VOV4.Êđê- tui si klei mrâo mơ̆ng êpul gĭt gai bruă gang mkhư̆ klei ruă tưp Covid-19 čar Dak Lak, hruê mbruê 26/7, alŭ wăl anei lŏ mâo 11 mâo klei ruă tưp Covid-19 mrâo, hlăm anăn mâo 6 čô tưp lar hlăm yang ƀuôn. Krông Năng jing kdriêk mâo mnuih mâo klei ruă tưp Covid-19 lu hĭn jing 5 čô, ƀuôn prŏng Ƀuôn Ama Thuôt mâo 3 čô, kdriêk Ea Kar mâo 2 mrâo wĭt mơ̆ng čar Bình Dương. Kdriêk Krông Pač mâo sa čô mnuih ruă mrâo wĭt mơ̆ng ƀuôn prŏng Hồ Chí Minh.

Djŏ tuôm hŏng 6 čô mnuih ruă tưp lar hlăm yang ƀuôn hlăm hruê mbruê 26/7, knơ̆ng bruă mdrao mgŭn čar Dak Lak ngă leh bruă tui duah, ba bi ktlah lehanăn mă mta ksiêm mkă kman 14 jing F1. Mtô kơ dŭm anôk bruă bruă mdrao mgŭn dŭm kdriêk ngă bruă krih êa drao mdjiê kman dŭm anôk mnuih ruă tuôm găn nao. Yap truh kơ 5 mmông tlam hruê mbruê, čar Dak Lak mâo 128 čô mnuih mâo klei ruă tưp Covid-19 hlăm 13/15 kdriêk, wăl krah, ƀuôn prŏng, Čư̆ M’Gar lehanăn M’Drăk jing 2 alŭ wăl ka mâo ôh mnuih mâo klei ruă tưp.

Pô mblang: Y-Ƀel Êban