VOV4.Êđê- Knŭk kna mâo leh Hdră mtrŭn mrô 63/NQ-CP kơ dŭm bruă klam, hdră msir phŭn kñăm mtrŭt mđĭ bruă duh mkra, kah mă prăk duh bi liê mơ̆ng knŭk kna lehanăn ba čhĭ mnơ̆ng kơ ala tač êngao h’ĭt kjăp hlăm dŭm mlan knhal jih thŭn 2021 lehanăn akŏ thŭn 2022. Klei hâo hưn mơ̆ng Êpul hgŭm bruă Knơ̆ng prăk Việt Nam (VNBA) brei thâo, mâo 16 knơ̆ng prăk mnia mblei tŭ ư mhrŏ ênoh prăk mnga brei čan đru kơ anôk bruă duh mkra hgao klei ruă Covid 19. Dŭm anôk bruă duh mkra ti alŭ wăl čar Dak Lak mđing êdi kơ klei anei, kyua anei jing sa klei găl đru hgao klei dleh dlan, lŏ krŭ wĭt bruă pla mjing, mnia mblei.

Tui si klei čih yap mơ̆ng knơ̆ng bruă ngăn prăk knŭk kna čar Dak Lak: Yap truh kơ hruê 31/5/2021, dŭm êpul êya ngăn prăk mâo ênoh leh brei čan kyua klei hmăi amâo jăk mơ̆ng klei ruă tưp Covid-19 jing 15 êbâo 436 êklai prăk. Ară anei, dŭm êpul êya ngăn prăk bi hrŏ leh prăk mnga kơ 7 êbâo 892 čô mnuih čan hŏng ênoh prăk nư jing 6 êbâo 401 êklai prăk. ênoh prăk mnga dưi bi hrŏ jing 8 êklai 814 êklăk prăk. bruă knơ̆ng bruă ngăn prăk bi hrŏ prăk mnga kơ dŭm knơ̆ng bruă dưi đru bi hrŏ sa krêč hlăm klei dleh dlan. Khădah ênoh prăk bi hrŏ anei jing ƀiă êdi.

            Khua kiă kriê sa knơ̆ng bruă mkra mjing lehanăn mnia blei kphê ti kdriêk Krông Pač čar Dak Lak brei thâo: ară anei, knơ̆ng bruă dôk đuôm nư knơ̆ng bruă ngă prăk giăm 50 êklai prăk. thŭn 2020 knơ̆ng bruă dưi mâo klei bi hrŏ prăk mnga mơ̆ng knơ̆ng bruă ngăn prăk. Ƀiădah thŭn 2021 anei, ăt knar hŏng hnơ̆ng êlâo.

Phung čan ti Dak Lak dôk čang guôn leh anăn čang hmăng dŭm êpul bruă brei čan prăk mă mnga hdjul hluê si klei gĭt gai mơ̆ng Knŭk kna leh anăn Knơ̆ng prăk ala čar Việt Nam čiăng hgao klei dleh dlan ară anei

           Nguyễn Hữu Hoàng Dương, khua knơ̆ng bruă mnia mblei Hoàng Dương Ban Mê brei thâo: ară anei dôk đuôm nư mơ̆ng knơ̆ng bruă ngăn prăk 8 êklai 700 êklăk prăk, hŏng prăk mnga giăm 9,9%/thŭn. 2 thŭn hŏng anei bruă duh mkra lehanăn čhĭ mnia mơ̆ng knơ̆ng bruă mâo lu klei dleh dlan kyua klei ruă tưp Covid-19. Mnơ̆ng dhơ̆ng dôk mklin sa anôk amâo thâo ba čhĭ ôh, êjai anăn, ênoh blei mnơ̆ng mkra mjing đĭ ktang lehanăn prăk mnga mơ̆ng knơ̆ng bruă ngăn prăk mâo hrŏ ôh.

“Ară anei, knơ̆ng bruă amâo mâo ƀuh ôh sa mta klei đru mơ̆ng knơ̆ng bruă ngăn prăk. hlăm wưng klei ruă tưp anei, 2 thŭn hŏng anei knơ̆ng bruă dôk hlăm klei dleh dlan êdi. Mnơ̆ng dhơ̆ng amâo dưi ba čhĭ ôh kơ čar mkăn, hmăng hmưi knơ̆ng bruă ngăn prăk klei găl čiăng kơ dŭm knơ̆ng bruă dưi găn jih klei dleh dlan ară anei. Lŏ hmăng hmưi kơ knơ̆ng bruă ngăn prăk bi hrŏ hĕ prăk mnga, čiăng knơ̆ng bruă dưi tla nư ƀrư̆ ƀrư̆ lehanăn bi hrŏ prăk mnga keh knơ̆ng bruă dưi găn klei dleh dlan anei.”

Agribank Dưr Dak Lak jing êpul bruă brei čan prăk dôk gĭr pŏk ngă bruă bi hrŏ prăk mnga leh anăn brei kơ anôk bruă duh mkra ti Dak Lak čan kyua hmaĭ mơ̆ng klei ruă Covid-19

Nguyễn Văn Sanh, khua êpul hgŭm bruă lŏ hma Thanh Bình, să Dur Kmăr, kdriêk Krông Ana brei thâo: yan boh mnga leh êgao, êpul hgŭm bruă lŏ hma Thanh Bình bi mguôp leh hŏng anôk bruă ksiêm duah lehanăn mđi kyar ana boh kroh Việt Nam ngă klei hriăm kơ bruă mkra mjing braih jăk mơ̆ng mjeh Đài Thơm 8 tui si hnơ̆ng čuăn VietGap kơ mnuih ƀuôn sang hlăm êpul. Klei bi hmô anei dưi pŏk leh kơ sa êlan mkra mjing mrâo, mâo hnơ̆ng jăk hĭn. Bi kơ Nguyễn Văn Sanh nao ba mgrơ̆ng leh hră lăn hlăm gŏ sang lehanăn čan 3 êklai 400 êklăk prăk čiăng duh bi liê kơ bruă mkra mjing, mnia mblei. Truh kơ ară anei, Ñu leh anăn dŭm čô hlăm êpul ăt ka mâo mơh klei bi hrŏ prăk mnga mơ̆ng knơ̆ng bruă ngăn prăk.

“Ară anei jing dleh dlan êdi kơ prăk kăk, boh nĭk kơ prăk yua kơ bruă bi drơ̆ng hŏng klei êa lĭp, adiê không, lŏ mkra wĭt jing ênoh lu êdi. Bi kơ êpul bi mguôp, mâo dŭm čô hlăm êpul nao mbi mgrơ̆ng leh ngăn drăp pô lehanăn lĭng čan čiăng mâo prăk tla prăk pui kmlă, prăk mkra wĭt, prăk mưn mnuih mă bruă. Truh kơ ară anei, ka mâo ôh sa knơ̆ng bruă ngăn prăk đru bi hrŏ prăk mnga. Hmăng hmưi, kyua klei ruă tưp anei, knơ̆ng bruă ngăn prăk srăng bi hrŏ prăk mnga kơ hmei.”

Klei mrâo kơ bruă mâo 16 knơ̆ng bruă ngăn prăk, êpul hgŭm knơ̆ng bruă ngăn prăk Việt Nam (VNBA) bi tŭ ư bi hrŏ prăk mnga kơ dŭm knơ̆ng bruă dưi găn klei ruă tưp Covid-19. Anei yơh jing klei dŭm knư̆ng bruă dôk hmăng hmưi.

Pô mblang: Y-Khem Niê