƀuôn sang tơdah diñu čiăng.

Đru kơ mnuih ƀuôn sang hrui êmiêt boh mnga lŏ hma

Dŭm êpul čŏng ngă bruă leh anăn êpul covid yang ƀuôn dôk ngă bruă đru răng kriê 6 čô hđeh điêt kơ dŭm gŏ sang nao bi ktlah mbĭt amâodah dôk mdrao klei ruă tưp covid-19. Să đru bruă mkăp brei hnun, êa ksâo, mnơ̆ng yua leh anăn êpul čŏng ngă bruă bi mlih ngă bruă tŭk knă êsei djam kơ phung hđeh. Hoàng Văn Thịnh, khua kiă kriê bruă mặt trận să Čư̆ Nĕ brei thâo:

“Leh să Čư̆ Nĕ ngă klei kwang dar 2 truh kơ 3 hruê, mâo lu phung mâo ai tiê kmah ti čar Dak Lak hriê leh anăn đru kơ să lu lĭn, boh nik, hlăm anăn mâo kdrăp yua bruă mdrao mgŭn, rơ̆ng kơ phung ayŏng amai adei gang mkhư̆ klei ruă tưp leh anăn mbah kơ mnuih ƀuôn sang, amâo lui mnuih ƀuôn sang ư̆ êpa amâo dah lui sa čô kơ tluôn. Bi kơ êpul covid yang ƀuôn, dŭm êpul hđeh êdam êra čŏng ngă bruă mâo klei hur har, bi mguôp bi leh bruă klam gang mkhư̆ klei ruă tưp. Mâo lu phung hđeh êdam êra, êpul covid yang ƀuôn khădah mâo anak điêt amâodah êlan klông jhat, ƀiădah ăt hur har đru kơ mnuih ƀuôn sang mâo boh tŭ dưn.”

Đru mnuih ƀuôn sang kriê dlăng mnơ̆ng rông

Leh êgao sa mlan ngă klei kwang đar, čuăl krĭng, ngă klei bi kbưi yang ƀuôn čiăng gang mkhư̆ klei ruă tưp. Truh kơ ară anei, klei ruă tưp ti să Čư̆ Nĕ dưi ksiêm dlăng leh, amâo lŏ mâo ôh mnuih ruă mrâo hlăm êpul êya yang buôn. Bruă sang čư̆ êa leh anăn mnuih ƀuôn sang dôk gĭr jih ai čiăng mlih êa mil anôk mâo klei ruă tưp, hnưm msưh kdŭn klei ruă tưp leh anăn ba wĭt klei hdĭp msĕ hŏng yăng đar.

Pô mblang: Y-Ƀel Êban