VOV4.Êđê- Leh phung F1 mâo 3 blư̆ ksiêm mkă amâo djŏ ôh kman SARS-CoV2, êbeh 140 čô mnuih ƀuôn sang hlăm wăl kwang dar ăt mâo klei tŭ ksiêm mkă 2 blư̆ amâo djŏ ôh kman, aguah 26-5, Knơ̆ng bruă sang čư̆ êa čar Dak Lak bi mklă lăm lui kwang dar hŏng wăl mnuih ƀuôn sang dôk ti 189/1 êlan Mai Hắc Đế, ƀuôn hgŭm Tân Thành, ƀuôn prŏng Ƀuôn Ama Thuôt, čar Dak Lak - anôk mâo 2 čô ruă Covid-19.

Aduôn Trần Thị Dinh, K’iăng khua knơ̆ng bruă sang čư̆ êa ƀuôn hgŭm Tân Thành brei thâo, hlăm jih wưng bi ktlah hjăn wăl ƀuôn sang, mbĭt hŏng bruă ba êpul gak răng rơ̆ng klei êđăp ênang, gang mkhư̆ klei ruă tưp, bruă sang čư̆ êa iêu mthưr phung mâo ai tiê kmah đru mnơ̆ng ƀơ̆ng huă leh anăn mnơ̆ng yua aguah tlam rơ̆ng klei hdĭp kơ mnuih ƀuôn sang. Hlăm wưng kơ anăp, khă gơ̆ lamw lui leh kwang dar, ƀiădah alŭ wăl ăt lŏ mâo hdră ktuê dlăng klei suaih pral phung hlăm wăl mnuih ƀuôn sang anei čiăng hmao msir mgaih tơdah mâo klei amâo jăk.

Pô mblang: H’Zawut Ƀuôn Yă