VOV4.Êđê- Leh mâo sa čô mnuih djŏ kman SARS –CoV -2 dôk ngă bruă hlăm Anôk bruă mdrao mgŭn kdriêk Lăk, bruă mdrao mgŭn čar Dak Lak mâo leh hră mơar kwang dar êjai Kwar krah kdriêk Lăk čiăng mjêč pŏk ngă dŭm hdră msir, gang mkhư̆ klei ruă tưp.

Mbĭt hŏng anăn, Knơ̆ng bruă mdrao mgŭn Dak lak mjêč ksiêm mkă, bi ktlah hjăn kơ jih jang phung dôk mdrao mgŭn, phung kriê dlăng mnuih ruă, wăt phung ngă bruă mdrao mgŭn, phung ngă hră mơar dôk ngă bruă ti Anôk bruă mdrao mgŭn mơ̆ng 7 mmông mmăt hruê 2-7-2021 êla mâo klei hưn mthâo mrâo. Krih êa drao mdjiê kman kluôm Anôk bruă mdrao mgŭn kdriêk Lăk hlăm mlan hruê 2-7 mtam. Pô djŏ kman klei ruă SARS-CoV-2 jing pô dôk ngă bruă mdrao mgŭn ti wăl bi ktlah hjăn ti Anôk bruă mdrao mgŭn kdriêk Lăk. Pô anei jing F1 mnuih ruă mrô 15921.

Pô mblang: H’Zawut Ƀuôn Yă