VOV4.Êđê - Hruê mbruê 14/12, ti ƀuôn prŏng Ƀuôn Ama Thuôt, čar Dak Lak, phŭn bruă mdrao mgŭn bi mguôp leh hŏng anôk bruă ksiêm duah kơ kman klei ruă tưp mkŏ mjing klei kƀĭn kreh knhâo hŏng akŏ gang klei ruă amâo mâo bi mtưp thŭn 2021. Hluê si klei hưn mthâo hlăm klei kƀĭn trông, klei ktrŏ kơ phung mâo klei ruă amâo mâo bi tưp msĕ si: klei ruă brŭ, ruă kboh, mâo mta mmih hlăm êrah, dăl êlan bi êwa leh anăn dŭm mta klei ruă mkăm dôk mâo 70% klei ktrŏ klei ruă duăm hlăm kluôm ala.

Dŭm klei ruă anei jing phŭn gha ngă truh klei djiê. Đăo knăl hlăm grăp thŭn mâo 77% phung djiê kyua dŭm mta klei ruă amâo mâo bi mtưp. Ti krĭng Lăn Dăp Kngư, thŭn 2020, WHO đru leh kơ 40 să ti čar Kon Tum leh anăn Lâm Đồng hlăm bruă ksiêm dlăng, mdrao mgŭn leh anăn čih hưn dŭm klei ruă amâo mâo bi mtưp. Truh kơ thŭn 2021, klei bi hmô anei dưi pŏk phai truh kơ 150 să hlăm 5 čar krĭng Lăn Dăp Kngư. Dŭm klei blŭ hlăm klei kƀĭn trông lač klă, bruă anei ăt dôk mâo lu klei dleh dlan, klei lông dlăng, čiăng mâo hdră êlan hâo hưn, ksiêm dlăng mâo boh tŭ dưn hĭn.

Y-Ƀel pô mblang